कैलाली तिलकपुरमा विद्यार्थी भेला

कैलाली, ४ कार्तिक । नेपाल क्रान्तिकारी विद्यार्थी सङ्घ कैलालीको आयोजनामा लम्कीचुहा नपा वडा नं. ५ तिलकपुरमा विद्यार्थी भेला सम्पन्न भयो ।
भेलामा नेपाल मजदुर किसान पार्टी, कैलालीका अध्यक्ष रमेशकुमार रावलले विद्यार्थी अध्ययनशील हुनुपर्छ भन्नुभयो । उहाँले पढेर विदेशमा जाने होइन, आफ्नै देशमा पसिना बगाउन सकियो भने विदेशीको भरपर्नु पर्दैन भन्नुभयो ।
उहाँले देशमा किसान, मजदुर, शिक्षक, विद्यार्थी, डाक्टर र इन्जिनियरले रोजगारी र अधिकारको लागि आन्दोलन गर्नुपर्छ भन्नुभयो । उहाँले सबैले राजनीति नबुझेकाले देश बर्बाद भएको बताउनुभयो ।
नेपाल क्रान्तिकारी विद्यार्थी सङ्घका केन्द्रीय सदस्य प्रतिभा रावलले विद्यार्थीलाई सही मार्गनिर्देशन दिने काम राजनीतिले गर्छ भन्नुभयो । उहाँले नेमकिपाले उत्पादन श्रमसँग जोडिएको शिक्षा लागू गर्न सङ्घर्ष गरिरहेको उल्लेख गर्नुभयो ।
नेपाल क्रान्तिकारी विद्यार्थी सङ्घ कैलालीका अध्यक्ष हिक्मत भण्डारीले राजनीतिले विद्यार्थीको चौतर्फी विकास हुन्छ भन्नुभयो ।
भेलामा रमिता भण्डारी र राजकुमार पुनले पनि बोल्नुभएको थियो ।