सिन्धुपाल्चोक, २९ फागुन । सिन्धुपाल्चोकको १०३ वडामध्ये अधिकांशमा इन्टरनेटको लाइन जडान गरिएको छैन । जडान गरिएका वडामा पनि राउटर मात्रै छन्, इन्टरनेट सेवा चल्दैन । यसैगरी स्वास्थ्य संस्था, विद्यालय र अन्य सरकारी कार्यालयमा पनि इन्टरनेट सेवा छैन ।
जिल्ला सदरमुकाम चौतारा र आसपासका अधिकांश विद्यालयमा इन्टरनेट सुविधा छैन । नेपाल दूरसञ्चार प्राधिकरणले दाबी गरेजस्तो निःशुल्क इन्टरनेट सेवा उपलब्ध नभएको हो । चौतारा साँगाचोकगढी नगरपालिकाका उपप्रमुख जानुका पराजुलीले निःशुल्क इन्टरनेट प्रभावकारी नभएको बताउनुभयो । भोटेकोशी, त्रिपुरासुन्दरी, सुनकोशी, बलेफी र पाँचपोखरी थांपाल गाउँपालिकामा इन्टरनेट सुविधा जडान नै गरिएको छैन । गाउँपालिका कार्यालय, वडा र केही माध्यमिक विद्यालयले आफ्नै खर्चमा इन्टरनेट सञ्चालन गरेका छन् ।
बा¥हबिसे नगरपालिकाको विद्यालय, स्वास्थ्यचौकी र अन्य सरकारी कार्यालयमा इन्टरनेटको राउटर जडान भए पनि टावरका कारण सिग्नल नै आउँदैन । ती सरकारी कार्यालयलाई आवश्यक पर्दा बा¥हबिसे बजारमा आएर निजी इन्टरनेटबाट काम गर्नुपर्ने अवस्था छ । दूरसञ्चार प्राधिकरण बा¥हबिसेले लिसङ्खुपाखर गाउँपालिकाको सबै सरकारी कार्यालय र विद्यालयलाई सीडीएमएको इन्टरनेट जडान गरिदिएको छ । तर, निकै सुस्त भएकाले दिनभर चलाउँदा पनि एउटा फाइल डाउनलोड हुँदैन ।
मेलम्ची नगर, जुगल र इन्द्रावती गाउँपालिकामा दुई वर्षअघि जडान गरिएका इन्टरनेटका राउटर काम नलाग्ने भएका छन् । “सूचना केन्द्र स्थापनाको लागि दूरसञ्चार प्राधिकरणसँग एक वर्षदेखि अनुरोध गरेको छु । तर आजसम्म कुनै सेवा प्राप्त भएन”, गाउँपालिका महासङ्घका महासचिवसमेत रहनुभएका इन्द्रावती गाउँपालिका अध्यक्ष वंशलाल तामाङले बताउनुभयोे ।
हेलम्बु गाउँपालिकामा टावर आउने स्थानमा सबै सरकारी कार्यालय र विद्यालयमा निःशुल्क इन्टरनेट सेवा उपलब्ध रहेको अध्यक्ष निमाग्याल्जेन शेर्पाले बताउनुभयो । निःशुल्क इन्टरनेट सेवाबारे सोधपुछ गर्दा नेपाल दूरसञ्चार प्राधिकरण महसुल काउण्टर शाखा चौताराका प्रमुख तेजकृष्ण श्रेष्ठले यसबारे केही थाहा नभएको बताउनुभयो ।

Leave a Reply

Your email address will not be published. Required fields are marked *