खासोग्गी हत्याका दोषीलाई साउदीमै कारबाही गरिने

मानामा, २८ अक्टोबर । साउदी अरबका विदेशमन्त्री अब्देल अल जुबेरले शनिबार साउदी पत्रकार जमाल खासोग्गीको हत्याको अभियोगमा गिरफ्तार गरिएका १८ जना अभियुक्तहरूलाई साउदी अरबभित्रै कानुनी कारबाही गरिने बताएका छन् ।
टर्कीले हत्याको आरोपमा गिरफ्तार गरिएको १८ जना अभियुक्तलाई आफ्नो देशमा सुपुर्दगी गर्न माग गरेको भोलि बहराइनमा आयोजित एक क्षेत्रीय सुरक्षा सम्मेलनमा बोल्दै विदेशमन्त्रीले यस्तो भनाइ सार्वजनिक गरेका हुन् । “जहाँसम्म सुपुर्दगीको विषय छ, ती व्यक्तिहरू साउदी नागरिकहरू हुन् । उनीहरूलाई साउदी अरबमै कारागारमा राखिएको छ र साउदी

अरबले नै उनीहरूमाथि अनुसन्धान गर्नेछ । आवश्यक कारबाही पनि साउदी अरबमै गरिनेछ ।” विदेशमन्त्रीले भने ।
साउदी मन्त्रीले खासोग्गीको हत्याका दोषीलाई कानुनी कारबाहीको दायरामा ल्याउने वचनबद्धता व्यक्त गरे । “हामी घटनामा जिम्मेवार मानिसहरूलाई पक्राउ गर्नेछौं र जो त्यसको लागि दोषी छन्, कारबाही पनि गर्छौं । यस्ता घटना आगामी दिनमा नदोहोरियोस् भनी हामी हाम्रो संरचनामा आवश्यक सुधार पनि गर्नेछौं ।” उनले भने । वाशिङ्टन पोस्टका स्तम्भकार पत्रकार खासोग्गी साउदी सरकारका आलोचक थिए । उनी अक्टोबर २ मा आफ्नो व्यक्तिगत काम विशेषले टर्कीको इस्तानबुल सहरस्थित महावाणिज्य दूतावासभित्र जाँदा साउदी अरबका अधिकारीहरूले हत्या गरेका थिए ।