भर्खरै :

भक्तपुर नगरपालिकाको अनुमानित बजेट रू. २ अर्ब १८ करोड ४२ लाख

भक्तपुर, १० असार । भक्तपुर नगरपालिकाका प्रमुख सुनिल प्रजापतिको अध्यक्षतामा बसेको बा¥हौँ नगरसभाको बैठकमा उपप्रमुख रजनी जोशीले भक्तपुर नगरपालिकाको आ.व. २०७९/८० को अनुमानित आय—व्यय बजेट प्रस्तुत गर्नुभयो ।
भक्तपुर नगरपालिकाको आफ्नै स्रोत, नेपाल सरकार र प्रदेश सरकारबाट विभिन्न शीर्षकमा प्राप्त हुने अनुदान रकमका साथै ऋण सापटी र नगरपालिकाको जग्गा बिक्रीसमेत गरी आ.व. २०७९÷८० को लागि रू. २ अर्ब १८ करोड ४२ लाख ४२ हजारको बजेट प्रस्तुत भयो ।
विनियोजित बजेटको चालू खर्चतर्फ ६५.३९ प्रतिशत, पुँजीगत खर्चतर्फ ३२.५० प्रतिशत र वित्तीयतर्फ २.११ प्रतिशत विनियोजन गरिएको छ ।
बजेट वक्तव्यमा १०० शøयाको स्वीकृति प्राप्त ख्वपः अस्पताल भवन यसै आर्थिक वर्षमा निर्माणको काम पूरा गरी सुविधा सम्पन्न ‘जनताको अस्पताल’ सञ्चालन गर्न रू. ८ करोड रूपैयाँ विनियोजन गरिएको छ ।
त्यस्तै देको–मिवा–इतापाके जग्गा एकीकरण आयोजना समयमै सम्पन्न गर्न २० करोड रूपैया, अँचा पोखरी परिसरमा आदर निकेतन सञ्चालन गर्न ५० लाख रूपैयाँ, सहिद स्मृति खेल मैदानमा कभर्ड हल निर्माणको लागि १ करोड रूपैयाँ, महेश्वरी खेलमैदानको लागि रू. १ करोड, बेखाल कभर्ड हल निर्माण सम्पन्न गर्न ३ करोड रूपैयाँ र खेलकुद पूर्वाधार, प्रशिक्षण तथा प्रतियोगिता सञ्चालन गर्न रू. ६ करोड १ लाख विनियोजन गरिएको छ ।
त्यस्तै बाराही पुल यसै वर्ष सम्पन्न गर्ने गरी रू. ३ करोड, नगरमा खानेपानी फिल्ट्रेसन, ट्याङ्की निर्माण तथा खानेपानी पाइप सुधार कार्यका लागि लिबाली आवास योजना र कमल विनायक आवास योजनामा खानेपानी व्यवस्था गर्न रू. ५० लाख, नगरवासीहरूलाई खानेपानी सुविधा उपलब्ध गराउन रू. १ करोड २५ लाख र नगरपालिकाभित्र सञ्चालित सहकारी संस्थाहरूसँग सहकार्य गरी उत्पादनमूलक क्षेत्रमा लगानी गर्न र युवा उद्यमशील ऋणतर्फ रू. १ करोड बजेट विनियोजन गरिएको छ ।
क्यान्सर, मुटु, मृगौला, मस्तिष्कघात तथा मेरूदण्ड पक्षघात (स्पाइनल कर्ड इन्ज्युरी) जस्ता कडा तथा दीर्घरोग भएका नगरवासी बिरामीहरूलाई प्रतिव्यक्ति रू. १५ हजारको दरले सहयोग गर्दै आएको कार्यक्रमलाई निरन्तरता दिन रू. ४० लाख विनियोजन गरिएको छ भने क्यान्सर, मृगौला रोगी र मेरूदण्ड पक्षघातका बिरामीहरूलाई मासिक रू. ५ हजारको दरले उपचार खर्च भत्ता व्यवस्थाको लागि रू. ९० लाख विनियोजन गरिएको छ ।
