खानदानी वर्गविरुद्ध खानदानीहरूको विद्रोह
- बैशाख १४, २०८१
नेपाली काङ्ग्रेस केन्द्रीय कार्य समितिको चैत १९ गतेको बैठकले नेकपा (एमाले) का अध्यक्ष केपी ओलीलाई पदमा बस्ने नैतिक अधिकार नभएको उल्लेख गर्दै ‘काङ्ग्रेसले नयाँ सरकार गठनको लागि अग्रसरता लिने’ निर्णय ग¥यो । फागुन २३ गतेको सर्वोच्च अदालतको फैसलाबाट एमाले र माओवादीको औपचारिक विभाजनपछि माओवादीले तत्काल समर्थन फिर्ता गर्ने बताउँदै आएको थियो । प्रधानमन्त्री ओलीले भने समर्थन फिर्ता लिए राजीनामा दिने बताउँदै आए पनि माओवादीले अझै समर्थन फिर्ता लिएको छैन ।
नेपालको संविधानमा अविश्वासको प्रस्ताव दर्तासँगै वैकल्पिक सरकारको नेतृत्व सुनिश्चित हुनुपर्ने व्यवस्था छ । अहिलेसम्म विपक्षी दलहरूले अविश्वासको प्रस्ताव दर्ता गर्ने अग्रसरता नदेखाउनुको कारण पनि यही हो । माओवादी अध्यक्ष प्रचण्ड करिब डेढ महिनादेखि नेकाका सभापति देउवा र जसपाका नेता महन्त ठाकुरलाई वैकल्पिक सरकारको नेतृत्व लिन ‘रोइकराइ’ गरिरहेका छन् । १० वर्षसम्म ‘संसदीय व्यवस्थाकै विरुद्ध हतियार उठाएको’ दाबी गर्ने माओवादी शान्तिपूर्ण बाटोमा आएपछि ‘संसदीय व्यवस्थाको फोहर पोखरी’ मा उम्कनै नसक्ने गरी डुबेको छ । प्रचण्डको निम्ति देश र जनताको आर्थिक, सांस्कृतिक परिवर्तन प्राथमिकतामा कहिल्यै परेन । भारतीय साथ र सहयोगमा जसरी पनि सरकारमा पुग्ने उनको प्राथमिकतामा परेको छ ।
शनिबार उनी लुम्बिनीमा कार्यकर्ताबीच भाषण गर्दै थिए — “सरकार परिवर्तनसम्बन्धी बैठकमा भाग लिन ४ बजे काठमाडौँ जाँदै छु ।” नेकाले सरकार गठन गर्ने अग्रसरता लिने निर्णय गरेसँगै प्रचण्डको मुहारमा निकै उत्साह छाएको छ । त्यो कति दिन टिक्छ, हेर्न बाँकी नै छ । तर, कार्यकर्तालाई पुँजीवादी सरकारमा सहभागिताको प्रलोभन देखाउनुबाहेक उनीसँग देखाउने कुनै विचार सिद्धान्त अब बाँकी छैन ।
अस्थिर नेताको पहिचान बोकेका प्रचण्ड भारतको इसाराविना दायाँबायाँ चल्न सक्दैनन् । एउटा दृष्टान्त लिऊँ, २०६४ सालको संविधानसभा निर्वाचनको । नेकाका सभापति गिरिजाप्रसाद कोइराला सुरुमा गणतन्त्रको पक्षमा थिएनन् । भारतको लागि नेपालमा राजतन्त्र बाधक थियो । राजतन्त्र हटाउन भारतले नेपालमा सशस्त्र सङ्घर्ष गरिरहेको माओवादीलाई भरपर्दो मित्र ठान्यो । संसद्को सबभन्दा ठूलो दल नेकाले नचाहेसम्म गणतन्त्र घोषणा सम्भव थिएन । सात दलको आन्दोलनको प्रमुख नेतृत्वमा रहेका गिरिजाप्रसाद कोइरालालाई पहिलो राष्ट्रपति बनाउने प्रचण्डले ‘आश्वासन’ दिए । भारतको चाहना र गिरिजाको पहिलो राष्ट्रपति बन्ने सपनाको परिणामस्वरूप नेका केन्द्रीय कार्य समितिले आफ्नो विधानमा संवैधानिक राजतन्त्रको सट्टा गणतन्त्र भनी संशोधन ग¥यो ।
