हाम्रो मौलिक परिचय कायम राखियोस्
- बैशाख ६, २०८१
कम्युनिस्ट पार्टीको घोषणापत्र बुझ्न कसैको व्याख्या सुन्नुभन्दा यो पढ्नु पर्दछ । कुनै उपन्यास वा नाटक झैँ यो सारांश भन्न सक्ने विषय पनि होइन किनभने यसका एकएक लाइन नै सारांशको रूपमा छ, व्याख्या छैन । माक्र्स र एँगेल्सले तत्कालीन परिस्थितिमा कम्युनिस्ट पार्टीको घोषणापत्र प्रकाशित गर्नुभयो । त्यसमा उहाँहरूले आफूले भन्नुपर्ने मुख्य कुरा एकदम छोटकरीमा राखी केही पृष्ठमा नै सम्पूर्ण घोषणापत्र सिध्याउनुभएको छ । घोषणापत्रको सुरुमै भनिएको छ– “स्पेक्टर अफ कम्युनिज्म ।” स्पेक्टरको नेपाली अर्थ ‘प्रेत’ अथवा मरेको मानिस हुन्छ । त्यसबेला कम्युनिस्टहरूको खतरा छ भनी सम्पूर्ण युरोपभरि फैलाइएको थियो । घोषणापत्र प्रकाशित भएको समयमा सबै देशहरूमा जनविरोधी प्रतिक्रियावादीहरूको शासन थियो । कतै सामन्ती तानाशाही थियो त कहीँ गणतन्त्र आइसके पनि पुँजीपतिहरूको तानाशाही थियो । जब कम्युनिस्ट सिद्धान्त एवम् विचारको कुरा आयो, परस्पर लडिरहेका सामन्त र पुँजीपतिहरू पनि एक भए ।
‘कम्युनिस्ट पार्टीको घोषणापत्र’ माक्र्स र एँगेल्सले सबभन्दा पहिले फेब्रुअरी १८४८ मा पर्चाको रूपमा निकाल्नुभएको थियो । मैले हालसालै एउटा पत्रिकामा पढेँ – फेब्रुअरी १, १८४८ भनेर । उहाँहरूले १८४७ को डिसेम्बरबाट घोषणापत्र लेख्न सुरु गरी करिब २ महिनापछि १८४८ को जनवरीमा पूरा गर्नुभयो । त्यसपछि त्यसलाई पुस्तकाकारमा प्रकाशित गर्नुपूर्व एउटा पर्चाको रूपमा सार्वजनिक गर्नुभयो । त्यो सार्वजनिक गरिएको मिति १८४८ बाट १९९८ मा १५० वर्ष हुन्छ । अहिले हामी यो वर्षलाई १५० औँ वर्षगाँठ भनी मनाइरहेका छौँ । यस वर्षभरि कम्युनिस्ट घोषणापत्रको महत्व र नेपालको कम्युनिस्ट आन्दोलनमा यसबाट लिनुपर्ने शिक्षा उजागर गर्ने उद्देश्यले देशका विभिन्न कम्युनिस्ट पार्टीहरू मिलेर एउटा समूह बनाइएको छ । त्यस समूहमा नेकपा (एमाले) सम्मिलित छैन । घोषणापत्रको मुख्य उद्देश्य मजदुर वर्गको अधिनायकत्व र वर्गसङ्घर्षलाई एमालेले छोडेको अर्थात् भनूँ, माक्र्स र एँगेल्सको कम्युनिस्ट घोषणापत्रको मुख्य ‘स्पीरिट’ नै त्यागिसकेकोले उहाँहरू त्यस समूहमा अटाउन सक्नुभएन ।
कम्युनिस्ट घोषणापत्र अहिलेसम्म कति सान्दर्भिक छ भन्ने कुरा धेरैले उठाउने गर्छन् । यस विषयमा का. किम इल सुङ र का. किम जङ्ग इलका कृतिहरूमा लेखिएको छ, “माक्र्सले १८४८ मा अर्थात् १४९ वर्ष पहिले कम्युनिस्ट घोषणापत्र प्रकाशित गर्नुभएको थियो । अहिलेसम्ममा परिस्थिति धेरै बदलिसकेको छ । त्यसकारण, त्यसका धेरै कुराहरू बदल्नुपर्छ तर बदल्नुको अर्थ त्यसलाई त्याग्नु होइन ।” अरूको कुरा छोडौँ माक्र्स र एँगेल्स स्वयम्ले घोषणापत्र पहिलो पटक