विश्वका जनताको नाममा भेनेजुयाली राष्ट्रपति माडुरोको चिठी

निकोलस माडुरो मोरोस
विश्वका जनताको नाममा
म यहाँहरूमा प्रेमपूर्ण अभिवादन गर्दछु । भेनेजुयलाको शान्ति र स्थिरताविरुद्ध भइरहेका कयौँ घटनाहरूको निन्दा गर्दै म यहाँहरूलाई सम्बोधन गर्ने स्वतन्त्रता चाहन्छु । विश्वव्यापी महामारी बनेको कोरोना भाइरस सङ्क्रमण फैलिरहेको बेलामा राज्य र सरकारहरूको ध्यान आफ्ना देशका जनताको स्वास्थ्य र जीवन रक्षामा केन्द्रित हुनुपर्छ भन्ने हाम्रो ठहर छ ।
पहिले नै सर्वजनिक भएको तथ्य हो कि गएको मार्च २६ का दिन संरा अमेरिकी सरकारले भेनेजुयाली गणतन्त्रका राष्ट्रपति निकोलस माडुरोलगायत राज्यका उच्च अधिकारीहरूको एक समूहमाथि निकै गम्भीर आरोप घोषणा ग¥यो । (केही दिन अगाडि भेनेजुयाली सरकार अधिकारीहरूमाथि लागूपदार्थ ओसारपसार र आतङ्कवादलाई सहयोग गरेको झूटो आरोप लगाएको थियो ।– अनु.)
अमेरिकी न्याय प्रणालीभित्र औपचारिक अभियोग दायर नगरिकनै चालिएको संरा अमेरिकाको त्यस कदम आफैमा गैरकानुनी त छँदै छ बरु त्यो लागूपदार्थ ओसारपसार र आतङ्कवादलाई सहयोग गरेको झूटो आरोप भेनेजुयाली सरकारलाई अपदस्थ गर्ने एउटै नियतले नै अगाडि बढाएको थियो ।

क्यारिबियाली समुद्रमा भेनेजुयाली भूमि नजिक पुगेको संरा अमेरिकी जल सेनाका युद्धपोतहरू

भेनेजुयालविरुद्धको यस्ता अन्यायोचित आक्रमणहरूको निन्दा र प्रतिवाद वासिङ्गटनले आउँदा दिनमा विश्वका अरू देशका सरकार र जनताविरुद्ध गरिने त्यस्तै अभियान रोक्नका लागि धेरै उपयोगी हुन सक्नेछ । विश्वलाई अत्यधिक एकपक्षीयतावादका कारण अन्तर्राष्ट्रिय अराजकतामा जानबाट रोक्न हामी सबै संयुक्त राष्ट्रसङ्घको बडापत्रको सिद्धान्तमा कटिबद्ध रहनैपर्छ ।

यी गम्भीर तथ्यहरूको निन्दा गर्दागर्दै पनि भेनेजुयला सबै देशहरूसित आपसी आदर र सहयोग कायम गर्नुपर्नेमा जोड दिन्छ । कोभिड–१९ को महामारी फैलिएको आजको अतुलनीय अवस्थामा विश्वका सबै जिम्मेवार सरकारहरूले मिलेर काम गर्नुपर्छ र आफ्ना मतभिन्नताहरू एकातिर राख्नुपर्दछ ।
यस्तो गम्भीर परिस्थितिमा दोस्रो विश्वयुद्धपछि बदनाम म्याकार्थीवादको नयाँ संस्करणको माध्यमले संरा अमेरिकाले लगाएका मनपरी आरोप र चालेका कदमको प्रतिरोधमा यहाँहरूको अमूल्य साथ र समर्थनका लागि अनुरोध गर्दछु । त्यतिखेर अमेरिकी शासकहरूले कम्युनिस्टहरूमाथि मुद्दा चलाउन र सजाय दिन अनेक लाञ्छना एवम् अभियोग लगाउने गर्दथे, आजजस्तो तिनीहरूले आफूलाई मन नपरेकाहरूलाई बिना कुनै सबूत प्रमाण आतङ्कवादी वा लागू पदार्थ कारोवारीको कित्तामा राखिदिने गर्छन् ।
भेनेजुयालविरुद्धको यस्ता अन्यायोचित आक्रमणहरूको निन्दा र प्रतिवाद वासिङ्गटनले आउँदा दिनमा विश्वका अरू देशका सरकार र जनताविरुद्ध गरिने त्यस्तै अभियान रोक्नका लागि धेरै उपयोगी हुन सक्नेछ । विश्वलाई अत्यधिक एकपक्षीयतावादका कारण अन्तर्राष्ट्रिय अराजकतामा जानबाट रोक्न हामी सबै संयुक्त राष्ट्रसङ्घको बडापत्रको सिद्धान्तमा कटिबद्ध रहनैपर्छ ।
विश्वका दाजुभाइ दिदीबहिनीहरू, भेनेजुयला कुनै पनि परिस्थितिमा शान्तिको निम्ति लड्न दृढ रहनेमा तपाइँहरू निश्चित रहन सक्नुहुन्छ र त्यस्तै नै हुनेछ । जस्तै विध्वंसकारी कुनै पनि साम्राज्यवादी आक्रमणले हामीलाई सार्वभौम र स्वाधीनताको मार्गबाट विचलित पार्न सक्नेछैन, जुन हामीले दुईसय वर्षदेखि कायम गर्दैआएका छौँ । न त हामीलाई कोभिड– १९ को विश्वव्यापी महामारीविरुद्ध लड्न र जनताको जीवन बचाउने कार्यमा लाग्ने हाम्रो पवित्र कटिबद्धताबाट कसैले टाढा बनाउन सक्छ ।
म यस समय भेनेजुयाली जनताको तर्फबाट महामारीको असरबाट प्रताडित हुनुभएका सम्पूर्ण जनतामा ऐक्यबद्धता र सहानुभूति व्यक्त गर्दछु । आजको सबै कठिन अनुभवहरूबाट हामीले लिनुपर्ने शिक्षा भनेको निश्चितरूपमा हामी मिलेर सँगसँगै मात्र अघि बढ्न सक्छौँ भन्ने नै हो । जुन राजनीतिक र आर्थिक प्रणालीले स्वार्थीपन र व्यक्तिवादको वकालत गर्दछ, त्यो प्रणाली आजको स्थितिको सामना गर्नमा पूर्णतयाः असफल भइसकेको देखाएको छ । तसर्थ, न्याय र सामाजिक समानतासहितको नयाँ विश्वतिर दृढताका साथ अगाडि बढौँ र हाम्रो कार्यको केन्द्र मानव जातिको आवश्यकता परिपूर्तिलाई बनाऔँ ¤
म यस अवसरमा हामी र अरू धेरै देशहरू समेत पीडित रहेको आपराधिक आर्थिक नाकाबन्दीको निन्दा गर्दै यहाँहरूले हाम्रो देश र हाम्रा जनताप्रति स्थायीरूपमा व्यक्त गर्दै आउनुभएको ऐक्यबद्धताका निम्ति आभार प्रकट गर्दछु । साथै, यस अवसरलाई उपयोग गर्दै यहाँहरूप्रतिको आदर र प्रेमलाई जोड दिँदै साम्राज्यवादविरुद्ध निरन्तर एकताबद्ध हुन तथा आशा र स्वाभिमानको नयाँ भविष्य रोप्नका लागि आमन्त्रण गर्दछु ।
काराकस, २९ मार्च २०२०
नेपाली अनुवाद ः प्रकाश