युद्ध अन्त्य र रोकिएको सम्पत्ति फुकुवा गर्न इरानको अमेरिकासँग माग

तेहरान, २८ वैशाख (एएफपी) । इरानले यस क्षेत्रमा युद्ध अन्त्य गर्न र विदेशमा रोक्का गरिएको सम्पत्तिलाई फुकुवा गर्न आह्वान गरेको छ ।
इरानको विदेश मन्त्रालयका प्रवक्ता इस्माइल बकाईले भन्नुभयो, “हामीले कुनै छुटको माग गरेका छैनौँ । हामीले इरानको वैधानिक अधिकारका लागि मात्र माग गरेका छौँ ।”
उहाँले इरानको मागमा ‘यस क्षेत्रमा युद्ध अन्त्य गर्नुपर्ने, अमेरिकी नौसैनिक नाकाबन्दी अन्त्य गर्नुपर्ने’ र ‘वर्षौंदेखि विदेशी बैङ्कमा अन्यायपूर्वक फसेको इरानी जनताको सम्पत्ति रिहाइ’ समावेश रहेको बताउनुभयो ।
अमेरिकी राष्ट्रपति डोनाल्ड ट्रम्पले युद्ध अन्त्य गर्ने अमेरिकी प्रस्तावमाथि इरानले दिएको प्रतिक्रियालाई अस्वीकार गरेका थिए ।
बकाईले खाडीमा जारी तनावलाई औँल्याउँदै भन्नुभयो, “तेहरानले युरोपेली देशहरूलाई कसैलाई पनि फाइदा नहुने सङ्कटमा संलग्न नहुन चेतावनी दिएको छ ।
उहाँले भन्नुभयो, “स्ट्रेट अफ हर्मुज’मा कुनै पनि प्रकारको हस्तक्षेपले स्थितिलाई थप जटिल बनाउनेछ ।”
बेलायत र फ्रान्सले स्ट्रेट अफ हर्मुज सुरक्षित गर्न अन्तर्राष्ट्रिय गठबन्धन बनाउने प्रयासको नेतृत्व गरिरहेका छन् । तर, यो अमेरिका र इरानबिच शान्ति सम्झौता भएपछि मात्र हुने बताइएको छ ।
सोमबार पत्रकारहरूसँगको कुराकानीको क्रममा बकाईले खाडीमा कथित तेल चुहावटको दाबीलाई अस्वीकार गरेपछि भू–उपग्रह लिइएका तस्बिरहरूमा इरानको खार्ग टापुको तटमा तेलको थोपा फैलिएको देखिएको थियो ।
उहाँले भन्नुभयो, “तेलको चुहावट र यस्तै मामिलाहरूको बारेमा गरिएका दाबीहरू पूर्ण रूपमा मनगढन्ते पुष्टि भएका छन् ।”
उहाँले खाडीमा देखिएको सम्पूर्ण समस्याका लागि अमेरिकी उपस्थितिलाई दोष दिँदै अगाडि भन्नुभयो, “तेहरान खाडीमा ‘वातावरणीय क्षतिको बारेमा धेरै चिन्तित छ’ ।”