भारतमा मोदी फासीवादको नृशंस दमन; देशभर आन्दोलनको उभार

नयाँ दिल्ली, ३० मंसिर । भारतको माथिल्लो सदनबाट मंसिर २५ गते विवादास्पद नागरिकता ऐन संशोधन विधेयकको विरोधमा दिल्लीको जामिलया मिल्लया इस्मालिया क्याम्पसका विद्यार्थी तीन दिनदेखि लगातार विरोध प्रदर्शन गरिरहेका थिए । ‘संसारकै सबभन्दा ठूलो प्रजातन्त्रको देश भारत’ मा विभेदकारी विधेयकको विरोधमा प्रदर्शन गरिरहेका विद्यार्थीले आइतबारको रात र सोमबारको बिहान यति भयानक होला भनी कल्पना गरेका थिएनन् सायद । प्रष्टतः मुसलमान समुदायमाथि विभेद गरिएको विधेयकको विरोधमा भएको विद्यार्थीहरूको प्रदर्शनमा आइतबार दिउँसोबाट दिल्ली प्रहरीले गरेको दमन सोमबार बिहानसम्म लगातार चालू रह्यो ।
कम्तीमा पचास जना विद्यार्थीलाई पक्राउ गरिएको र सयौँ जना विद्यार्थी घाइते भएका थिए ।
शैक्षिक निकायमा अनुमतिबिना प्रहरीको प्रवेश गैरकानुनी हो । कानुन उल्लङ्घन गर्दै दिल्ली प्रहरी जामिया कलेजमा प्रवेशमात्र गरेनन् बरु क्याम्पसको पुस्तकालय र छात्रावासमा समेत प्रवेश गरी लाठीचार्ज र अश्रुग्यास प्रहार गरे । सयौँको सङ्ख्यामा छात्रछात्राहरू गम्भीर घाइते भए । विद्यार्थीहरू क्याम्पसका कक्षा कोठा, पुस्तकालय, छात्रावास, शौचालयमा रक्तपच्छे भएर लडिरहेका थिए । रक्ताम्य बनेका विद्यार्थीलाई पनि लाठीले निर्ममतापूर्वक पिट्न प्रहरीले छोडेका थिएनन् । प्रहरीले गोली हानेको घाइते तथा प्रत्यक्षदर्शी विद्यार्थीहरूको दाबी छ । विद्यार्थीको टाउको, आँखा फुट्नुका साथै हातखुट्टा भाँचिएको थियो । मुख फुटेको थियो । तर, प्रहरीले भने गोली नहानेको बताएको छ ।
प्रहरीले पुस्तकालय र क्याम्पसकै मस्जिदबाट घिसार्दै विद्यार्थीहरूमाथि निर्मम कुटपिट गरेको थियो । सामाजिक सञ्जालमा सार्वजनिक एक भिडियोमा एक जना छात्रलाई जोगाउन छात्राहरूले प्रहरीको प्रतिकार गरेका थिए । छात्राहरूबीचमा रहेको छात्रलाई समेत प्रहरीले छिनेर निर्घात कुटपिट गरेको थियो ।

जामिया क्याम्पस छोड्दै विद्यार्थी