अमेरिकी बैङ्कका कर्मचारीलाई ‘आपराधिक अभियोगमा’ चीन छोड्न प्रतिबन्ध

पेइचिङ, ५ साउन (एएफपी) । साङ्घाइमा जन्मिएका अमेरिकी बैङ्क वेल्स फार्गोका प्रबन्ध निर्देशक चेन्यु माओलाई बहिर्गमनमा प्रतिबन्ध लगाइएको समाचार गत हप्ता सार्वजनिक भएपछि पेइचिङले यसको सोमबार पुष्टि गरेको छ ।
विभिन्न सञ्चारमाध्यममा आएका समाचारपछि वेल्स फार्गोले गत हप्ता एटलान्टाका माओलाई सहयोग गरिरहेको पुष्टि गरेको थियो ।
चिनियाँ विदेश मन्त्रालयका प्रवक्ता गुओ जियाकुनले सोमबार माओ ‘चिनियाँ अधिकारीहरूले अनुसन्धान गरिरहेको एउटा आपराधिक मुद्दामा संलग्न रहेको’ बताउनुभयो ।
गुओले भन्नुभयो, “चिनियाँ कानुन प्रवर्तन निकायहरूले चिनियाँ कानुनअनुसार माओलाई बाहिर निस्कन प्रतिबन्ध लगाएका छन् ।”
उहाँले आरोपित माओको कथित अपराधको विवरण दिनुभएन । वेल्स फार्गोले पनि उहाँको मुद्दाको बारेमा थप जानकारी दिएको छैन । सान फ्रान्सिस्कोस्थित बैङ्कले यस घटनापछि आफ्ना कर्मचारीलाई चीन भ्रमणमा प्रतिबन्ध लगाएको छ ।
एएफपीले शुक्रबार दिएको एक विज्ञप्तिमा भनिएको छ, “हामीले यस स्थितिलाई नजिकबाट नियालिरहेका छौँ र हाम्रा कर्मचारीहरू जतिसक्दो चाँडो संयुक्त राज्य अमेरिका फर्कन सकून् भनी उपयुक्त च्यानलहरूमार्फत काम गरिरहेका छौँ ।”
‘मुद्दा चलिरहेकै बेला माओले देश छोड्न सक्नुहुन्न र अनुसन्धानकर्ताको काममा सहयोग गर्नु उहाँको दायित्व’ भएको गुओले बताउनुभयो ।
उहाँले यो ‘व्यक्तिगत मामला’ भएको र चीनले ‘हरेक देशका नागरिकलाई यहाँ यात्रा गर्न र व्यापार गर्न सधैँजस्तै निरन्तरता दिने’ बताउनुभयो ।
उहाँले भन्नुभयो, “कोही व्यक्ति चिनियाँ होस् वा नहोस्, चीनमा रहँदा चिनियाँ कानुनको पालना गर्नैपर्छ ।”
हिरासत र तनाव
विशेषगरी, यो प्रवृत्ति पेइचिङ र केही पश्चिमी राष्ट्रहरू (संयुक्त राज्य अमेरिका र क्षेत्रीय प्रतिस्पर्धी) बिच बढ्दो तनावसँग मेल खान्छ ।
नाम नखुलाइएका चार स्रोतलाई उद्धृत गर्दै वासिङटन पोस्टले आइतबार अमेरिकी वाणिज्य विभागका एक कर्मचारीले भिसा आवेदनमा अमेरिकी सरकारका लागि काम गरेको घोषणा गर्न नसकेपछि चीन छोड्नबाट रोकेको उल्लेख गरेको छ ।
पेटेन्ट एन्ड ट्रेडमार्क अफिसमा काम गर्ने नाम नखुलाइएका ती चिनियाँ अमेरिकी व्यक्ति केही महिनाअघि परिवार भेट्न चीन गएको बताइएको छ ।
सोमबार रिपोर्टको बारेमा सोधिएको प्रश्नमा गुओले आफू यस मामिलासँग परिचित नभएको बताउनुभयो ।
बुधबार चीनको एक अदालतले औषधि कम्पनी एस्टेलासका एक जापानी व्यापारीलाई जासुसी गरेको आरोपमा साढे तीन वर्षको जेल सजाय सुनाएको छ ।
अर्को औषधि कम्पनी एस्ट्राजेनेकाले गत नोभेम्बरमा आफ्नो चिनियाँ अपरेसनका प्रमुख लियोन वाङलाई पक्राउ गरिएको बताएको थियो । वाल स्ट्रिट जर्नलका अनुसार सन् २०२३ मा अमेरिकी जोखिम परामर्श फर्म क्रोलका एक वरिष्ठ कार्यकारीलाई चीन छोड्न प्रतिबन्ध लगाइएको थियो ।