प्रजग कोरियाद्वारा हाइपरसोनिक मिसाइलसहित ‘अत्याधुनिक’ हतियार प्रणाली परीक्षण

सियोल, ६ कार्तिक (एएफपी) । प्रजातान्त्रिक जनगणतन्त्र कोरियाले आफ्नो सुरक्षात्मक क्षमतामा उल्लेखनीय सुधार ल्याउने उद्देश्यले हाइपरसोनिक मिसाइल प्रयोग गरिएको ‘अत्याधुनिक’ नयाँ हतियार प्रणालीको सफल परीक्षण गरेको छ ।
यो विगत केही महिनायता यस्तो प्रकारको पहिलो परीक्षण हो । यो घटना अमेरिकी राष्ट्रपति डोनाल्ड ट्रम्पसहितका विश्व नेताहरू दक्षिण कोरिया भ्रमणको तयारीमा रहेका ठीक एक हप्ता अघि घटेको हो ।
प्रजग कोरियाको सरकारी समाचार एजेन्सी केसिएनएले शीर्ष सैन्य अधिकारी पाक जोङ चोनलाई उद्धृत गर्दै ‘यो नयाँ अत्याधुनिक हतियार प्रणालीले प्रजग कोरियाको आत्मरक्षात्मक प्रविधि निरन्तर सुदृढ हुँदै गएको स्पष्ट प्रमाण हो’ भनी जनाएको छ ।
एजेन्सीका अनुसार उक्त परीक्षणको उद्देश्य सम्भावित शत्रुहरू विरुद्धको रणनीतिक प्रतिरोधलाई अझ स्थिर र प्रभावकारी बनाउनु हो । प्रजग कोरियाली नेता किम जोङ–उन यस परीक्षणमा सहभागी नभएको पुष्टि गरिएको छ ।
केसिएनएले जारी गरेका तस्बिरहरूमा दुईवटा ‘हाइपरसोनिक प्रोजेक्टाइल’ राजधानी प्योङयाङको दक्षिणबाट प्रक्षेपण गरी देशको उत्तरपूर्वी भागमा रहेका लक्ष्यहरूमा प्रहार गरिएको देखाइएको छ । तस्बिरहरूमा मिसाइलले आकाशमा तीव्र गतिमा उड्दै लक्ष्यमा पुगेर कालो धुवाँ र माटोको मुस्लोबिच विस्फोट हुने क्षण पनि समावेश गरिएको छ ।
हाइपरसोनिक मिसाइलहरू ध्वनिको गतिभन्दा पाँच गुणा बढी गतिमा यात्रा गर्न सक्ने र उडानको क्रममा दिशा परिवर्तन गर्न सक्ने भएकाले तिनीहरूलाई ट्रयाक वा रोकथाम गर्न कठिन मानिन्छ । प्रजग कोरियाको यो परीक्षणलाई क्षेत्रीय शक्ति सन्तुलनमा नयाँ चुनौतीका रूपमा हेरिएको छ ।