प्रकाशित भएको २५ वर्षपछि अर्थात् सन् १८७२ को जर्मनी भाषाको नयाँ संस्करणको भूमिकामा भन्नुभएको थियो– “२५ वर्षमा विश्वको खासगरी युरोपको परिस्थिति धेरै नै बदलिसकेको छ । त्यसकारण, हामीले घोषणापत्रमा क्रान्तिको लागि के के कदम उठाउनुपर्छ भनेर लेखेका छौँ । त्यसमा सिद्धान्तमा जोड दिएर भन्छौँ, सिद्धान्त अहिले पनि ठीक छ किनभने त्यो वैज्ञानिक सिद्धान्त हो ।” मतलब, २५ वर्षभित्रै उहाँहरूले आफ्नो कार्यक्रम बदल्नुपर्ने सोच्नुभयो । अहिले त १५० वर्ष भइसकेको छ यस विषयमा धेरै नै सोच्नुपर्ने देखिन्छ ।
माक्र्स र एँगेल्सले घोषणापत्रमा कम्युनिस्ट सिद्धान्तलाई विज्ञानको रूपमा व्याख्या गर्नुभएको छ । विभिन्न दर्शनमा पनि पहिलो वैज्ञानिक दर्शन माक्र्सको द्वन्द्वात्मक भौतिकवाद हो । विज्ञान भनेको आफ्नो अनुभव र प्रयोगबाट निकालेको ज्ञान हो । उहाँहरूले भन्नुभयो– “अहिलेसम्म जति पनि समाजहरू आए, ती सबै समाजको इतिहास वर्गसङ्घर्षको इतिहास हो ।” उहाँहरूले वर्गसङ्घर्षको नारा दिनुभएको होइन, वर्गसङ्घर्ष गर्नुपर्छ भन्नुभएको पनि होइन, वर्गसङ्घर्ष त भइआएको कुरा हो भन्नुभयो । उहाँहरूले वर्गसङ्घर्षकै क्रममा समाजवाद र साम्यवाद आउँछ भन्नुभयो । उहाँहरूले समाजवाद ल्याउनुपर्छ भन्नुभएन, यही विषय हामीले कहिल्यै बिर्सनु हुँदैन । माक्र्सभन्दा पहिले पनि धेरै समाजवादीहरू आएका थिए, जस्तो ः सेन्ट साइमन, रोवर्ट आवेन । अझ प्राचीनकालमा कति समाजवादीहरू आए होलान्, उनीहरू सबैले पुँजीवादी समाजले हामीलाई अन्याय ग¥यो शोषण ग¥यो, त्यसैले यो ठीक भएन र हामीलाई समाजवाद चाहियो भने । तर, समाजवाद कुनै असल मान्छेको सदासयबाट आउने होइन । कसैले यस्तो भए हुन्थ्यो भनेर पुकार गर्र्र्दैमा समाजवाद आउने होइन । माक्र्स र एँगेल्सले समाजवाद यसरी, यस प्रकारले, यो यो क्रमबाट आउँछ भनेर देखाउनुभयो ।
माक्र्सको अब्जर्भेसन (अवलोकन) मा पनि गल्ति भएको छ । पछि उहाँहरूले नै स्वीकार गर्नुभयो । जस्तो, अहिलेसम्म आएका सबै समाजहरूको इतिहास वर्गसङ्घर्षको इतिहास हो भनी उहाँहरूले भन्नुभयो तर समाजको विकासक्रमको एक चरण पुगेपछि मात्र वर्गसङ्घर्र्ष आएको थियो । मानिसहरू शिकार गरी सब मिलेर खान्थे, पाइएका कुराहरू बाँडीचुँडी खान्थे, वर्गसङ्घर्र्ष थिएन किनभने त्यसबेला वर्ग नै विकास भएको थिएन । जब व्यक्तिगत सम्पत्तिको विकास भयो, वर्गको सुरुआत भयो र त्यससँगै आयो वर्गसङ्घर्ष पनि । त्यसकारण, एँगेल्सले माक्र्सको निधनपछि भन्नुभयो –“लिखित इतिहास जुन बेलादेखि आयो त्यसबेलादेखि वर्गसङ्घर्ष आयो ।” सन् १८७१ मा पेरिस कम्युनको अनुभव प्राप्त गरेपछि घोषणापत्रमा एउटा अर्काे सुधार गर्नुप¥यो । यहाँनिर पेरिस कम्युनको विषयमा एउटा रोचक प्रसङ्ग उल्लेख