हाथरस सामूहिक बलात्कार: दलित युवतीको जिब्रो काटियो, कम्मर तोडियो, उपचारको क्रममा मृत्यु, दिल्लीमा प्रदर्शन

नयाँदिल्ली, १५ असोज । सामूहिक बलात्कारमा परेकी उत्तर प्रदेशको हाथरस जिल्लाकी एक युवतीको उपचारको क्रममा मृत्यु भएको छ । परिवारका सदस्यका अनुसार २० वर्षीया उनी जिब्रो काटिएको र कम्मरको हाड भाँचिएर बेहोस अवस्थामा फेला परेकी थिइन् ।
उनको मङ्गलबार राती दिल्लीको सफदरजङ्ग अस्पतालमा उपचारको क्रममा मृत्यु भएको बीबीसी हिन्दीले जनाएको छ । पीडितलाई सोमबार अलीगढ मुस्लिम युनिभर्सिटी मेडिकल कलेजबाट सफदरजङ्ग अस्पताल ल्याइएको थियो । पछिल्लो दुई हप्तादेखि उनी मृत्युसँग लडिरहेकी थिइन् ।
हाथरस पुलिसले घटनाका चारै जना अभियुक्तलाई गिरफ्तार गरेर हिरासतमा लिएको बताइएको छ ।
१४ सेप्टेम्बरमा आमा र भाइसँग खेतमा घाँस काट्न गएका बेला उनको चार जनाले सामूहिक बलात्कार गरेको परिवारका सदस्यले बताएका छन् । पीडितका भाइले भनेका छन्, ‘दिदी, आमा र दाइ घाँस काट्न गएका थिए । भाइ घाँस लिएर पहिल्यै घर फर्कियो । आमा अगाडि घाँस काटिरहेकी थिइन्, दिदी अलि पछाडि थिइन् । दिदीलाई तानेर उनीहरूले बलात्कार गरे । बेहोस अवस्था आमाले फेला पारिन् ।’ बलात्कारीले उनीमाथि निर्मम कुटपिट गरेका थिए । म¥यो भनेर छोडेर गएका थिए ।
पीडित युवतीलाई बेहोस अवस्थामा सुरुमा स्थानीय सामुदायिक स्वास्थ्य केन्द्रमा लगियो । त्यहाँबाट अलीगढ मेडिकल कलेजमा रेफर गरियो । मेडिकल कलेजमा १३ दिनसम्म भेन्टिलेटरमा राखेर उपचार गरियो । सोमबार थप उपचारका लागि सफदरजङ्ग अस्पताल लगियो । जहाँ उनले अन्तिम श्वास लिइन् ।
पीडितका भाइले भनेका छन्, “दिदीको जिब्रो काटिएको थियो । कम्मरको हड्डी भाँचिएको थियो । शरीरको एक भाग काम गरिरहेको थिएन । बोल्न सकिरहेकी थिइन् । कुनै प्रकारको इशारामात्र गरिरहेकी थिइन् ।”
सामूहिक बलात्कारको आरोप गाउँको उच्च जातिका चार जनामाथि लागेको छ । प्रहरीले चारै जनालाई नियन्त्रणमा लिएको छ ।

हाथरसका एसपी विक्रांत वीरले चारै अभियुक्तलाई गिरफ्तार गरेर हिरासत पठाइएको बताए । अदालतसँग फास्ट ट्रयाक सुनवाइको माग गर्ने उनको भनाइ छ । पीडित परिवारलाई गाउँमा सुरक्षा पनि दिइएको एसपी वीरले जानकारी दिएका छन् ।
जबरजस्ती जलाइयो शव
परिवारजन र गाउँलेको चर्को विरोधका बीच पीडितको मङ्गलबार अबेर राती अन्तिम संस्कार गरिएको छ । दिल्लीबाट पीडितको शव मध्यराति हाथरस ल्याइएको थियो । गाउँलेको विरोधका बीच पुलिसले बल प्रयोग गरेर पीडितको अन्तिम संस्कार गरेको हो । पुलिससँग गाउँलेको धकेलाधकेल भएको थियो । न्यायको माग गर्दै पीडित परिवारले दाहसंस्कार गर्न मानेका थिएनन् ।
पीडित परिवारले प्रहरीमाथि लापरबाहीको आरोप लगाएको छ । उजुरीका लागि १० दिनसम्म कुराएको, विरोध प्रदर्शनपछि मात्रै दर्ता भएको, एम्बुलेन्ससमेत सहयोग नगरेको भाइको गुनासो छ ।
पीडितको न्यायको लागि आजाद समाज पार्टीका नेता चन्द्रशेखरको नेतृत्वमा दिल्लीस्थित सफदरजङ्ग अस्पताल परिसरमा प्रदर्शन भएको छ । उनीहरू धर्नामै बसेका थिए । चन्द्रशेखरलाई प्रहरीले नियन्त्रणमा लिएको छ ।
घटनाको विरोधमा भारतका विभिन्न स्थानमा प्रदर्शन भइरहेको छ । कलाकारदेखि आम नागरिकले अभियुक्तलाई फाँसीको माग गरेका छन् ।