इजरायलले ‘भोकमरीको हतियार’ प्रयोग गर्दा ७१ प्रतिशत गाजावासी चरम भोकमरीमा : अधिकारवादी समूह

जेनेभा, २० डिसेम्बर (प्रेस टीभी/टेलेसुर) । जेनेभामा आधारित एक मानव अधिकारवादी समूहले प्यालेस्टिनी क्षेत्रमा इजरायलको विनाशकारी युद्ध र भोकमरीलाई हतियारको रूपमा प्रयोग गर्ने इजरायली शासनको कदमका कारण गाजापट्टीका ७१ प्रतिशत मानिसहरू चरम भोकमरीबाट ग्रस्त भएको बताएको छ ।
युरो–मेडिटेरेनियन ह्युमन राइट्स मनिटरले गाजामा १,२०० व्यक्तिको नमुनाको विश्लेषणात्मक अध्ययन गरेपछि मङ्गलबार यो तथ्याङ्क जारी गरेको हो ।
अध्ययनमा सहभागी ९८ प्रतिशतले आफूले अपर्याप्त मात्रामा खाना खाने र ६४ प्रतिशतले आफ्नो भोक मेटाउन घाँस, फलफुल, नपाकेको खाना र म्याद नाघेका खाद्य सामग्री खाने गरेको स्वीकार गरेका छन् ।
यो अध्ययन प्रतिवेदन यस्तो समयमा प्रकाशित भएको हो, जब इजरायलले अन्तर्राष्ट्रिय कानुनको उल्लङ्घन गर्दै नागरिकहरूको भोकमरीलाई युद्धको विधिको रूपमा प्रयोग गरेकोमा चर्को आलोचना भइरहेको छ ।
रिपोर्टहरूले औँल्याएका छन् कि इजरायली कब्जाकारी शासनले जानाजानी गाजामा पानी, खाना र इन्धनको डेलिभरीमा रोक लगाएको छ । मानवीय सहायतामा बाधा पु¥याइरहेको छ र घेरामा राखिएको क्षेत्र गाजाका कृषि क्षेत्रहरू नष्ट गरिरहेको छ ।
नरसंहारको आक्रामकताको चरम अवस्थामा इजरायली नाकाबन्दीले गाजालाई मानवीय विपत्तिमा डुबाएको छ, जहाँ सरसफाइ र सुरक्षित पानीमा पहुँचको अभावले पानीजन्य रोगहरूको प्रकोप बढाएको छ ।
युरो–मेड अध्ययनले गाजापट्टीमा पिउने, नुहाउने र सफा गर्ने पानीसहितको पानीको पहुँचको दर प्रतिव्यक्ति प्रतिदिन १.५ लिटर रहेको पनि पत्ता लगाएको छ । यो मात्रा बाँच्नको लागि आवश्यक पानीको न्यूनतम मात्राभन्दा १५ लिटर कम छ ।
कुपोषण र सफा पिउने पानीको पहुँचको कमीको प्रभावको जाँच गर्दै, अध्ययनले गाजाका ६६ प्रतिशत बासिन्दाहरूले गत महिनामा पखाला, छालामा दाग वा आन्द्रासम्बन्धी रोगहरू अनुभव गरेका छन् ।
प्यालेस्टिनी हमास प्रतिरोधी समूहले प्यालेस्टिनी जनताविरुद्धको तीव्र अत्याचारको बदला लिन कब्जाकारी शासनविरुद्ध अपरेसन अल–अक्सा तुफान सञ्चालन गरेपछि इजरायलले अक्टोबर ७ मा गाजामा क्रूर युद्ध छेडेको थियो । आक्रमण सुरु भएदेखि, तेल अवीव शासनले कम्तीमा १९, ६६७ जना प्यालेस्टिनीहरूलाई मारेको छ, जसमा अधिकांश महिला र बालबालिकाहरू छन् र ५२, ५८६ जना घाइते भएका छन् । अझै हजारौं बेपत्ता छन् र भग्नावशेषमुनि मरेको अनुमान गरिएको छ ।
