मेरो कानभित्र लुकेर बसेका चीजहरू (एलिसिया एम. क्वेसनेल, एमडीको लागि)

मोसाब अबू तोहा एक फिलिस्तिनी कवि, लेखक, र कार्यकर्ता हुन् । उहाँ १९९२ मा फिलिस्तिनको गाजामा जन्मनुभएको हो । उहाँ आफ्ना रचनाहरूमा फिलिस्तिनीहरूको सङ्घर्ष, साहस, र आशाहरूलाई सशक्त र भावनात्मक रूपमा चित्रण गर्नुहुन्छ । प्रस्तुत कविता अबू तोहाले २०२२ मा लेख्नुभएको प्रसिद्ध Things You May Find Hidden in My Ear को नेपाली भावानुवाद हो । यो कविता नाक, कानका प्रसिद्ध फिलिस्तिनी डाक्टर एलिसिया एम. क्वेसनेलप्रति समर्पित छ ।

जब तिमी मेरो कान चिर्छाै,
सुस्तरी छोऊ, यसलाई ।
भित्र कतै मेरी आमाको आवाज बसिरहेको छ ।
सावधानीमा बस्दै गर्दा जब मलाई रिङ्गटा लाग्छ,
उनको आवाजको गुञ्जनले मलाई छिटो निको पार्छ ।

तिमी गाउन सक्छौ अरबीमा गीतहरू,
मैले आफैँलाई सुनाउन वाचन गरेका अङ्ग्रेजीका कविताहरू,
वा घर पछाडिको बगैँचामा
चिरबिर चिरबिर गाइरहेका चराहरूको गीत ।

जब काटिएको घाउमा तिमी टाँका लगाउँछौ,
मेरो कानभित्रका सबै चीजहरू
मिलाएर फेरि राख्न नबिर्सिनु,
जसरी तिमी आफ्ना किताबहरू दराजमा मिलाएर राख्छौ ।

ड्रोनहरूको भुन्न भुन्न आवाज !
एफ-16 को गर्जन !
घरहरूमाथि खसिरहेका बमहरूको चित्कार !
खेतहरूमा र शरीरहरूमा,
बज्रिरहेका रकेटहरूका हुँकार !
मुक्त गरिदेऊ, यी सबैबाट
मेरो सानो कानको नलीलाई ।
छर्किदेऊ मेरो धाऊमा,
तिम्रा मुस्कानको अतर ।
भरिदेऊ मेरो नशामा जीवनको गीत,
ताकि म बिउँझिरहन सकून् ।
बिस्तारै बजाऊ ढोलक,
ताकि दिनरात,
मेरो मन तिम्रो मनसँग नाच्न सकून्,
मेरो डाक्टर !
भावानुवाद : दामोदर सुवाल