नगरस्तरीय लोकनृत्य प्रतियोगिताका विजेताहरूलाई पुरस्कार वितरण

भक्तपुर, ३० कार्तिक । भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा निजी तथा आवासीय विद्यालय अर्गनाइजेसन नेपाल (प्याब्सन) नगर कार्य समिति भक्तपुरको आयोजनामा सम्पन्न नगरस्तरीय लोकनृत्य प्रतियोगिताको समापन तथा पुरस्कार वितरण कार्यक्रम आइतबार सम्पन्न भयो । प्रतियोगितामा सूर्योदय इ. स्कूल प्रथम, माउन्ट भ्याली इ. स्कूल द्वितीय, लिटिल वल्र्ड स्कूल तृतीय र साइनिङ स्टुडेन्ट चौथो भएका थिए ।
कार्यक्रममा नगर प्रमुख प्रजापतिले समाजको संस्कृति, परम्परा र भावना झल्किने लोकनृत्य प्रतियोगिता आयोजनाले सांस्कृतिक नगर भक्तपुरको उचाइ अझ बढेको बताउनुभयो ।
विभिन्न जातजाति र भौगोलिक क्षेत्रका मौलिक लोकनृत्यहरूको संरक्षण र प्रवद्र्धनको दायित्व हामी स्वयम्को हो भन्दै उहाँले नेपालका पुराना परम्परा, कला संस्कृति लोप हुन नदिन नयाँ पुस्तामाझ यस्ता गतिविधिहरू गर्दै लानुपर्ने बताउनुभयो ।
प्रमुख प्रजापतिले भक्तपुर नपाले स्थानीय पाठ्यक्रममार्फत विद्यार्थीहरूलाई भक्तपुरको कला संस्कृति, भाषा, चाडपर्व आदि विषय अध्ययन अध्यापन गराउँदै आएको बताउँदै विद्यार्थीहरूले आफ्नो शिक्षा र संस्कृतिलाई सँगसँगै अगाडि बढाउने प्रयासमा लाग्नुपर्ने बताउनुभयो ।
कार्यक्रमका सभापति, निजी तथा आवासीय विद्यालय अर्गनाइजेसन नेपाल
(प्याब्सन) नगर कार्य समिति भक्तपुरका अध्यक्ष शिवकुमार कोजुले प्रतियोगितामा १७ वटा विद्यालयले भाग लिएको बताउँदै नेपालको संस्कृति विश्वमाझ चम्काउने काम नेपालको लोकनृत्यबाट हुने बताउनुभयो ।
प्याब्सन भक्तपुर जिल्ला उपाध्यक्ष विजय कर्माचार्यले भक्तपुर प्याब्सनले विद्यार्थीको प्रतिभा प्रस्फुटनमा विशेष प्राथमिकतामा राख्दै वार्षिक ३० वटा भन्दा बढी अतिरिक्त क्रियाकलाप गर्दै आएको बताउनुभयो ।
कार्यक्रममा निर्णायकहरूले आफ्नो धारणा राख्नुभएको थियो । प्रमुख अतिथि प्रजापतिलगायत अतिथिहरूले विजेताहरूलाई पुरस्कार वितरण गर्नुभएको थियो ।