अमेरिकी प्रजातन्त्रको सीमा र कमजोरी
- बैशाख ५, २०८१
एउटा भनाइ छ– ‘मानिस मरेपछि उसलाई खल्ती काम लाग्दैन ।’ तर, लोभीपापी मानिस मरेर पनि खल्तीभरि पैसा बोकेर लगौँला जस्तै गरी अनेक कृत्य गरी धनार्जन गर्न खोज्छन् । कोभिड–१९ महामारीले सम्पूर्ण मानव समाज अनिश्चित भविष्यबाट त्रसित बनिरहेको समयमा नेपालका केही लोभीपापी र भ्रष्टाचारीहरूको निम्ति भने यो समय मालामाल बन्ने मौका बनेको छ ।
भरतपुर महानगरपालिकाले कोभिड–१९ महामारी प्रतिरोध गर्न स्थापना गरेको कोभिड अस्पतालका कर्मचारीहरू राति अस्पताल आएर भण्डार शाखाबाट सामान चोरी गरेको समाचार प्रकाशमा आएको छ । सुरुदेखि नै भ्रष्टाचार र कमिसनको कारण चर्चामा रहेको अस्पतालका कर्मचारीहरू नै राति अस्पतालमा आएर सामान चोरेर लगेका थिए । उनीहरूले सामान चोर्दै गरेको सीसीटीभी क्यामरामा अभिलेखिकृत दृश्य सामाजिक सञ्जालमार्फत सार्वजनिक भएपछि अस्पतालभित्रका कर्तुत बाहिरिएको हो । चोरिएका केही सामान कर्मचारीहरूले घरमा लगेको र बाँकी स्थानीय एक मेडिकल पसललाई बेचिएको कुरा पनि सार्वजनिक भएको छ । कोभिड–१९ महामारी अझ उकालो चढिरहेको बेलामा कोभिडकै उपचारको लागि स्थापना गरिएको अस्पतालका कर्मचारीहरूबाटै सामान चोरी भएपछि अख्तियार दुरुपयोग अनुसन्धान आयोगले मङ्गलबार नै अस्पताल र भरतपुर नगरपालिकामा छापा मारेको छ ।
चोरीको घटना नचिताएसरि छताछुल्ल भएपछि विभिन्न राजनीतिक दलहरू आ–आफ्ना मानिसको संरक्षणमा लागेका छन् । विशेषतः सत्तारुढ दल नेकपाले चोरीमा संलग्न कर्मचारीहरूलाई जोगाउन अनेक चलखेल गर्न थालेको छ । बाग्मती प्रदेश सरकारको दुई करोड रुपैयाँ सहयोगमा स्थापना भएको सो अस्पतालको लागि आवश्यक सामान बिनाटेन्डर प्रक्रिया खरिद गरिएको भनी यसअघि नै विवादास्पद बनेको छ । अहिले सत्तासँग नजिक कर्मचारीले नै त्यहाँका सामान चोरेर बेच्नुबाट सरकारी सम्पत्तिको लुटपाट गर्न सत्तारुढ दलकै मानिस लागिपरेको देखापर्छ । सत्तासीन दलका मानिसहरूले सरकारका पैसा यसरी लुटेको उदाहरण योमात्र पक्कै होइन । यसअघि स्वास्थ्य मन्त्रालयले खरिद गर्न खोजेको अत्यावश्यकीय चिकित्सक सामग्री खरिदमा सरकार नजिक मानिसहरूको ओम्नी कम्पनीले गर्न खोजेको भ्रष्टाचारको समाचारमा खत बसिसकेको छैन । सञ्चार माध्यम र जनताको व्यापक विरोधपछि ओम्नीबाट भ्रष्टाचार हुन पाएन ।
विपद्को बेला सत्ता नजिकका मानिसहरूले अहिले पनि विभिन्न आवरणमा भ्रष्टाचार गरिरहेका छन् । भोकालाई भोजनदेखि राहत वितरणसम्म, अस्पताल निर्माणदेखि चिकित्सकीय सामग्री खरिदसम्ममा सत्तारुढ दल वरपरका मान्छेले आर्थिक हिनामिना गरिरहेका छन् । सुन्दा गरिब र दुःखीको सेवा र सहयोग गरिरहेको जस्तो लागे पनि वास्तवमा उनीहरू कमाउधन्धामा लागेका छन् । भोकालाई खुवाउने नाममा व्यापारीहरू आफ्नो गोदाममा रहेका कमसल र कुहिएको चामल सरकारलाई बेचिरहेका छन् । स्थानीय तहले राहतका नाममा आफ्ना कार्यकर्ता र समर्थकलाई मोटाउन दिइरहेका छन् । कति स्थानीय तहमा स्वास्थ्य उपकरण र अत्यावश्यक सामान खरिदको नाममा कमिसन र घोटालाका घटना भइरहेका छन् । भरतपुरको घटना सीसीटीभीको श्रव्यदृश्य अभिलेखीकृत भएको कारण बाहिरियो । आशा गरौँ, चोरी गर्ने दोषी कर्मचारीलाई कारबाही हुनेछ । सत्ताको आडमा दोषीलाई उन्मुक्ति दिने गल्ती कसैबाट नहोस् । कति निकायमा यस्ता भ्रष्टाचार र घोटाला भागबन्डा र सहमतिमा भइरहेका छन् । समाजको जरा–जरासम्म पुगेको भ्रष्टाचारको जरा उखेल्न नसकुञ्जेल देशमा परिवर्तनको कुरा एकादेशको कथामा मात्र सीमित हुनेछ ।
विडम्बना, यस्तो महामारीको समयमा मानिसको रक्षाको लागि बनाइएको अस्पतालको सामान समेत चोर्ने मानिसहरू मर्दा तिनीहरूसँग कति खल्ती होला कुन्नि !
Leave a Reply