“कामदारवर्गलाई उठाउने विचार हरेक युगमा नयाँ हो”

पार्टीका श्रद्धेय अध्यक्ष नारायणमान बिजुक्छेँ (रोहित) ले भन्नुभएको छ, “देश र जनताको सेवाबाहेक हाम्रो कुनै स्वार्थ छैन । हामी अन्तिम दमसम्म इमानदारीपूर्वक देशको निम्ति लड्छौँ ।” यो केबल भनाइ होइन पार्टीको व्यवहार र आदर्श हो । नेमकिपाको इतिहास सेवाको इतिहास, सङ्घर्षको इतिहास र समर्पणको इतिहास हो । औपचारिक रूपमा स्थापनाको ५२ वर्ष भयो । यहाँ २०१५ सालदेखि किसान सङ्घर्ष अघि बढ्यो । किसानहरूको राजनीतिक स्तर उकास्न, शैक्षिक स्तर उठाउन र जीवनस्तर उठाउन भएका प्रयासहरू पार्टी स्थापनाका पृष्ठभूमि थिए । नेमकिपाले भ्रष्टाचारी र सहकारी ठगहरूलाई उहिल्यै पाटा कसेको थियो । सुस्तामा भारतले सीमा अतिक्रमण गर्दा पहिलोपटक भारतीय विस्तारवादको आवाज उठाउने पार्टी नेमकिपामात्र थियो । आज पनि दक्षिणी सिमानामा अतिक्रमण उस्तै छ । देशको अर्थतन्त्र, सम्पत्ति, खोलानाला, कलकारखाना भारतलाई सुम्पने शासक दलसँग पनि हामीले लामो सङ्घर्ष ग¥यौँ । नेमकिपाको इतिहास दक्षिण एसियामा भारतीय एकाधिकार पुँजीविरोधी सङ्घर्षको इतिहास हो । भारतीय विस्तारवादविरोधी सङ्घर्षको इतिहास जारी छ ।
संरा अमेरिकी साम्राज्यवाद भन्ने कुनै पार्टी नेपालमा छ भने त्यो नेमकिपा हो । हामी जान्दछौँ साम्राज्यवाद क्रूर हुन्छ । स–साना देश सिध्याउँछु भन्दै छन् ट्रम्प । हिजो भियतनाम दुख्दा हामीलाई दुख्यो, आज भेनेजुयला दुख्दा हामीलाई पनि दुखिरहेको छ । संसारको कुनै पनि कुनामा साम्राज्यवादी युद्ध हामीलाई मञ्जुर भएन र हुँदैन । यसर्थ, नेमकिपाको इतिहास साम्राज्यवादविरोधी सङ्घर्षको इतिहास पनि हो । आज साम्राज्यवादी शक्तिले नेपालमा पनि उपद्रो गर्दै छ । हामीले एमसीसीको विरोध त्यसै गरेका थिएनौँ । एसपीपी चाहिँदैन त्यसै भनेका थिएनौँँ । भदौ २३ र २४ गतेको उपद्रो, ध्वंश वा विध्वंश त्यसैको परिणाम थियो भन्ने पुष्टि हुँदै छ । लामो समयदेखि अमेरिकी संस्था NED/IRI मार्फत नयाँ पुस्तालाई प्रयोग गरी त्यसको तयारी गरेको रहेछ भन्ने खुलासा भयो । देशको झन्डालाई नकान बनाई देश जलाएको क्षम्य हुँदैन । त्यो अपराध हो । सरल भाषामा आजभोलि नयाँ भन्दै साम्राज्यवादका एजेन्ट आउँदै छन् । साम्राज्यवादी शक्तिले पुरानो घोडा थाकेपछि नयाँ घोडा फरेको छ ।
हामीलाई नेमकिपाले विदेशको मात्र कुरा गर्छ भन्ने आरोप लाग्ने गर्छ । अरुको घरमा चोर पस्दा बोलेनौँ भने हाम्रो घरमा चोर पस्दा कसले बोल्ने ? नेमकिपा संसारको कुनै पनि कुनामा भएको अन्याय, युद्ध र हमलाको विरोध गर्छ । नेपाललाई नेपाली लेण्डुप दोर्जे र जेलेन्स्कीहरूबाट जोगाउन लडिरहने पार्टी नै नेमकिपा हो ।
नेमकिपाको परिचय सिद्धान्त निष्ठता, राजनीतिक संस्कार, राजनीतिक नैतिकता, देशभक्ति भावना र इमानदारी हो । त्यसकारण, सत्ताको भागबन्डामा कहिल्यै अल्मलिएन; हल्ला गरी जनता झुक्याएन, बेइमानी गरेन, अपराध गरेन, पैसा बाँडेर चुनाव जितेन र विदेशी नुन खाएन । विद्रोही रामले लेख्नुभयो,
