– सुभानु आचार्य
ललितपुर, १५ चैत । ललितपुर महानगरपालिका–१० निवासी राजेश महर्जनले बजारमा मास्क र स्यानिटाइजर खोजेको धेरै दिन भयो । उहाँले मास्क र स्यानिटाइजर पाउन नसकेपछि साबुनपानीले मात्र हात धुने गरेको गुनासो गर्नुभयो । “खोइ महानगरपालिकाले स्यानिटाइजर बनाएर जनतालाई प्रयोग गर्न दिन्छ रे भन्ने सुनेको थिएँ । बजारमा खोज्न गएँ न मास्क छ न त स्यानिटाइजर । यो त प्रचारमात्र हो कि भन्ने आभास भइरहेको छ”, उहाँले भन्नुभयो ।
महानगरपालिका वडा नं १६ निवासी राकेश चित्रकारले पनि बेलाबेलामा खुद्रा पसलमा गई स्यानिटाइजर र मास्क खोज्दा पाउन नसकेको दुखेसो गर्नुभयो । उहाँले भन्नुभयो, “प्रचारै ठूलो कुरा रहेछ, बजारमा यी वस्तु पाइन्छ भनेर खोज्दा पाउन सकिएको छैन । टोलटोलमा जनताले पाएको दुःख कसले पो देखेको छ र ? घरमा बालबच्चा छन् । जति खेर पायो त्यति खेर कोठा बाहिर निस्केर आँगनमा खेल्न पुगिहाल्छन् । यदि साबुनपानीको साथमा उनीहरूलाई स्यानिटाइनर प्रयोग गरिदिन पाए कोभिड–१९को त्रास हट्ने थियो ।” उहाँले भन्नुभयो, “चाहिएको समयमा मास्क र स्यानिटाइजरको अभाव भएसँगै लक डाउन खुलेपछि कि त आफँैले बनाउने वा कि खोज्न जाने हुँदा महानगरसँगै भरपर्नुपर्दैन । स्थानीय उत्पादन तीनपाने रक्सीलगायतका कच्चा पदार्थ मिलाएर महानगरपालिकाले स्यानिटाइजर बनाउन सुरु गर्दा पनि पाउन नसक्नु दुर्भाग्यको कुरा भएको छ ।”
महानगरको वडा नं २१ निवासी ज्ञानलक्ष्मी महर्जनले बजारमा स्यानिटाइजरको अभाव भएको सुनेर दैनिक स्प्रिट र साबुनपानी प्रयोग गर्ने गरेको बताउनुभयो । उहाँले भन्नुभयो, “बजारमा न त मास्क छ न त स्यानिटाइजर नै । हामीहरू घरबाट बाहिर खाद्यान्न किन्न निस्कँदा कसरी सङ्क्रमणबाट जोगिने होला । महानगरपालिकाले मास्क र स्यानिटाइजर बनाएर वितरण गर्ने कुरा टेलिभिजनबाट सुन्दा मुलुक विकासको गतिमा लम्कियो भन्ने खुसी लागेको थियो । यो त प्रचारजस्तो मात्र लागिरहेको छ ।” देशमा कोरोनाको सङ्क्रमण बढिरहँदा यस्ता सानातिना चिजको अभाव हुनु गम्भीर विषय भएको महर्जनको भनाइ थियो ।
महानगरपालिकाले गत फागुन २६ गतेदेखि २९ गतेसम्म हरेक वडाका दुई गरी ६० महिलालाई मास्क बनाउने तालिम दिए तापनि बजारमा मास्कको माग पूर्ति हुन सकेको देखिँदैन । महानगरपालिकाले मास्कको अलावा यहाँका नागरिकलाई १० जनाको दरले छ दिनसम्म ६० लाई स्यानिटाइजर बनाउने तालिमसमेत दियो, तर हाल यसको सेवाग्राहीले परिणाम प्राप्त गरेका छैनन् ।
महानगरपालिकाको समाज कल्याण महाशाखाले केही दिन पहिला बनाइएको लगभग ५०० लिटर स्यानिटाइजर प्रत्येक वडाका केही स्थान र महानगरपालिकामा प्रयोग गरिरहेको सामाजिक विकास समिति संयोजक दिनेश कार्कीले बताउनुभयो । उहाँले भन्नुभयो, “मास्क र स्यानिटाइजर उत्पादन गर्ने त भन्यौँ, तर, यसमा प्रयोग हुने सामग्री लक डाउनका कारण लिन जान पाएका छैनौँ । यी सामग्री अभावका कारण आफूहरूले अघि बढाएको योजना सशक्तरूपमा कार्यान्वयन हुन नसकेको कार्कीले स्वीकार गर्नुभयो ।
महानगरपालिकाले पाँच–पाँच लिटर स्यानिटाइजर प्रत्येक वडामा पठायो तर सर्वसाधारणले भने घरघरबाट यसको सेवा लिन पाएका छैनन् । “हामीले बनाएको स्यानिटाइजर र मास्क प्रत्येक वडाका व्यक्तिलाई दिन नसकेकोमा लज्जित भइरहेका छौँ ।” महानगरपालिकामा कार्यरत स्वास्थ्यकर्मी र स्वास्थ्य स्वयंसेवकले मास्क र स्यानिटाइजर प्रयोग गरिरहेको कार्कीको भनाइ छ ।
स्वास्थ्य शाखामा कार्यरत स्वास्थ्यकर्मीले लगाउने पोशाक पर्सनल प्रोटेक्टिभ इक्विपमेन्ट (पीपीई) र थर्मोमिटर गनको समेत अभाव भइरहेको जनाइएको छ । महानगरपालिकाले १०० एमएल स्यानिटाइजरको रु. १५० लिने घोषणा गरिरहँदा यहाँ कच्चा सामग्री नै अभाव भइरहेको बताइएको छ । लक डाउन खुलेसँगै सामग्री ल्याएर महानगरवासीको आवश्यकता पूर्ति गरिने कार्कीले जानकारी दिनुभयो ।
(रासस)

Leave a Reply

Your email address will not be published. Required fields are marked *