प्रसूतिगृहले २ सय आइसोलेसन शष्या बनाउने

काठमाडौँ, ९ भदौ । काठमाडौँ उपत्यकालगायत देशभरमा कोभिड–१९ को सङ्क्रमण बढिरहँदा थापाथलीस्थित परोपकार प्रसूति तथा स्त्रीरोग अस्पताल (प्रसूतिगृह) ले दुई सय आइसोलेसन शष्या बनाउने भएको छ । स्वास्थ्य तथा जनसङ्ख्या मन्त्रालयको निर्देशनानुसार अस्पतालले कुपण्डोलस्थित नयाँ भवनमा कोभिड–१९ सङ्क्रमितका लागि छुट्टै शष्याको व्यवस्था गर्ने तयारी गरेको छ ।
नेपालमा कोभिडको सङ्क्रमण सुरु भएपछि अस्पतालले सो भवनलाई सम्भावित सङ्क्रमित र सङ्क्रमितलाई राख्न छुट्याएको अस्पतालका उपनिर्देशक श्रीप्रसाद अधिकारीले बताउनुभयो । अस्पतालमा अहिलेसम्म सम्भावित सङ््क्रमित भनेर राखिएका एक सयमध्ये एक जनामा मात्रै कोभिड पोजेटिभ आएको थियो । अबको दिनमा सम्भावितलाई थापाथलीस्थित अस्पतालमै अरुभन्दा छुट्टै राखिने अस्पतालले जनाएको छ । उहाँले भन्नुभयो, “सम्भावित महिलालाई अरूभन्दा छुट्टै राखेर पोजेटिभ आएमात्रै आइसोलेसनमा राखिनेछ ।”
अस्पतालले अहिलेसम्म विभिन्न कुराका आधारमा झन्डै एक सय महिलालाई सम्भावित सङ्क्रमितको रूपमा अरुभन्दा छुट्टै राखिसकेको थियो । तीमध्ये एकमा पोजेटिभ देखिएकीलाई पाटन अस्पताल पठाइएको थियो ।
कोभिड–१९ को सङ््क्रमण आगामी दिनमा अझै बढ्न सक्ने भनी अस्पतालले कर्मचारी व्यवस्थापनमा समेत ध्यान दिएको अधिकारीले बताउनुभयो । कार्यरत चिकित्सकमध्ये आधामात्रै अस्पतालमा आउने गरेका छन् । सरकारले निषेधाज्ञा जारी गरेसँगै अस्पतालले कार्यरतमध्ये सबै कर्मचारीलाई अस्पताल नबोलाएको हो । एक साता खटिएकाहरू एक साता नआउने गरी आलोपालो गरी काम तोकिएको उहाँले बताउनुभयो । अस्पतालमा कार्यरतलाई यसअघि पनि सङ्क्रमण देखिएकोले आगामी दिनमा पनि सेवा नियमित सञ्चालनका लागि योजना बनाइएको हो । उहाँले भन्नुभयो, “आधामात्रै कार्यरत हुँदा सङ्क्रमण देखिएर कोही आइसोलेसन बस्दा पनि अरूले सेवा नियमित गर्नसक्छन् ।”
अस्पतालले बहिरङ्ग सेवा नियमित गरे पनि सेवा लिन आउनेको सङ्ख्या नियमित समत्न्दा झन्डै आधा कम छ । अस्पतालमा अहिले सुत्केरी हुनका लागि आउने वा आकस्मिक सेवाका लागि आउनेको सङ्ख्या भने कम भएको छैन । सरकारले चार महिनासम्म बन्दाबन्दी जारी राखे पनि गत आवमा विगत वर्षभन्दा सुत्केरी हुनेको सङ््ख्या कम नभएको अस्पतालको तथ्याङ्््कले देखाएको छ । अहिले पनि दैनिक ६० देखि ७० जनाको डेलिभरी हुने गरेकोमा शल्यक्रियाको सङ्ख्या २० देखि ३० छ । उहाँले भन्नुभयो, “सामान्य डेलिभरी र शल्यक्रिया दुवै सामान्य अवस्थाभन्दा कम छैन ।”
अस्पतालले कोभिड–१९ को सङ्क्रमित र अस्पतालका कर्मचारीलाई बचाउनका लागि आवश्यक सतर्कता अपनाएको छ । अस्पतालमा बिरामीलाई एक जनामात्रै कुरुवा बस्न पाउने र अस्पताल परिसरमा बस्दा सामाजिक दुरी कायम गर्न अनिवार्य गरिएको छ । अस्पताल छिर्न जो कोहीले हात धुनुपर्ने अनिवार्य गरिएको छ । अस्पतालको परिसर साँघुरो भए पनि सकेसम्मको दुरी कायम गरिएको उहाँले बताउनुभयो । उहाँले भन्नुभयो, “यहाँका सेवा नियमित गरेर सङ््क्रमण पनि नफैलियोस् भन्ने गरी अस्पतालले काम गरिरहेको छ ।”
अस्पतालले अहिलेसम्म कुनै पनि सेवा अवरुद्ध गरेको छैन । सामान्यावस्थामा पनि अरू जिल्लाका अस्पतालबाट रिफर भएर धेरै बिरामी समेत आउने गरेका थिए । अहिले विभिन्न निजी संस्थाले सेवा अवरुद्ध गरेका कारण अस्पतालमा प्रसूति सेवा लिन आउनेको सङ््ख्यामा कमी आएको छैन । अस्पतालमा केही समय पहिले तीन चिकित्सकसहित नौ कर्मचारीलाई कोभिड पोजेटिभ देखिएको थियो । त्यस्तो समयमा कुनै कुनै वार्डमात्रै सिल गरिए पनि अस्पताल नियमितरूपमा सञ्चालनमा थियो । उहाँले भन्नुभयो, “सङ््क्रमण देखिएकाको कन्ट्याकमा आएकाको खोजी गरेर परीक्षण गर्ने र त्यस ठाउँलाई क्लोरिनले सफा गरेर पुनः सञ्चालनमा ल्याएका छौँ ।”
अस्पतालमा आउने बिरामीमध्ये सङ््क्रमणको जोखिम देखिएकाको मात्रै परीक्षण गरिँदै आएको उपनिर्देशक अधिकारीले जानकारी दिनुभयो । कोभिडका कुनै लक्षण देखिएका बिरामी तथा हटस्पटबाट आएका वा सङ््क्रमितको नजीकको सम्पर्कमा रहेकाको अनिवार्य परीक्षण गरिँदै आएको छ । सङ््क्रमणको शङ्का लागेकाहरूलाई अस्पतालले रिपोर्ट नआउँदासम्म छुट्टै राख्दै आएको छ । उनीहरूको पोजेटिभ आएमा आइसोलेसन शष्यामा र नेगेटिभ आएमा अरू बिरामीसँगै राखेर उपचार गरिन्छ । अस्पतालमा कार्यरत कर्मचारीलाई पहिलो चरणको सुरक्षा सामग्री मास्क, फेस शिल्ड र पञ्जाको व्यवस्था गरिएको छ । बिरामीको उपचारमा संलग्न स्वास्थ्यकर्मीलाई भने अर्काे तहको सुरक्षा सामग्रीको व्यवस्था गरिँदै आएको छ । उहाँले भन्नुभयो, “सम्भावित सङ्क्रमितको समेत उपचार गर्नेहरूलाई पीपीईलगायतका सबै आवश्यक सामग्री उपलब्ध गराइएको छ ।”÷रासस