भारतमै बन्ने भयो स्पुटनिक पाँचौँ खोप

पुणे, १३ जुलाई । भारतको पुणेस्थित सिरम इन्स्टिच्युट अफ इन्डियाले सेप्टेम्बरदेखि रुसी स्पुटनिक पाँचौँ कोरोना भाइरसको खोप उत्पादन थाल्ने भएको छ । स्पुटनिक पाँचौँ खोपको उत्पादक रुसी प्रत्यक्ष लगानी कोषले सो कुराको पुष्टि गरेको हो ।
कोषले जारी गरेको वक्तव्यमा भारतमा वर्षको ३० करोडमात्र खोप उत्पादन गर्ने योजना भएको उल्लेख छ ।
खोप उत्पादनको लागि आवश्यक प्रविधि स्थानान्तरणको प्रक्रिया सुरु भइसकेको र सिरोम इन्स्टिच्युटलाई पठाइएको खोपको कोष र भेक्टर भारतको औषधि नियन्त्रण विभागले अनुमोदन गरिसकेको रुसी कम्पनीले जनाएको छ ।
सम्झौताबारे प्रतिक्रिया दिँदै रुसी प्रत्यक्ष लगानी कोषका कार्यकारी निर्देशक किरिल दिमित्रेभले भने, “भारत र संसारभरकै जनताको जीवन रक्षा गर्न ज्ञान र ऊर्जाको मिलन गर्ने यो राम्रो दृष्तान्त हो ।”
यसैबीच सिरम इन्स्टिच्युट अफ इन्डियाका प्रमुख अदर पुणेवालाले सेप्टेम्बरमा उत्पादन थालेपछि आफ्नो कम्पनीले करोडौँ मात्रा खोप उत्पादन गर्ने बताए ।
पुणेवालाको कम्पनीले गत महिना रुसी कम्पनीको खोप उत्पादन गर्न औषधि नियन्त्रण विभागबाट अनुमति पाएको थियो । सिरमले हाल टेस्ट लाइसेन्स पाएको छ जसको अर्थ उसले खोपको विकास र उत्पादन गर्न पाउनेछ तर बेच्न भने पाउनेछैन ।
सिरमले उत्पादन गर्ने स्पुटनिक पाँचौँ तेस्रो थरी कोरोना भाइरसको खोप हो । उसले जुन महिनाको अन्तिम सातादेखि जैविक प्रविधि कम्पनी नोभाभ्याक्सले उत्पादन गर्दै आएको कोरोना भाइरसको खोप कोभोभ्याक्स पनि उत्पादन गर्न थालेको हो । त्यसबाहेक कोभिडसिल्डको ब्रान्डमा भारतले एस्ट्राजेनेका खोपको पनि उत्पादन गर्दै आएको छ ।