विद्यालयको शैक्षिक स्तर उठाउन सामूहिक भावना राखेर काम गर्नुपर्ने

भक्तपुर, १७ साउन । गणेश माध्यमिक विद्यालयले स्वेच्छिक अवकाश लिनुभएका पूर्वप्रधानाध्यापक गणेशराम थुसालाई आइतबार एक विशेष कार्यक्रमबिच बिदाइ गर्नुभयो ।
उक्त कार्यक्रममा भक्तपुर नगरपालिकाका प्रमुख सुनिल प्रजापतिले टोलका अग्रज, समाजसेवी र शिक्षाप्रेमीहरूले विद्यालय स्थापना गर्न, विद्यालय भवन बनाउन चन्दा, सहयोग र साथ दिएकै कारण आज शिक्षकहरूले अध्यापन गर्न पाएको उल्लेख गर्दै विद्यार्थीको शैक्षिक ज्ञान अभिवृद्धि गर्न र व्यक्तित्व विकास हुने अतिरिक्त क्रियाकलाप गर्न आइतबारलाई उपयोग गर्न सुझाव दिनुभयो ।
विद्यालयको शैक्षिक स्तर उठाउन सामूहिक भावना राखेर काम गर्नुपर्नेमा जोड दिँदै उहाँले आफ्नो कमी कमजोरी औँल्याएर काम गरेमा उद्देश्य पूरा हुने विश्वास व्यक्त गर्नुभयो ।
विद्यालय व्यवस्थापन समितिका पूर्वअध्यक्ष रवीन्द्र खर्बुजाले नयाँ प्रधानाध्यापकले थप जिम्मेवारी सम्हालेर काम गर्नुपर्नेमा जोड दिँदै निवृत्त शिक्षकले आफ्नो शिक्षण अनुभवबारे लेख लेखेर अरूलाई प्रेरित गर्नुपर्ने आवश्यकता औँल्याउनुभयो ।
पूर्वप्रअ गणेशराम थुसाले सेवा अवधि ३० महिना बाँकी भए पनि स्वेच्छाले अवकाश लिएको उल्लेख गर्दै असल कामको अनुकरण गर्ने र कमीकमजोरी सुधार गर्नुपर्ने आवश्यकता औँल्याउनुभयो ।
विद्यालयका अभिभावक, समुदायका अग्रज र शिक्षाप्रेमीहरूको सहयोग र सुझावले विद्यालय अघि बढिरहेको उल्लेख गर्दै उहाँले भक्तपुर शिक्षा क्षेत्रमा नमुनाको रूपमा अघि बढिरहेको छ भन्नुभयो ।
विद्यालयका संस्थापक सदस्य एवं पूर्वविद्यालय व्यवस्थापन समितिका अध्यक्ष कृष्णबहादुर दुगुजुले विद्यालयको विकास र स्थापनबारे जानकारी दिनुभयो ।
कार्यक्रममा विद्यालयका प्रधानाध्यापक लक्ष्मीसुन्दर सुवालले विद्यालय सञ्चालनमा अथक प्रयास गर्ने पूर्वप्रअ गणेशराम थुसा एक कर्तव्यनिष्ठ शिक्षक हुनुहुन्छ भन्नुभयो ।
विद्यालय व्यवस्थापन समितिका अध्यक्ष श्यामकृष्ण खत्रीको सभापतित्वमा भएको उक्त कार्यक्रममा शिक्षक सुशीला न्याइच्याईले पनि बोल्नुभएको थियो ।