“यदि हल्लाको हैन सिद्धान्तको राजनीति हुन्छ भने साँच्चै
भक्तपुर यस्तो उज्यालो हो जहाँ सत्ता आउँछ जान्छ
तर इमानको ढुङ्गा हल्लिँदैन ।”
नेमकिपाको राजनीति विचारको राजनीति, सेवाको राजनीति र कामदार वर्गीय जनताको उत्थानको राजनीति हो । भक्तपुर माक्र्सवादी विचारको मौलिक प्रयोग भएको ठाउँ या टेस्टट्युब हो । आज यहाँ विकासको मौलिक मोडल हेर्न, सुशासन हेर्न देशैभरिका मानिस आउँछन् । ‘जनताप्रधान’ विकासको मोडल भनी प्रशंसा गर्छन् विज्ञहरू । यहाँ हजारौँ वर्ष पुरानो सभ्यता छ, त्यो सभ्यताको पुनर्जागरण छ । सयौँ वर्ष पुराना कला र सम्पदा छन् । त्यसको सुरक्षा छ, निर्माण तथा पुनर्निर्माण छ । सभ्यताको त्यो पुनर्जागरण नयाँ विचार हो । त्यो पुनः निर्माण नयाँ विचार हो । इतिहासका वैभवको सुरक्षा नयाँ विचार हो । देशको सम्पत्ति जलाउने, इतिहास जलाउनेहरू नयाँ हुनसक्दैनन् । यहाँको हकमा ङातापोल्हँ, पचपन्नझ्याले दरबार हरेक पुस्ताका लागि नयाँ हुन् । कामदारवर्गलाई उठाउने विचार हरेक युगमा नयाँ हो ।
आज भक्तपुर एसियाकै सफा सहरमध्ये एक हो । पर्यटकहरू यही भन्छन् । हिजो यस्तो थिएन । ‘उपत्यकाको शौचालय’ भनिन्थ्यो । यो ठाउँ मानिस बस्नलायक नभई धेरैले ठाउँ नै छोडेको कथा पनि छ । आज यति सफा किन छ ? नेमकिपाको सफाइ आन्दोलनको परिणाम ¤ यहाँ अग्रज पुस्ताका जनप्रतिनिधि, वडाध्यक्षहरूसमेत टोल–टोल, गल्ली–गल्लीमा सरसफाइमा जुटेको इतिहास छ । गाउँ ठाउँमात्र होइन धुलो कसिङ्गर लागेको नेपालको कम्युनिस्ट आन्दोलनमा पनि नेमकिपाले विचारको कुचो चलायो ।
आज भक्तपुर देशकै शैक्षिक गन्तव्यको रूपमा परिचित छ । ज्ञान विज्ञानको केन्द्रको रूपमा विकास हुँदै छ । शिक्षाको गुणस्तर निकै कमसल थियो । पार्टीका अग्रजहरूले प्रौढ कक्षा, रात्रि कक्षा चलाउनुभयो र विद्यालय खोल्नुभयो । शैक्षिक जागरण ल्याउनुभयो । ‘एक घर एक स्नातक’ को अभियान चलाइयो । छोरीहरूलाई बढी पढाउनुपर्छ भनी चेतना दिइयो । शिक्षाले आफ्नो खुट्टामा उभिने बनाउँछ । आज हाम्रो नर्सिङ कलेजबाट दीक्षित ७००–८०० नर्सहरू देशका विभिन्न ठाउँमा सेवा गर्दै छन् । ८–९ हजार दक्ष इन्जिनियर तयार भए । ख्वप स्कूल र कलेजबाट १० औँ हजार विद्यार्थीले शिक्षा पाए । यहाँ आज अब्बल स्कूलहरू छन् । ७७ जिल्लाकै विद्यार्थी अध्ययन गर्छन् । नेमकिपाको विचारले आज भक्तपुरले शिक्षा क्षेत्रमा देशकै सेवा ग¥यो । विश्वविद्यालयको सपना भक्तपुरका जनताको हो ।
एउटा आदर्श समाज निर्माणको निम्ति काम गरिरहेको छ । अहिले त स्वदेशमै राम्रो रोजगारीको बन्दोबस्त हुने व्यक्तित्व विकासमा समान अवसर, योग्यताअनुसार काम र कामअनुसार ज्याला, उत्पादनका साधनहरू सामाजिकीकरण हुने समाज निर्माण हुँदै छ । कामदारवर्गलाई नहेर्ने यो व्यवस्था बदल्न जुटिरहेको छ ।
(उक्त विचार नेमकिपाका केन्द्रीय सदस्य सृजना सैंजूले नेमकिपा भनपा वडा नं. १० द्वारा माघ २४ गते आयोजित पार्टीको ५२ औँ स्थापना दिवसको अवसरमा प्रगतिशील गीत प्रतियोगितामा व्यक्त गर्नुभएको मन्तव्यको सार)