गँरू– पेरिस कम्युनको आन्दोलन सुरु हुनुपूर्व परिस्थिति ठीक छैन भनी माक्र्सले त्यसको विरोध गर्नुभयो र जब उहाँको विरोध हुँदाहुँदै पनि पेरिस कम्युनको विद्रोह भयो, तब माक्र्सले समर्थन गर्नुभयो । मान्छेहरूले तपाईँले सुरुमा पेरिस कम्युनको विरोध गर्नुभयो तर अहिले किन समर्थन गर्नुभएको भनी सोध्दा उहाँले– “पेरिस कम्युन त आखिर मजदुरहरूले गरेको विद्रोह हो, सर्वहारा वर्गको आन्दोलन हो, यो सफल हुनेनहुने अर्कै कुरा हो । मैले विरोध गरेको त क्रान्ति सफल हुँदैन भनेर हो । अहिले पनि सफल हुँदैन नै भन्छु” भन्नुभयो । त्यतिबेला पेरिस कम्युन दबाउन फ्रान्स सरकारलाई उसकै दुश्मनहरूले पनि सघाएका थिए । प्रतिक्रियावादीहरू एकजुट भएर क्रान्तिकारीहरूलाई दमन गर्न खोज्दा क्रान्तिकारीहरू गलत छन् भन्नु प्रतिक्रियावादीहरूलाई समर्थन गर्नु थियो । यसै सन्दर्भमा नेपालमा माओवादीहरूले चलाएको ‘जनयुद्ध’ लाई पनि हेरिनु पर्दछ । हाम्रो देशमा जुन ‘जनयुद्ध’ भइरहेको छ । ‘जनयुद्ध’ लाई एकदम गलत हो, यो अवसरवादमात्र हो, यो उग्रवामपन्थी हो भनी कराउनु प्रतिक्रियावादीहरूको समर्थन गर्नु हो । एमालेका अध्यक्ष मनमोहन अधिकारीले झैँ माओवादीहरू आतङ्कवादी हुन् यिनीहरूलाई दमन गर्नुपर्छ भन्नु ठीक छैन । माक्र्सले पेरिस कम्युनको आन्दोलन चलुन्जेल त्यसको विरोध गर्नुभएन, त्यो फेल भएपछि त्यसको विरोधभन्दा पनि त्यसका गल्तीहरूबाट शिक्षा लिई कम्युनिस्ट आन्दोलनको निम्ति बाटो तयार गर्नुपर्छ भनी पछि घोषणापत्रमै संशोधन गर्नुभयो । पेरिस कम्युनको अनुभवबाट माक्र्स र एँगेल्सलाई सर्वहारा वर्गको अधिनायकत्वको अपरिहार्यताबारे छर्लङ्ग्याउन थप मद्दत मिल्यो । सर्वहारा वर्गको अधिनायकत्वविना शोषणको अन्त्य गर्न सकिन्नथ्यो ।
शक्ति प्रयोग नगरी वा चुनावकै माध्यमबाट राज्ययन्त्र आफ्नो हात पार्न सकिन्छ भन्ने नेकपा (एमाले) को सोचाइको विषयमा पनि घोषणापत्रमा भनिएको छ कि मजदुर वर्गले तयारी राज्ययन्त्र प्रतिक्रियावादीहरूको हातबाट लिँदैमा समाजवाद आउँदैन, आफ्नो हातमा आइसकेपछि राज्ययन्त्रलाई नै ध्वस्त गर्नुपर्छ । पहिलेकै राज्ययन्त्रमा काम गरियो भने त समाजवाद कहिल्यै पनि ल्याउन सकिन्न । यो कुरा एमालेको नौ महिने शासनकालले पनि सिद्ध गरिसकेको छ । फेरि, पुँजीवादी संसद्मा पस्नै हुँदैन भन्ने पनि होइन ।
