पदयात्री बढेपछि उत्साह थपिँदै

– वासुदेव पौडेल
पोखरा, १५ वैशाख । गत फागुन चैत महिनामा पटक÷पटक गरी परेको हिमपातका कारण अन्नपूर्ण चक्रीय पदमार्ग र आसपासका क्षेत्रमा प्रभावित पदयात्रा पर्यटनमा केही दिन यता पर्यटक बढ्न थालेसँगै उत्साह थपिएको छ ।
गत फागुन १३ गते अन्नपूर्ण आधार शिविर (एबीसी) मा आएको हिमआँधीका साथै त्यसयता विभिन्न समयमा परेको हिमपातले ठाउँठाउँमा पदमार्ग बिग्रे भत्केपछि समस्या आएकोमा तिनीहरूको पुनःनिर्माणपछि पुनः यस क्षेत्रमा पर्यटकको आगमन बढेको हो ।
अन्नपूर्ण चक्रीय पदमार्गका साथै अधिकांश पर्यटक अन्नपूर्ण आधार शिविरसम्म पुगेर फर्कने गर्दछन् । अन्नपूर्ण आधार शिविरमा अकल्पनीयरूपमा आएको हिमआँधीका कारण यहाँस्थित होटलका छाना नै उडाएपछि पर्यटकलाई असुविधा भएको थियो ।
हिमपातकै कारण अन्नपूर्ण चक्रीय पदमार्गअन्तर्गतको थोराङपास झण्डै डेढ महिना अवरुद्ध भएपछि अन्नपूर्ण संरक्षण क्षेत्र आयोजना (एक्याप) को पहलमा उक्त अवरोध खुलाइएको थियो ।
मुख्यतः पदयात्राकोे दोस्रो याम फेब्रुअरी, मार्च, अप्रिल, मे हो तर, यस यामको प्रारम्भ सन्तोषजनक नभए पनि अन्तिमतिर आएर राम्रो हुने देखिएको ट्रेकिङ एजेन्सीज एशोसिएसन अफ नेपाल (टान) पश्चिमाञ्चल क्षेत्रीय सङ्घका अध्यक्ष हरि भुजेलले बताउनुभयो ।
हिमपातले अवरुद्ध अन्नपूर्ण चक्रीय पदमार्ग खुल्नुका साथै अन्नपूर्ण आधार शिविर पुग्ने पदमार्ग सुधार गरिएका कारण पर्यटकको सङ्ख्या बढेको उहाँले बताउनुभयो । अन्नपूर्ण चक्रीय पदमार्गअन्तर्गत लमजुङ जिल्ला सदरमुकाम बेँसीसहरबाट सुरु भई मनाङको थोराङ्ला भञ्ज्याङ पास गरेर मुस्ताङ हुँदै पदयात्रीहरू पोखरा आउने गर्दछन् ।
पाँच हजार ४१६ मिटर उचाइमा मनाङको थोराङ्ला भञ्ज्याङ पर्दछ । हिमपातका कारण झण्डै डेढ महिना उक्त पदमार्ग क्षेत्र अवरुद्ध भएको थियो । हिमपातले अवरुद्ध पदमार्ग खुलाइएपछि बिस्तारै बढ्दै गएको यस क्षेत्रको पदयात्रा पर्यटन पछिल्ला दिनमा उत्साहजनक देखिएको अन्नपूर्ण संरक्षण क्षेत्र आयोजना (एक्याप) का कार्यालय प्रमुख राजकुमार गुरुङले जानकारी दिनुभयो ।
पदयात्री पयर्टकले अत्यधिक रुचाउने गरेको अन्नपूर्ण आधार शिविरमा पर्यटकको सुविधालाई लक्षित गरी विसं २०३८ मा पहिलोपटक सुविधा सम्पन्न होटल सञ्चालन सुरु गरिएको थियो । एबीसीमा मात्रै हाल चार होटेल छन, जसमा झण्डै १०० बढी बस्नसक्ने व्यवस्था छ । पछिल्लो तीन दशकयता एबीसी जाने पदयात्रा मार्गका सिनुवा, बाम्बो, हिमालयन, दोभान, देउराली, माछापुच्छ्रे आधार शिविर र एबीसीसमेतमा जम्मा २६ होटल सञ्चालनमा रहेका छन् ।
यस क्षेत्रमा पदयात्रामा जाने पर्यटकले उच्च हिमाली दृश्यसहितका रमणीय दृश्य नियाल्छन् नै, यहाँस्थित बुद्धशिला, पुजनीयम बराह र यहाँबाट देखिने १०८ धारासहितका धार्मिकस्थल पनि पर्यटकका लागि दर्शनीयस्थल हुन् ।
सन् १९५० जुन ३ तारिखका दिन फ्रान्सेली नागरिक मौरिस हर्जोगको टोलीले अन्नपूर्ण प्रथम हिमालको आरोहण गरी विश्व कीर्तिमान राखेसँगै यस क्षेत्रले विश्वव्यापी चर्चा पाएको हो । समुद्री सतहबाट आठ हजार ९१ मिटर उचाइको अन्नपूर्ण प्रथम आरोहणको सफलतापछि सन् १९५३ मे २९ मा तेञ्जिङ नोर्गे र एडमण्ड हिलारीले विश्वको सर्वोच्च शिखर सगरमाथाको आरोहण गरेका थिए ।