भर्खरै :

हालसम्म चार हजार विद्यालय पुनःनिर्माण

काठमाडौं, २८ फागुन । विनाशकारी भूकम्पमा क्षतिग्रस्त भएकामध्ये हालसम्म चार हजार १९० विद्यालय पुनःनिर्माण भएका छन् । पुनःनिर्माण भएकामध्ये विद्यालय व्यवस्थापन समितिमार्फत ३,३६८, निर्माण व्यवसायीमार्फत ६४ र गैरसरकारी क्षेत्रमार्फत ७५८ विद्यालय निर्माण भएका हुन् ।
राष्ट्रिय पुनःनिर्माण प्राधिकरण परियोजना कार्यान्वयन एकाइ (शिक्षा) का वरिष्ठ इन्जिनियर उद्धव नेपालले विद्यालय व्यवस्थापन समितिमार्फत १,४३७, निर्माण व्यवसायीमार्फत ३१४ र गैरसरकारी क्षेत्रबाट २९२ विद्यालय गरी कुल दुई हजार ४३ विद्यालय निर्माणाधीन अवस्थामा रहेको जानकारी दिनुभयो ।
राष्ट्रिय पुनःनिर्माण प्राधिकरण परियोजना कार्यान्वयन एकाइ (शिक्षा) र शिक्षा पत्रकार समूहको आयोजनामा काभ्रेको धुलिखेलमा आयोजित छलफल कार्यक्रममा नेपालले काभ्रे, सिन्धुपाल्चोक, दोलखा, रामेछाप, सिन्धुली, ओखलढुङ्गा, काठमाडौं र भक्तपुरमा एसियाली विकास बैङ्क (एडीबी), अमेरिकी सहयोग संस्था यूएसएड र नेपाल सरकारको रू. ९.६ अर्ब बजेटमा १५४ विद्यालय निर्माण गर्ने लक्ष्य रहेकामा ४१ विद्यालय निर्माण सम्पन्न भएका र ११३ विद्यालय अझै निर्माण हुन बाँकी रहेको जानकारी दिनुभयो ।
जापान सरकार र नेपाल सरकारको (१२ प्रतिशत) को बजेटमा दोलखा, रामेछाप, गोरखा, धादिङ, ललितपुर, नुवाकोट, रसुवा र मकवानपुरमा सबै विद्यालयको ६६ प्रतिशत काम सम्पन्न भएको छ ।
परियोजना कार्यान्वयन एकाइ काभ्रे कार्यालयका वरिष्ठ अधिकारी निर्मल घिमेरेले आपत्कालीन विद्यालय पुनःनिर्माण आयोजनाअन्तर्गत ललितपुर, गोरखा, धादिङ, रसुवा, नुवाकोट र मकवानपुरका २३६ विद्यालय नेपाल सरकार र जापानी सहयोग संस्था जाइकाको ऋण सहयोग गरी रू. १४ अर्बमा र नेपाल सरकारको बजेट स्रोतमा सञ्चालन गर्दै आएकोमा हालसम्म ४१ प्रतिशत विद्यालय निर्माण भएको जानकारी दिनुभयो ।
घिमिरेले काभ्रे जिल्लाकोे कुल विद्यालय सङ्ख्या ६९० रहेको, त्यसमध्ये सामुदायिक विद्यालय ५८७ र संस्थागत विद्यालय १०३ रहेको जानकारी दिँदै विनाशकारी भूकम्पले अधिकांश सामुदायिक विद्यालयका भवन पूर्ण क्षति भएको बताउनुभयो । काभ्रे जिल्लामा कक्षा कोठा सङ्ख्या पाँच हजार २१० रहेकोमा पूर्ण क्षति कक्षा कोठा सङ्ख्या ९५४, अधिक क्षति कक्षा कोठा सङ्ख्या ९१४, सामान्य क्षति कक्षा कोठा सङ्ख्या एक हजार ४८३ र क्षति नभएको कक्षा कोठा एक हजार ८५९ भएको जनाउनुभयो ।

Leave a Reply

Your email address will not be published. Required fields are marked *