सन् १८८३ को घोषणापत्रको अर्काे जर्मनी संस्करणको भूमिकामा एँगेल्सले भन्नुभएको छ – “समाजको संरचना आर्थिक उत्पादनकै आधारमा त्यस युगको राजनैतिक र बौद्धिक इतिहासको जग बसेको हुन्छ ।” कसै कसैले यसलाई मोडेर माक्र्स र एँगेल्सले सम्पूर्ण राजनैतिक इतिहास उत्पादनको साधनमा मात्र निर्भर रहन्छ भनी गलत भन्नुभयो भनेर भने । तर, उहाँहरूले त्यसो भन्नुभएको थिएन । उहाँहरूले त उत्पादनको साधनले समाजको संरचना बनाउँछ भन्नुभएको हो । सारांशमा भन्नुपर्दा प्रत्येक राजनैतिक व्यवस्थाको आफ्नै किसिमको संरचना हुन्छ । जस्तो, सामन्तवादको । सामन्ती शोषण भनेको व्यक्ति वा परिवारले विशेष अधिकारको आधारमा अरूलाई गर्ने शोषण हो । त्यसको उपयुक्त व्यवस्था राजतन्त्र भयो । सबै मानिस बराबर हुन् । राजाको छोरा मात्र होइन सबैसँग शक्तिमा जाने अधिकार हुनुपर्छ भन्ने विचार आउने बित्तिकै त्यस अनुरूपकै राजनैतिक व्यवस्था आयो– संसदीय व्यवस्था । संसदीय व्यवस्था भनेको पुँजीवादी व्यवस्था नै हो । हामी कम्युनिस्टहरूले संसदीय व्यवस्थामा जानुको मतलब उनीहरूको हातबाट त्यसलाई खोस्नु हो तर त्यही व्यवस्थाबाट समाजवाद आउँछ भनी घोषणापत्रमा कहीँ उल्लेख गरिएको छैन । अझ घोषणापत्रले नै यस व्यवस्थाबाट समाजवाद आउन सक्दैन भनी खबरदारी पनि गरेको छ ।
घोषणापत्रमा वर्गसङ्घर्षलाई अति जोड दिइएको छ । सर्वहारावर्ग वा कामदार वर्गले शोषण र उत्पीदनबाट मुक्त हुन आफूलाई मात्र मुक्त गरेर पुग्दैन, सम्पूर्ण समाजलाई नै मुक्त गर्नुपर्दछ । सन् १७९३ मा बुर्जुवाहरूले सामन्ती शोषणबाट मुक्त हुन फ्रान्सेली क्रान्ति गरे । बुर्जुवाहरूको शोषणबाट मजदुरवर्ग मुक्त हुनु भनेको एक किसिमको शोषण व्यवस्थालाई हटाएर अर्काे किसिमको शोषण व्यवस्था ल्याउनु होइन, शोषणलाई सधैँको निम्ति हटाउनु हो । घोषणापत्रमा उल्लेख छ कि आजसम्मको इतिहास वगसङ्घर्षको इतिहास हो र अबको वर्गसङ्घर्र्षले वर्गलाई नै खत्तम पार्दछ । यसको ठीक विपरीत ख्रुश्चेभले सन् १९६७ मा अहिले मजदुरवर्ग वा सर्वहारा वर्गको पार्टी अर्थात् कम्युनिस्ट पार्टी सरकारमा छ त्यसैले वर्गसङ्घर्ष अब चाहिन्न भने । पछि लेनिनवादकै व्याख्या गर्दै माओ त्से तुङ्गले भन्नुभयो – “कम्युनिस्ट पार्टी सरकारमा गइसकेपछि बुर्जुवाहरू फालिन्छन्, अनि उनीहरू कम्युनिस्ट पार्टीभित्रै पस्छन् । कम्युनिस्ट पार्टीको विरोधमा षड्यन्त्र गर्छन् । त्यसकारण हामीले पार्टीभित्र आउने संशोधनवादको विरुद्ध निरन्तर सङ्घर्ष गर्न सकेनौँ भने भोलि पार्टीमा उनीहरूले नेतृत्व कब्जा गरी पार्टी खत्तम गर्न सक्नेछन् र पुँजीवाद नै पुनरुत्थान हुन सक्छ । त्यसैले उहाँले सांस्कृतिक क्रान्तिको नारा दिनुभयो । त्यसैले वर्गसङ्घर्र्ष कहिल्यै त्याग गर्न सकिन्न । अझ नेपालमा त चुनावबाट संसद्मा पुगेर अल्पमतको सरकार बनाउने बित्तिकै एमालेले हामी सरकारमा पुग्याँै, अब वगसङ्घर्र्ष नै चाहिन्न भन्ने विचार ल्यायो । स्तालिनले भन्नुभएको थियो– “मजदुर वर्गको सरकार आएपछि यसलाई खत्तम गर्ने अनेक षड्यन्त्र भइरहेकोे छ भने वर्गसङ्घर्ष जारी नै रहन्छ । सर्वहारा वर्गको अधिनाकत्व पनि जारी रहन्छ ।” स्तालिन बाहिरको शत्रुलाई इङ्गित गर्नुभयो भने माओले पार्टीभित्रको शत्रुलाई देखाउनुभयो र त्यसबेला वर्गसङ्घर्ष चाहिँदैन भन्नुको मतलब वर्ग समन्वयको नारा थियो ।
