पूर्वाञ्चल विश्वविद्यालयका डीन भट्टराई भक्तपुर नपामा

भक्तपुुर, ६ फागुन । भक्तपुर नगरपालिकाका प्रमुख सुनिल प्रजापतिसित पूर्वाञ्चल विश्वविद्यालय इन्जिनियरिङ सङ्कायका डीन देवीप्रसाद भट्टराईले भेट गर्नुभयो । नगरपालिका कार्यालयमा भएको भेटमा ख्वप इन्जिनियरिङ कलेजमा स्नातकोत्तर तहमा कम्प्युटर र इलेक्ट्रोनिक्स इन्जिनियरिङ र स्नातकमा मेकानिकल इन्जिनियरिङलगायतका विषयहरू थप गर्ने विषयमा छलफल भयो । डीन भट्टराई ख्वप इन्जिनियरिङ कलेज अनुगमनको क्रममा भक्तपुर आउनुभएको हो ।
बैठकमा नगर प्रमुख प्रजापतिले देशभरिका विद्यार्थीहरूलाई सस्तोमा गुणस्तरीय शिक्षा प्रदान गर्न भक्तपुर नपाले सात वटा शैक्षिक संस्थाहरू सञ्चालन गरिरहेको बताउँदै भक्तपुरलाई ज्ञानविज्ञानको केन्द्र बनाउने उद्देश्य रहेको बताउनुभयो ।
भेटमा डीन भट्टराईले नगरपालिकाद्वारा सञ्चालित ख्वप इन्जिनियरिङ कलेज पूर्वाञ्चल विश्वविद्यालयबाट सम्बन्धन प्राप्त भए पनि पूर्वाञ्चल विविको आङ्गिक क्याम्पससरह मान्यता प्राप्त भएको बताउँदै कलेजलाई आवश्यक विषयहरू थप गर्ने विषयमा आफू सकारात्मक रहेको बताउनुभयो । ख्वप इन्जिनियरिङ कलेजले सस्तोमा इन्जिनियरिङ शिक्षा प्रदान गर्दै आइरहेको चर्चा गर्दै उहाँले ख्वप इन्जिनियरिङ कलेजले नपासँग मिलेर कलेजका प्राध्यापक विद्यार्थीहरूको प्राविधिक सहयोग सराहनीय पक्ष भएको औँल्याउनुभयो ।
भेटमा भक्तपुर नपाका उपप्रमुख रजनी जोशी, ख्वप इन्जिनियरिङ कलेजका प्राचार्य सुजन माक र उपप्राचार्य रविन्द्र फोँजुको पनि उपस्थिति थियो ।.