भर्खरै :

भक्तपुर नपाद्वारा यस वर्ष ११९ जना विद्यार्थीहरूलाई शैक्षिक ऋण प्रदान

भक्तपुर, २५ चैत । भक्तपुर नगरपालिकाले नगरपालिका क्षेत्रभित्र स्थायी बसोबास गरेका ११९ जना जेहेनदार तथा विपन्न विद्यार्थीहरूलाई शैक्षिक योग्यताको (एकेडेमिक सर्टिफिकेट) धितो राखेर स्वदेशमै उच्च शिक्षा अध्ययन गर्ने विद्यार्थीहरूको लागि सहुलियत ब्याजदरमा बुधबार शैक्षिक ऋण वितरण प्रदान गर्न सम्झौता सुरू गरेको छ ।
भक्तपुर नगरपालिकाका प्रमुख सुनिल प्रजापतिको आतिथ्यमा बुधबार ख्वप कलेजको सभाहलमा शैक्षिक ऋणको लागि आवेदन परेकामध्ये अन्तर्वार्ताबाट छनोट हुन सफल विद्यार्थीलाई शैक्षिक ऋण वितरण कार्यक्रम भयो ।
कार्यक्रममा नगर प्रमुख प्रजापतिले ऋणको सही सदुपयोग गर्न विद्यार्थी एवम् अभिभावकलाई आग्रह गर्नुभयो । भक्तपुर नपाले शैक्षिक विकासको लागि गरेका प्रयासहरूबारे विद्यार्थीलाई अवगत गराउँदै उहाँले भक्तपुर शैक्षिक केन्द्रको रूपमा विकास हुन सफल भएकोमा नपाले सञ्चालन गरेका कलेज र यहाँका शैक्षिक संस्थाहरूको भूमिका र योगदान ठूलो रहेको बताउनुभयो ।
उहाँले आर्थिक कारणले गर्दा कोही पनि पढाइबाट वञ्चित हुन नपरोस् भनी शैक्षिक ऋणको अवधारणा अगाडि सारेको बताउँदै आफ्नो विषयमा दक्षता हासिल गरी देश र समाजको सेवाको लागि काम गर्न मार्गनिर्देश गर्नुभयो ।
जनताको आधारभूत आवश्यकताभित्र पर्ने शिक्षा र स्वास्थ्य निकै महगिँदै गएको वर्तमान अवस्थामा नगरपालिकाले गरिब तथा जेहेनदार विद्यार्थीको निम्ति छात्रवृत्तिको व्यवस्था गरेको चर्चा गर्दै प्रमुख प्रजापतिले भक्तपुर नपा ख्वप विश्वविद्यालय सञ्चालन स्वीकृतिको पर्खाइमा रहेको बताउनुभयो ।
कार्यक्रममा भक्तपुर नपा वडा नं. ९ का वडाध्यक्ष रवीन्द्र ज्याख्वले भक्तपुर नपाले शिक्षालाई उच्च प्राथमिकतामा राख्दै शैक्षिक ऋण, छात्रवृत्ति प्रदान गर्दै आइरहेको चर्चा गर्दै भक्तपुर नपाले सञ्चालन गरेका शैक्षिक संस्थामा अध्ययन गर्न चाहने विद्यार्थीहरूमा प्रतिस्पर्धा हुने गरेको बताउनुभयो ।
भक्तपुर नपाका प्रमुख प्रशासकीय अधिकृत रामलाल श्रेष्ठले शैक्षिक योग्यताको प्रमाणपत्र धितो राखेर न्यून ब्याजदरमा रू. पाँच लाखसम्मको रकम वितरण कार्य अरू स्थानीय तहको लागि सिक्न योग्य भएको बताउँदै भनपाको यो कदमले देशको सेवामा समर्पित सभ्य, सुसंस्कृत र सक्षम नागरिक तयार गर्न महत्वपूर्ण भूमिका खेल्ने धारणा राख्नुभयो ।

Leave a Reply

Your email address will not be published. Required fields are marked *