घोषणापत्रमा उल्लेख भएको अर्को कुरा हो सर्वहारावर्ग विभिन्न चरणबाट विकास हुँदै गएपछि आखिरमा उनीहरूले क्रान्ति उठाउँछन् । सर्वहारा वर्गले एकैचोटी क्रान्ति गर्दैन । त्यो चरण कुन किसिमले अगाडि बढ्छ भन्ने राम्रो चित्र घोषणापत्रमा देख्न सकिन्छ । सुरुमा मजदुर वर्गले आफूलाई शोषण गर्ने पुँजीपतिवर्ग हो भनेर पुँजीपति वा मील मालिकसँग लड्न खोज्छ, व्यवस्थाको विरुद्ध लड्न जानेको हुन्न । फेरि कहिलेकाहीँ त गलत धारण लिएर हामीलाई शोषण गर्ने त मेसिन नै हो भनेर मेसिनलाई फोड्छन् । यसलाई व्याख्या गरेर स्तालिनले दिनुभएको एउटा सानो उदाहरण यहाँ पेश गरूँ– मेरो घरको छिँडीमा एकजना ज्यादै गरिब सार्की बसेको छ । जुत्ता मर्मत गर्नुका साथै अर्डरअनुसार नयाँ जुत्ता सिएर उसको गुजारा चलिरहेको हुन्छ । त्यहीबेला त्यस टोलमा कसैले एउटा जुत्ता कारखाना खोलिदिन्छ । अनि त सार्कीको पसल खत्तम हुनेभयो । उसले सम्झनेछ– मेरो दुस्मन यो कारखाना हो । तर, दुस्मन भएर के गर्ने, उसले अरू काम जानेको छैन– अनि ऊ त्यही कारखाना जान बाध्य हुन्छ । सुरुमा उसले पहिले मालिकलाई दुस्मन सम्झन्छ, दोस्रोमा मेसिनलाई दुस्मन सम्झन्छ, तेस्रोमा म यहाँ काम गर्छु र एक वर्ष काम गरेपछि अलिकति पैसा जम्मा हुन्छ फेरि आफ्नै पसल खोल्छु भनेर उसमा बुर्जुवा विचार पलाउँछ । तर, निकै वर्ष काम गर्दा पनि उसले पैसा जम्मा गर्न सकेको हुन्न । अनि, उसको चेतनामा परिवर्तन आउँछ । दिनभरि काम गर्दा पहिलेभन्दा मेरो जीवन एक कुरामा अलिकति सुखी छ त्यो हो– पहिले पसल खोल्दा ग्राहकहरूको गाली खान पथ्र्यो, पिटाइ खानुपथ्र्यो तर, अहिले दिनभरि काम ग¥यो भने ज्याला लियो, आराम छ । बरु काम गर्नसक्ने बेलासम्म त ज्याला आयो, बिरामी भएपछि के गरी खाने ? त्यसैले ज्याला बढ्नुपर्छ भन्ने सोचाइ उसमा आउँछ । त्यहीबेला एकजा कम्युनिस्ट त्यहाँ पस्छ, उसले मजदुरहरूको शोषण भएको कुरा गर्छ । उसले मजदुरहरू सङ्गठित हुनुपर्नेमा जोड दिन्छ । हडताल गर भन्छ । मजदुरहरू हडताल गर्न डराउँछन् । तैपनि, खानै नपाएपछि सबै मिली हडताल गर्छन् । हडताल गर्ने बित्तिकै नयाँ चरण सुरु हुन्छ । हडताल सफल हुन्छ । मिल मालिकले तिनीहरूको ज्याला बढाइदिन्छ । हडतालबाट निकै हौसला बढ्छ । उसले सङ्गठित हुनुपर्नाको महत्व बुझ्छ । केही गरी हडताल विफल भयो भने वा आन्दोलनलाई दबाइयो भने, मर्नेपरे खुट्टै तानेर मर्छु भनी झन् राम्ररी लड्छ, यसरी मजदुर वर्गको पुँजीपति वर्गविरुद्धको आन्दोलन क्रमिकरूपमा विकसित हुँदै अन्तमा विद्रोह हुन्छ ।
Great work.