फोहोरमैला प्रशोधन केन्द्रको व्यवस्थापनबारे भक्तपुर नगरपालिका र चाँगुनारायण नगरपालिकाबिच सहमति

भक्तपुर, ५ साउन । भक्तपुर नगरपालिका वडा नं. १० सिलखेस्थित फोहोर प्रशोधन केन्द्रको व्यवस्थापनसँग सम्बन्धित विषयमा भक्तपुर नगरपालिका र चाँगुनारायण नगरपालिकाबिच सहमति भयो ।
छलफलले स्थानीय जनताको माग र भावनाबमोजिम फोहोरमैला व्यवस्थापन, गन्ध न्यूनीकरण गर्न आवश्यक व्यवस्था मिलाउने, फोहोर बोक्ने गाडी छोप्ने व्यवस्था गर्ने, फोहोरको गन्ध हटाउन केमिकल छर्कने र उक्त क्षेत्रको सडक सुधार गर्नेलगायतका आवश्यक कार्यहरू अगाडि बढाउने तथा अन्य साझा विषयहरूमा भक्तपुर नगरपालिका र चाँगुनारायण नगरपालिकाबिच सहमति र सहकार्य गरी अगाडि बढ्ने निर्णय ग¥यो ।
कार्यक्रममा भक्तपुर नगरपालिकाका नगर प्रमुख सुनिल प्रजापतिले फोहोर व्यवस्थापन सङ्घ, प्रदेश र स्थानीय सरकारको साझा जिम्मेवारी भएको बताउँदै भक्तपुरले आफ्नै क्षेत्रमा फोहोर व्यवस्थापन गर्ने उद्देश्यले घरघरबाट कुहिने र नकुहिने फोहोर छुट्याएर सङ्कलन गरिएको र फोहोरबाट जैविक मल उत्पादन गरी कृषकलाई सहुलियत दरमा बिक्री वितरण गर्दै आएको बताउनुभयो । उहाँले भक्तपुर नगरपालिकाले स्थानीयवासीको स्वास्थ्य, वातावरण संरक्षण र दीर्घकालीन हितलाई केन्द्रमा राखेर कुहिने र नकुहिने अलग अलग गरी फोहोर व्यवस्थापन गर्दै आएको बताउनुभयो ।
उहाँले भन्नुभयो, “स्थानीयवासीका गुनासा, सुझाव र सरोकारलाई नगरपालिकाले गम्भीरतापूर्वक लिएको छ । फोहोर व्यवस्थापनलाई वैज्ञानिक, व्यवस्थित र वातावरणमैत्री बनाउँदै स्थानीयलाई असर नपर्ने गरी आवश्यक सुधार र व्यवस्थापन गर्दै अगाडि बढ्नेछौँ ।
भक्तपुरका प्रमुख जिल्ला अधिकारी विनोदकुमार खड्काले फोहोर व्यवस्थापन देशकै चुनौतीपूर्ण विषय भएकोले यसलाई जिम्मेवारीपूर्वक र रचनात्मक ढङ्गबाट समाधान गर्नुपर्ने बताउनुभयो । उहाँले फोहोर व्यवस्थापनको क्रममा गन्ध न्यूनीकरणलाई प्राथमिकतामा राख्नुपर्ने उल्लेख गर्दै घटनालाई अतिरञ्जित नगरी सकारात्मक सुझावसहित रचनात्मक निष्कर्षमा पुग्न सबै पक्षलाई आग्रह गर्नुभयो ।
छलफल कार्यक्रममा उपस्थित चाँगुनारायण नपा वडा नं. ५ का वडा सदस्य सुरेश कार्की, प्रभुराम थापालगायत स्थानीयले फोहोर व्यवस्थापन कार्य कसैलाई पनि क्षति नपुग्ने गरी गर्नुपर्ने, सडक, करिडोर तथा अन्य पूर्वाधार निर्माणमा ध्यान दिनुपर्ने विचार व्यक्त गर्नुभयो । फोहर व्यवस्थापनमा मानव स्वास्थ्यलाई असर नपर्ने तथा वैज्ञानिक र दीगो ढङ्गबाट फोहोर व्यवस्थापन गर्नुपर्ने साझा धारणा पनि उहाँहरूले व्यक्त गर्नुभयो ।
भक्तपुर नगरपालिका वडा नं. ९ का वडाध्यक्ष रवीन्द्र ज्याख्वले भक्तपुर नगरपालिकाले कुहिने र नकुहिने फोहोरलाई छुट्टाछुट्टै व्यवस्थापन गर्दै साना–साना एकाइमार्फत फोहोर व्यवस्थापन प्रणाली सञ्चालन गरिरहेको जानकारी दिनुभयो ।