भेनेजुयला अमेरिकी आक्रमणको खतरामा राष्ट्रपति मादुरो आपत्काल घोषणा गर्न तयार

काराकास, १४ असोज (एएफपी) । भेनेजुयलाका राष्ट्रपति निकोलस मादुरोले सोमबार अमेरिकी ‘आक्रमण’ को खतरालाई लिएर आपत्काल घोषणा गर्न तयार रहेको बताउनुभएको छ ।
राष्ट्रपति मादुरोले टेलिभिजन सम्बोधनमा भन्नुभयो, “आज परामर्श प्रक्रिया सुरु भयो… अमेरिकी साम्राज्यले भेनेजुयलामाथि आक्रमण गरे भने संविधानअनुसार आपत्काल घोषणा गर्न र हाम्रा जनता, हाम्रो शान्ति र स्थिरताको रक्षा गर्न तयार छौँ ।”
अघिल्लो दिन उपराष्ट्रपति डेल्सी रोड्रिगेजले विदेशी कूटनीतिज्ञहरूलाई राष्ट्रपति मादुरोले अमेरिकाले ‘हाम्रो मातृभूमिमा आक्रमण गर्ने हिम्मत गरेमा’ रक्षा र सुरक्षा मामिलामा विशेष अधिकार प्रयोग गर्न दस्ताबेज तयार भएको बताउनुभएको थियो । तर, अहिलेसम्म राष्ट्रपति मादुरोले हस्ताक्षर गर्नुभएको छैन ।
सरकारी स्रोतका अनुसार सबै कुरा तयार छ र राष्ट्रपतिले कुनै पनि समयमा आदेश दिन सक्नुहुन्छ भन्ने देखाउन कागजात प्रस्तुत गरिएको छ ।
बोलिभारियाली गणतन्त्रका नेता मादुरोले आफ्नो देशको तटनजिकै अमेरिकी सैन्य तैनाथीलाई लिएर उच्च सतर्कता अपनाउनुभएको छ । अमेरिकी राष्ट्रपति डोनाल्ड ट्रम्पले लागुऔषध तस्करी नियन्त्रणका लागि दक्षिणी क्यारिबियनमा आठवटा युद्धपोत र आणविक–सञ्चालित पनडुब्बी तैनाथ गर्नुभएको छ, जसले राष्ट्रपति मादुरोलाई दबाब दिने उद्देश्य राखेको देखिन्छ ।
अमेरिकी सेनाले हालैका हप्ताहरूमा कम्तीमा तीन संदिग्ध लागुऔषध डुङ्गाहरू नष्ट गरेको छ, जसमा १४ जनाको मृत्यु भएको संयुक्त राष्ट्रसङ्घका विज्ञहरूले ‘गैरन्यायिक मृत्युदण्ड’ भनेर निन्दा गरेका छन् ।
अमेरिकी सैन्य अधिकारीहरूले भेनेजुयलाको सीमाभित्र लागुऔषध तस्करलाई लक्षित गर्ने विकल्पहरू तयार गरिरहेको अमेरिकी समाचार आउटलेट एनबीसीले चार स्रोत उद्धृत गर्दै रिपोर्ट गरेको छ ।
आपत्कालीन अवस्था घोषणा गर्नाले मादुरोलाई गत वर्ष विवादित पुनः चुनावपछि अन्तर्राष्ट्रिय मान्यता नपाएका भेनेजुयाली जनताको अधिकार अस्थायी रूपमा निलम्बन गर्ने अनुमति मिल्नेछ ।
रोड्रिगेजले अमेरिकी आक्रमणको अवस्थामा भेनेजुयालीहरू मादुरोको पछाडि एकजुट हुनेछन् भन्ने विश्वास व्यक्त गर्नुभयो । “भेनेजुयला हाम्रो देशको रक्षामा एकताबद्ध छ । हामी आफ्नो मातृभूमि कहिल्यै आत्मसमर्पण गर्ने छैनौँ”, उहाँले भन्नुभयो ।
राष्ट्रपति मादुरोले संयुक्त राष्ट्रसङ्घका महासचिव एन्टोनियो गुटेरेससँगको निजी कुराकानीमा पनि ‘राम्रो प्रतिक्रिया’ पाएको दाबी गर्नुभयो ।
उहाँले भन्नुभयो, “गुटेरेसले अभूतपूर्व अडान र असाधारण साहसमा आश्चर्य व्यक्त गर्नुभयो, जुन लगभग सात हप्तासम्म शान्तिपूर्ण देश भेनेजुयलाविरुद्ध ट्रम्प प्रशासनले सैनिक कारबाहीको घोषणा र सुरु भएको थियो ।”