किपाग्राफीको वार्षिकोत्सवमा बनेपाली सम्मानित

भक्तपुर, १६ असोज । भक्तपुर नगरपालिकाका प्रमुख सुनिल प्रजापतिले किपाग्राफी भक्तपुरको छैटौँ वार्षिकोत्सव कार्यक्रमको शनिबार एक समारोहबीच उद्घाटन गर्नुभयो ।
कार्यक्रममा नगर प्रमुख प्रजापतिले लोपोन्मुख सम्पदा संरक्षणमा विभिन्न कालखण्डमा खिचिएका फोटोहरूले महत्वपूर्ण भूमिका खेल्ने बताउँदै फोटो भनेको इतिहास र समाजको ऐना हो भन्नुभयो ।
पुराना तथा मौलिक फोटोहरूले भक्तपुरको इतिहास अध्ययन गर्न मद्दत पु¥याएको बताउँदै पुराना पुराना फोटोहरूको सङ्कलन र अभिलेखीकरण गर्नुपर्नेमा जोड दिनुभयो ।
नगर प्रमुख प्रजापतिले पुराना तस्बिरहरूकै कारण आजभन्दा ९० वर्षअगाडि बनेको भक्तपुरको दरबार क्षेत्रमा अवस्थित फसी देग मौलिक शैलीमै पुनःनिर्माण भइरहेको अवगत गराउँदै सोसँगै रहेको पुरातत्व विभागको भवन पनि मौलिक शैलीमै पुनःनिर्माण गर्ने तयारी भइरहेको बताउनुभयो । कार्यक्रममा किपाग्राफी भक्तपुरका सल्लाहकार एवम् भक्तपुर साकोसका अध्यक्ष बलराम प्रजापतिले विदेशिने युवाहरूलाई नेपालमै रोजगारी प्रदान गर्न विभिन्न सीपमूलक तालिमहरू सञ्चालन हुनुपर्नेमा जोड दिँदै नयाँ पुस्ता अझ समाजप्रति उत्तरदायी हुन जरुरी रहेको बताउनुभयो ।
वरिष्ठ फोटोग्राफर जगदीश तिवारीले फोटोग्राफरहरूले भक्तपुरलाई संसारभर चिनाउने काम गरिरहेको बताउँदै स्थानीय निकायले उनीहरूलाई हौसला प्रदान गर्नुपर्नेमा जोड दिनुभयो ।
किपाग्राफी भक्तपुरका अध्यक्ष अच्युत प्रजापतिले भक्तपुरको कला संस्कृति जगेर्ना गर्ने उद्देश्यले किपाग्राफीको स्थापना भएको बताउँदै विद्यालय तहदेखि फोटोग्राफीको कक्षाहरु लिनुपर्ने बताउनुभयो ।
कार्यक्रममा किपाग्राफी भक्तपुरका उपाध्यक्ष पद्मसुन्दर शाक्यले धन्यवाद ज्ञापन गर्नुभएको थियो भने फोटोग्राफर रविता किसी, सचिव बालकृष्ण प्रजापति र किरण सुवालले पनि आआफ्नो धारणा राख्नुभएको थियो । कार्यक्रममा नगर प्रमुख प्रजापतिले वरिष्ठ फोटोग्राफर तथा सिनेमाटोग्राफी केदारप्रसाद बनेपालीलाई दोसल्ला ओढाई सम्मान गर्नुभएको थियो । उहाँले किपाग्राफी भक्तपुरको आयोजनामा भएको भक्तपुरको नवदुर्गा नाचसम्बन्धी फोटो प्रतियोगिता २०७८ का उत्कृष्ट १० र प्रथम, दोस्रो, तेस्रो स्थान हासिल गर्न सफल फोटोग्राफरहरूलाई पुरस्कार, सम्मान पत्र तथा मायाको चिनो प्रदान गर्नुभएको थियो । भेलाले किपाग्राफी भक्तपुरमा पदमसुन्दर शाक्यको अध्यक्षतामा नयाँ कार्य समिति गठन ग¥यो ।