बजेट वक्तव्यमा लिबालीमा चिस्यान केन्द्र निर्माण गर्न रू. १ करोड, वडा नं. ५ मा तरकारी बजार निर्माण सम्पन्न गर्न रू. ४० लाख रूपैयाँ, थंथु दरबार पुनःनिर्माण, सांस्कृतिक सङ्ग्रहालय निर्माण, कोसेली घरलगायत वडा वडाका सम्पदाहरू पुनःनिर्माण र संरक्षणको लागि रू. ६ करोड बजेट विनियोजन गरिएको छ ।
चिकित्साशास्त्र, इन्जिनियरिङ, व्यवस्थापन, मानविकी, शिक्षाशास्त्रलगायतका विषयहरूमा उच्च शिक्षा अध्ययन गर्न चाहने र अध्ययनरत नगरवासी विद्यार्थीहरूका लागि नगरपालिकाले विगत वर्षदेखि शैक्षिक ऋण वितरण गर्दै आएकोमा यो वर्ष ऋणको सीमा वृद्धि गर्दै २ करोड रूपैयाँ विनियोजन गरिएको छ । शिक्षाशास्त्र सङ्कायमा उच्च शिक्षा अध्ययन गरी शिक्षक बन्न चाहने नगरवासीहरूको लागि विशेष व्यवस्था गरिएको छ ।
पुरानो नगर क्षेत्रमा परम्परागत शैलीमा घर निर्माण गर्ने घरधनीहरूलाई मोहडाका लागि इँटा, काठ र झिङ्गटीमा लाग्ने कूल लागत रकमको ३५ प्रतिशत अनुदान दिन ५० लाख रूपैयाँ विनियोजन गरिएको छ भने ख्वप टेलिभिजन सञ्चालनकोे लागि १ करोड रूपैयाँ बजेट वक्तव्यमा विनियोजन गरिएको छ ।
पर्ती जग्गा संरक्षण तथा सिमाङ्कन, पार्किङ, कृषि उत्पादन वृद्धि गर्न माटो परीक्षण तथा सम्भाव्यता अध्ययन कार्यलगायतका लागि रू. ७० लाख विनियोजन गरिएको छ भने नगरभित्रका सामुदायिक विद्यालयहरूमा बाल विकास सहजकर्ता (ईसीडी) शिक्षकहरूको कार्य मूल्याङ्कन गरी थप पारिश्रमिकको बन्दोबस्त गरिएको छ ।
विनियोजित बजेटमा शिक्षा तथा संस्कृति क्षेत्रमा कूल बजेटको १९.४३ प्रतिशत छ्ट्याइएको छ । त्यस्तै स्वास्थ्य क्षेत्रमा ४.९५ प्रतिशत, सम्पदा संरक्षण तथा विकास निर्माणमा ४.१२ प्रतिशत, भौतिक पूर्वाधार निर्माणका लागि १८.०७ प्रतिशत, फोहरमैला व्यवस्थापन तथा वातावरण सुधार क्षेत्रमा ६.१८ प्रतिशत, महिला–बालबालिका, ज्येष्ठ नागरिक तथा समाज कल्याण क्षेत्रमा २३.६६ प्रतिशत, वित्तीयतर्फ २.११ प्रतिशत विनियोजन गरिएको छ ।
त्यस्तै युवा तथा खेलकुद क्षेत्रमा ६ करोड १ लाख ९९ हजार रूपैयाँ, कृषि औजार एवम् बीउबिजनका लागि कृषि क्षेत्रमा २ करोड ७ लाख रूपैयाँ र प्रशासनिक व्यवस्थापनको लागि रू. ३८ करोड ८६ लाख ६३ हजार विनियोजन गरिएको छ ।
नगरसभाको सोही बैठकमा उपप्रमुख जोशीले ‘भक्तपुर नगरपालिकाको आर्थिक विधेयक २०७९’, ‘भक्तपुर नगरपालिकाको विनियोजन विधेयक, २०७९’ सभासमक्ष प्रस्तुत गर्नुभएको थियो । सभाले छलफलको लागि स्वीकृत गरेको छ ।
नगरसभाको अर्को बैठक असार १२ गते आइतबार दिनको १ बजे बस्ने गरी स्थगित भयो ।

Leave a Reply

Your email address will not be published. Required fields are marked *