इजरायलले गाजाको मुख्य अपरेसनल अस्पतालमा आक्रमण ग¥यो : युनिसेफ
बिहीबार, संयुक्त राष्ट्र बाल कोष (युनिसेफ) का प्रवक्ता जेम्स एल्डरले खान युनिस (दक्षिणी गाजा) मा रहेको अल नासेर अस्पतालमा बालबालिकासहित धेरैको हताहत हुने गरी पछिल्लो ४८ घण्टामा दुई पटक हमला भएको बताउनुभयो ।
अस्पतालले आफ्नो घरमा आक्रमणमा घाइते भएका बालबालिकाको ठुलो सङ्ख्यामा उपचार गरिरहेको छ र सयौँ विस्थापित महिला र नाबालिगहरूलाई आश्रय प्रदान गरिरहेको छ ।
“यी आक्रमणहरूले गाजापट्टी बालबालिकाका लागि संसारको सबैभन्दा खतरनाक ठाउँ हो भन्ने कुरा फेरि देखाउँछ, यो वास्तविकता दिनानुदिन बलियो हुँदै गइरहेको छ”, एल्डरले भन्नुभयो । आक्रमणको परिणामस्वरुप पहिले नै घाइते भएर उपचार गराइरहेकी १३ वर्षीया केटी डिनासहित अनिश्चित सङ्ख्यामा केटाकेटीहरू मारिएका थिए ।
“उनी घाइते भएकी थिइन्, उनको दाहिने खुट्टा काटिएको थियो, उनले आफ्ना आमाबुबा र दुई दाजुभाइलाई गुमाएकी थिइन्, तर उनले आशा गुमाएकी थिइनन् । उनले हामीलाई आफू हुर्किएपछि वकिल बन्न चाहन्थिन्”, एल्डरले बताउनुभयो ।
“गाजाका बालबालिकाहरू अस्पताल, आश्रयस्थल वा निश्चितरूपमा तथाकथित ‘सुरक्षित क्षेत्रमा’ सुरक्षित छैनन्”, युनिसेफका प्रवक्ताले दुःख व्यक्त गर्नुभयो । इजरायलले तोकेका ती कथित सुरक्षित क्षेत्रहरूले विस्थापितहरूलाई शरण प्रदान गर्न आवश्यक सर्तहरू पूरा गर्दैनन्, आधिकारिक स्रोतले जोड दियो ।
“तिनीहरू जमिन, सडकको कुना वा पानी, सुविधा वा चिसो वा वर्षाबाट आश्रयको सम्भावनाबिना आधा–निर्मित भवनहरू मात्र हुन्”, एल्डरले जोड दिनुभयो ।
गाजाका बालबालिकाहरूमा पखालाका १,००,००० भन्दा बढी घटनाहरू र तीव्र श्वासप्रश्वाससम्बन्धी रोगहरूको करिब १,५०,००० घटनाहरू भइसकेका छन्, यद्यपि वास्तविक तथ्याङ्क अझ बढी हुनसक्छन् ।
“गाजाका बालबालिकाहरूमा कुपोषण फैलिरहेको बेला यी रोगहरू घातक हुनसक्छन्”, युनिसेफ अधिकारीले चेतावनी दिनुभयो । उहाँका अनुसार गाजाका सबैभन्दा कमजोर बालबालिकामध्ये १३०,००० भन्दा बढी दुई वर्ष मुनिका बालबालिकाले बाँच्नको लागि पर्याप्त दूध र खाना पाएका छैनन् ।
“यस परिदृश्यमा, अपर्याप्त पानी, खाना र स्वास्थ्य सेवाहरूको साथ, मानवीय युद्धविरामको साथ मात्र आउन सक्ने कुरा, रोगहरूबाट शिशु मृत्युदर बम विस्फोटको कारणले मारिएकाको सङ्ख्यालाई पार गर्न सक्छ”, एल्डरले चेतावनी दिनुभयो ।