सहिद र योद्धाहरूप्रति व्यवहारमै सम्मान आवश्यक

२०४६ सालको ऐतिहासिक जनआन्दोलनको प्रातः स्मरणीय वीर सहिदहरूको सम्मानमा नेपाल क्रान्तिकारी किसान सङ्घ भक्तपुर जिल्ला समितिको आयोजनामा ३२ औँ सहिद दिवस शनिबार सहिद स्मृति उद्यानमा सम्पन्न भयो ।
कार्यक्रममा नेपाल मजदुर किसान पार्टीका केन्द्रीय सदस्य एवम् भक्तपुर नगरपालिकाका प्रमुख सुनिल प्रजापतिले सहिद र योद्धाहरूप्रति शब्दमा मात्र सम्मान र आदर गरेर नपुग्ने उल्लेख गर्दै हाम्रो व्यवहार र नीति निर्णयमै त्यसको प्रभाव हुनुपर्ने बताउनुभयो ।
उहाँले अगाडि भन्नुभयो, “नागरिकहरूका लागि राजनीतिक स्वतन्त्रतासँगसँगै व्यक्तित्व विकासमा समान अवसर, निःशुल्क शिक्षा र स्वास्थ्योपचारको अधिकार, युवाहरूका लागि रोजगार र रोजगारअनुसारको पारिश्रमिक, महिलाका लागि शिक्षा र रोजगार आदि सहिदका सपना थिए । सहिद र योद्धाहरूप्रति शब्दको औपचारिकतामा होइन व्यवहारमै सम्मान र आदर गर्न आवश्यक छ ।”
देशको कृषि क्षेत्रमा विदेशी लगानी भित्याउने सरकारको निर्णयले देशको कृषि क्षेत्रलाई विदेशी एकाधिकार पुँजीको चङ्गुलमा पु¥याउने चर्चा गर्दै उहाँले त्यसले एक एक पाइला गर्दै देशलाई नवउपनिवेश बनाउने हुँदा सरकारको गलत नीति र निर्णयको विरोध आवश्यक रहेको बताउनुभयो ।
जनताको बलिदानले बहुदलीय प्रजातन्त्र स्थापना भएको ३२ वर्षसम्म पनि शासक दलहरूले जनअपेक्षाअनुसार काम गरेर देशलाई सही दिशामा अगाडि बढाउन नसकेको प्रस्ट पार्नुभयो ।
कार्यक्रममा नेमकिपाका केन्द्रीय सदस्य एवम् नेक्राकिसङ्घका केन्द्रीय अध्यक्ष डिल्लीप्रसाद काफ्लेले गुटगत र दलगत स्वार्थमा लागेर शासक दलहरूले सहिदको भावना बुझ्न नसकेको र सहिदको बलिदान र योद्धाहरूको योगदानको अपमान गरिरहेको बताउनुभयो ।
उहाँले अगाडि भन्नुभयो, “शासक दलहरू असफल भएको कुरा आज हामीले मात्र भनिरहेका छैनौँ, उनीहरू आ–आफैले स्वीकार गरेका छन् । जनताले अब ती दलहरूलाई फेरि विश्वास गर्नुहुन्न ।”
उहाँले समाजवादी व्यवस्था स्थापनाका लागि सङ्घर्ष अगाडि बढाउनु नै सहिद र घाइते योद्धाहरूप्रति साँचो सम्मान हुने औँल्याउनुभयो ।
कार्यक्रममा जनआन्दोलन २०४६ का घाइते योद्धाहरूका प्रतिनिधि राजेन्द्र दुमरुले जनआन्दोलनको क्रममा भएको प्रहरी दमन र जेलमा रहँदाको अनुभव सुनाउनुभयो ।
कार्यक्रमका सभापति एवम् नेक्राकिसङ्घ भक्तपुर जिल्ला समितिका अध्यक्ष गोविन्द दुवालले नेमकिपाले आफ्ना हरेक कार्यकर्तालाई राजनीति व्यापार–व्यवसाय होइन, निःस्वार्थरूपमा देश र जनताको सेवाको रूपमा लिनुपर्छ भनी सिकाइरहेको बताउनुभयो ।
उहाँले जनआन्दोलन २०४६ मा भक्तपुरका जनताको बलिदानीपूर्ण सङ्घर्षले पञ्चायतविरुद्धको जनआन्दोलनमा ऊर्जा थपेको कुरा अन्य जिल्लाका जिम्मेवार मानिसहरूबाट सुनेको बताउनुभयो ।
कार्यक्रममा आयोजक समितिका उपाध्यक्ष केशवप्रसाद तिमिल्सेना र सचिव नारायणभक्त न्हेमाफुकीले पनि बोल्नुभएको थियो ।
कार्यक्रममा प्रमुख अतिथि, अतिथि, घाइते योद्धा प्रतिनिधि तथा सहिदका परिवारले सहिदका प्रतिमामा माल्यार्पण तथा पुष्पगुच्छा अर्पण गर्नुभएको थियो ।