अमेरिकामाथि दबाब दिन आप्रवासीको भोक हडताल

संरा अमेरिका जाने भनी आ–आफ्ना देशबाट ठूलो सङ्ख्यामा हिंडेका मध्य अमेरिकी देशका जनता बसेको मेक्सिकोको तिजुआनास्थित शिविरभित्रै भारी वर्षाका कारण जलमग्न भएपछि सुरक्षित स्थानमा जाँदै आमा–छोरी । साँघुरो ठाउँमा ६ हजारभन्दा बढी आप्रवासी बस्दा त्यसै पनि त्यहाँको अवस्था भयावह थियो भने भारी वर्षाका कारण शिविरको अवस्था बस्न नमिल्ने भएको छ । अधिकारवादी संस्थाहरूले त्यहाँको अवस्थामा सुधार गर्ने प्रयास नभए कुनै पनि बेला रोगको सङ्क्रमण फैलिन सक्ने चेतावनी दिएका छन् ।
तस्वीरः एपी
तिजुआना, मेक्सिको, १४ मंसिर (एएफपी) । दश जना मध्यअमेरिकी आप्रवासी महिलाले अमेरिका प्रवेशको माग गर्दै संयुक्तराज्य अमेरिका र मेक्सिकोको सीमामा भोक हड्ताल सुरु गर्ने घोषणा गरेका छन् ।
“हाम्रो आवाज कसैले सुनेन, त्यसैले महिला आन्दोलन गर्ने निर्णयमा हामी पुगेका छौँ र हामी भोक हड्ताल गर्दैछौँ,” होन्डुरसकी क्लाउडिया मिरान्डाले बताउनुभयो । तिजुआनामा आयोजित पत्रकार सम्मेलनमा उहाँले अमेरिकी अधिकारीहरूले आप्रवासीको रुपमा अमेरिका प्रवेश गर्न र आवेदनसमेत लिन अस्वीकार गरेकामा आक्रोश व्यक्त गर्नुभयो ।
उत्तरी मेक्सिको सहर तिजुआनामा हाल छ हजारभन्दा बढी मध्यअमेरिकी अमेरिका प्रवेशको पर्खाइमा शिविरमा बसिरहेका छन् । खासगरी होन्डुरसका यी मानिस आफ्नो देशमा व्याप्त गरिबी र हिंसाबाट आक्रान्त भएर देश छाड्न बाध्य भएको बताउँछन् ।
अमेरिकी राष्ट्रपति डोनाल्ड ट्रम्पले अमेरिकी आप्रवास नीतिमै परिवर्तन गर्ने सोचाइमा छन् । उनले मध्यअमेरिकी आप्रवासी आपराधिक पृष्ठभूमिका रहेकाले स्वीकार नगर्ने बताएका छन् । सीमा क्षेत्रमा हाल हजारौं सैनिक परिचालन गरिएको छ । भोक हड्तालमा उत्रने घोषणा गरेका महिलाले मेक्सिकोमा बस्न चाहने आप्रवासीलाई मानवीय आधारमा भिसा दिन पनि मेक्सिकाली अधिकारीसँग आग्रह गरेका छन् । उनीहरूले आफ्नो भोक हडताल कति दिन गर्ने भन्नेबारेमा अझै निर्णय गरेका छैनन् ।
अमेरिकाको दक्षिणी सीमासम्म आइपुग्न करिब चार हजार किलोमिटर यात्रा गरेका होन्डुरसका करिब ५०० आप्रवासीले आइतबार अमेरिकी सीमाभित्र प्रवेश गर्ने प्रयत्न गरेका थिए । तर उनीहरूलाई अमेरिकी सीमा सुरक्षा फौजले फिर्ता पठाएको थियो । सुरक्षा फौजले अश्रुग्यास र रबरका गोली प्रहार गरेको थियो ।