गिरिजाप्रसाद कोइराला गणतन्त्र नेपालको प्रथम राष्ट्रपति बन्ने आशामा २०६४ सालमा सम्पन्न संविधानसभा निर्वाचनमा प्रत्यक्षतर्फ चुनावसमेत लडेनन् । उनले उम्मेदवारी दिएको भए धेरै ठाउँबाट जित्न सक्ने हैसियत थियो । उनी समानुपातिकबाटै संविधानसभामा पुगे । देशभरबाट जब प्रत्यक्षतर्फ माओवादीले झन्डै बहुमत स्थान जित हासिल ग¥यो, त्यसपछि गिरिजालाई राष्ट्रपति बन्न भारतले रोकेको भन्ने राजनीतिका चतुर खेलाडी गिरिजाले नबुझ्ने कुरै भएन । नारायणहिटी दरबार सङ्ग्रहालय उद्घाटनका दिन उनले सबै उच्चपदस्थ पदाधिकारीहरूबीच औपचारिकरूपमै बोले — “म कसैसँग डराउँदिनँ । भारतसँग पनि झुक्दिनँ ।” त्यसबेला उपस्थित सबै आश्चर्यमा परे । राष्ट्रपति निर्वाचनको चर्चा चलिरहेको बेला सरकार प्रमुखबाट त्यस्तो अभिव्यक्ति आउनु निश्चय पनि सबैको निम्ति अनौठो थियो ।
यस घटनाको यथार्थ सार्वजनिक गरिदिएका छन् — पूर्व परराष्ट्रमन्त्री रमेशनाथ पाण्डेले । उनी र प्रचण्डबीच संविधानसभा निर्वाचनपछि २०६५ साउन २० गते भेट भयो । भेटकै समयमा तत्कालीन नेपालको लागि भारतीय राजदूत राकेश सुद आएको र उनलाई अर्को कोठामा राखेर प्रचण्डले सुदलाई भेटेको बताएका छन् । सुदसँगको भेटपछि प्रचण्डले पाण्डेलाई भने — “नेपाली काङ्ग्रेस कुरै बुझ्दैन, भारत गिरिजालाई राष्ट्रपति बनाउन चाहँदैन । अहिले पनि सुदले गिरिजाको नामसम्म लिएन । काङ्ग्रेसले मधेसकै नेताको नाम दिन्छ, त्यसैलाई सर्वसम्मतिबाट राष्ट्रपति बनाऊ भन्दै थियो । मैले ‘नाम भन न भन्दा समय आएपछि भन्छु’ भन्यो । नामै थाहा नभएको बारे के कुरा गर्ने भन्दा अनि त धम्की दिन थाल्यो — ‘भनेको मानेनौ भने तिमीसँग भारतले काम गर्न सक्दैन ।” (क्रान्ति र प्रतिक्रान्ति, पेज – १६)
त्यसपछि तराईका रामराजाप्रसाद सिंहलाई राष्ट्रपतिको उम्मेदवार बनाइयो । नेकाको तर्फबाट रामवरण यादव उम्मेदवार बने । नेमकिपाले यादवको पक्षमा मतदान ग¥यो । नेमकिपाको मतले यादव राष्ट्रपति निर्वाचित भए । त्यो भारतको लागि गतिलो जवाफ थियो । माओवादीहरू त्यसबेला नेमकिपाप्रति निकै आक्रामकरूपमा प्रस्तुत भए । देशघातीहरू रिसाए पनि समयले नेमकिपाको कदम सही साबित भएको छ ।
भारतले नेपालको राजनीतिमा लामो समयदेखि सूक्ष्मरूपमा हेर्दै छ । आफ्नो अनुकूलको सरकार बनाउन ऊ जहिले पनि प्रयासरत हुन्छ । माओवादीले सरकारलाई दिएको समर्थन फिर्ता लिने बित्तिकै वा केपी ओलीले राजीनामा दिने बित्तिकै सरकार गठनको साँचो जनता समाजवादी पार्टीको हातमा जानेछ । यो परिस्थिति उत्पन्न हुने बित्तिकै सबैभन्दा बढी भारत खुशी हुनेछ । किनभने महन्थ ठाकुर, राजेन्द्र महतो, बाबुराम भट्टराई, उपेन्द्र यादव लगायत उसका प्यादाहरू नेपालको राजनीतिको निर्णायक विन्दुमा पुग्नेछन् ।
भारत नेपालमा कुनै बलियो सरकार चाहँदैन । बलियो सरकारले भारतको चाहनामा बाधा पु¥याउन सक्छ भन्ने उसलाई राम्रै थाहा छ । लिम्पियाधुरा, लिपुलेक र कालापानीको नक्सा सार्वजनिक गर्न दुईतिहाइको ओली नेतृत्वको सरकार भएर सम्भव भयो । मिलिजुली सरकार भए त्यो कदापि सम्भव हुन्थेन । नेकपाको विभाजन हुनु नै थियो, त्यो सर्वोच्चले गराइदियो । विभाजनको रूप जेसुकै भएपनि सार भने भारतको चाहनामा भएको घामजत्तिकै छर्लङ्ग छ । विभाजनको सबैभन्दा नराम्रो असर कसैलाई परेको छ भने त्यो माधव नेपाललाई प¥यो ।
प्रचण्ड आफ्नो बाटोमा एकदमै प्रस्ट छन् । उनले भारतको लागि ओलीको विकल्पमा बन्ने सरकार ‘कम्फरटेबल’ हुने सार्वजनिकरूपमा बोलेकै छन् । अझै ‘कान्तिपुर’ का सुधीर शर्मासँगको अन्तर्वार्तामा पार्टी भत्काउँदै हिँड्ने आफ्नो बानी नै परेको बताएका थिए र ‘अब नेकपा भत्काउने पालो’ भनेर खुला उद्घोष गरेकै थिए । त्यस्ता नेताबाट नेकपा विघटन हुनु के आश्चर्यको विषय भयो र ? उनका पछाडि दौडने ‘हनुमानहरू’प्रति दया लाग्छ, जो स्पष्ट बिगार्ने, भत्काउने भनेर सार्वजनिकरूपमा बोल्दै हिँड्दा पनि बुझ्दैनन् ।
राजनैतिक अस्थिरता नेपालको नियति नै बनेको छ । २०१७ सालमा बीपी कोइराला नेतृत्वको सरकारले दुईतिहाइ बहुमत प्राप्त ग¥यो, दुई वर्ष नहँुदै त्यो समाप्त भयो । त्यसपछि संसदीय प्रणालीअन्तर्गत बनेका कुनै पनि सरकारले पूरा अवधि काम गर्न पाएन । यसको प्रमुख कारण नेपालको राजनीतिमा निरन्तर भारतीय हस्तक्षेप नै हो ।
आफ्नो हातमा सरकार गठनको साँचो आउने पक्का भएपछि जसपाका नेताहरू संविधान संशोधनको मागलाई अगाडि सार्दै छन् । उनीहरू ‘उधारो होइन नगदै’ भनेर नागरिकता लगायतको विषयमा संशोधनको सुनिश्चितता खोज्दै छन् । त्यसैले जसपाका नेताहरू आफ्नो हितलाई ध्यानमा राखेर ओली सरकार वा त्यसको विकल्पमा गठन हुने सरकार दुवैमा समर्थन गर्न सक्ने भाषा बोल्दै छन् । भन्ने चलन छ ‘मान्छे दोमनले बिग्रिन्छ, पशु एकोहोरोले ।’ अहिले नेकपा विभाजन भएजस्तै नयाँ सरकार गठनको प्रक्रियासँगै जसपाले पनि त्यही नियति भोग्नु नपर्ला भन्न सकिन्न ।
सरकार जनताको निम्ति हो, जनताको सुखदुःखप्रति सरकारको ध्यान जानुपथ्र्यो तर शासक दलहरूको प्राथमिकतामा देश र जनता कहिल्यै परेनन् । भारतमा दैनिकजसो कोरोना सङ्क्रमितहरूको सङ्ख्या तीव्र गतिमा वृद्धि भइरहेको छ । एकैदिन ८१ हजारसम्म कोरोना सङ्क्रमित पुष्टि भएको र एक हप्तामा १ हजार २ सत्र्न्दा बढीको ज्यान गएको समाचार सार्वजनिक भएको छ । तर, शासक दलहरू सरकार गिराउनेटिकाउने खेलमा व्यस्त छन् । कोरोनाको भयावह स्थितिमा सीमा नाकामा कडाइ गर्नेतर्फ सरकारले ध्यान दिएको छैन । कन्चनपुर, कैलाली, रूपन्देही लगायतका खुला सीमानाका हुँदै दैनिक हजारौँ नागरिक भारतबाट फर्केका र त्यसको न्यूनमात्रै परीक्षण हुने गरेको पाइएको छ । कोरोनाको दोस्रो लहर अत्यन्तै भयावह हुन सक्ने स्वास्थ्य विज्ञहरूको भनाइलाई शासक दलहरूले बेवास्ता गर्दै छन् ।
फ्रान्स, ब्राजिल, संरा अमेरिका, बेलायतजस्ता विकसित देशहरूले व्यापक सङ्क्रमण फैलिनुका साथै मृत्युदर बढ्दै गएको कुरालाई ध्यानमा राखेर पुनः लकडाउन सुरु गरेका छन् । के हाम्रा शासक दलहरूले ती देशबाट शिक्षा लिनुपर्दैन ? न हामीसँग पर्याप्त अस्पताल छ, न क्वारेन्टिन वा आइसोलेसनकै व्यवस्था छ । अरू देशमा फैलिएजस्तै अब पश्चिम नेपाल दोस्रो लहरको कोरोनाको केन्द्र बन्दै छ । शासक दलहरूको ध्यान सत्ता गिराउने र टिकाउनेभन्दा कोरोना नियन्त्रणमा जानु आवश्यक छ । जनतालाई स्वास्थ्य सङ्कट पर्दा केही नगर्ने शासक दलहरूले समयमै चिन्तन गर्ने जनताको अपेक्षा छ ।
Leave a Reply