इतिहासमा बाँचेका तीन दिन
- बैशाख १३, २०८१
छिमेकी देश भारतमा कोभिड–१९ को नयाँ प्रजातिको महामारी तह नलाग्दै तेस्रो लहरको जोखिम बढेको भन्दै भारतीय विद्वान्हरूले चिन्ता व्यक्त गर्न थालेका छन् । भारतको माथिल्लो राज्य सभाका सदस्य तथा अर्थशास्त्री सुब्रमानियम स्वामीले बुधबार ट्वीट गर्दै तेस्रो कोरोना भाइरसको लहर नजिकिएको भन्दै अबको लहरले केटाकेटीलाई बढी असर गर्नसक्ने बताएका छन् । उनले भारतको नीति आयोगका सदस्यहरूले समेत तेस्रो लहरको जोखिम पुष्टि गरेको बताए ।
सत्तारुढ भारतीय जनता पार्टीको तर्फबाट राज्यसभा सदस्य स्वामीले भारतमा कोभिडको महामारी रोकथाम गर्न प्रधानमन्त्री कार्यालयको प्रयासमात्र अपुग भएको भन्दै त्यसको निम्ति विशेष सङ्कट व्यवस्थापन समितिको आवश्यकता भएको ट्वीटमा लेखेका छन् ।
कोभिड–१९ को पहिलो लहरले विशेषतः ज्येष्ठ नागरिकको निम्ति खतरा भएको थियो भने हाल उत्कर्षमा रहेको दोस्रो लहरले कम उमेरका युवकहरूबीच समेत घातक प्रभाव पारिरहेको छ । अहिले नेपालमा समेत व्यापक बन्दै गएको दोस्रो लहरले ३० देखि ५० वर्ष उमेरका व्यक्तिहरूलाई घातक असर गरिरहेको छ । यसअघिको भाइरसले विशेषतः ६० वर्षमाथिका ज्येष्ठ नागरिकहरूलाई प्रभावित बनाएको थियो ।
वैज्ञानिकहरूले तेस्रो लहरले बालबालिकालाई बढी प्रभावित बनाउने भएकोले सजग बन्न आग्रह गर्दै आएका छन् । भारतका विभिन्न प्रान्तमा तेस्रो लहरले केटाकेटीलाई प्रभावित बनाउन सक्ने भएकोले पूर्वतयारी थालिसकेका छन् । भारतको ‘द त्रिब्युन इन्डिया’ पत्रिकाका अनुसार महाराष्ट्र सरकार र बिरहनमुम्बई नगरपालिकाले बालबालिकाको लागि कोभिड वार्डहरू बनाउन थालिसकेका छन् । भारतीय वैज्ञानिकहरूका अनुसार तेस्रो लहरको सङ्क्रमण जुलाईमा फैलिने सम्भावना प्रबल छ ।
बिरहनमुम्बई नगरपालिकाले १२ वर्षभन्दा कम उमेरका केटाकेटीको लागि सात सय शय्याको बालबालिका अस्पताल बनाउने तयारी गरिरहेको ‘द इन्डियन एक्सप्रेस’ मा लेखिएको छ । त्यसमा निओनाटल सघन उपचार एकाइ
(एनआईसीयू) र बालबालिका सघन उपचार एकाइ (पीआईसीयू) पनि समावेश हुने बताइएको छ । अघिल्लो लहरभन्दा फरक दोस्रो लहरमा केटाकेटीबीच कोभिड–१९ सङ्क्रमण बढेको महाराष्ट्रको स्वास्थ्य विभागको तथ्याङ्कले देखाएको छ । तथ्याङ्कअनुसार महाराष्ट्र विभागको कुल सङ्क्रमितमध्ये झन्डै दुईतिहाइ सङ्क्रमितको सङ्ख्या ५० वर्षभन्दा कम उमेरका छन् । ० देखि १० वर्ष उमेरका बालबालिकाबीच, ३.०४ प्रतिशत, १० देखि २० वर्ष उमेरका बालबालिकाबीच ६.०८ प्रतिशत सङ्क्रमण फैलिएको देखिएको छ ।
वैज्ञानिकहरूले बालबालिकाको लागि पनि कोभिड–१९ को खोप बनाउन अनुसन्धान गर्दै छन् । ‘हेल्थलाइन’ अनलाइनअनुसार अमेरिकाको बालबालिकाका चिकित्सकहरूको प्रतिष्ठान (एएपी) ले बालबालिकाको खोपको परीक्षणको तयारी भइरहे पनि सन् २०२१ को मध्य अथवा अन्त्यसम्म पनि त्यस्तो परीक्षण गरिने सम्भावना न्यून छ । बालबालिकाको खोप परीक्षणको लागि महिनौँ लाग्ने बालरोग विज्ञहरू बताउँछन् । विकसित देशमै बनिनसकेको खोप नेपाल र भारतजस्तो विकासशील देशमा आउन अझ लामो समय लाग्ने देखिन्छ । तर, भारतीय वैज्ञानिकहरूका अनुसार आगामी दुई महिनामा नै तेस्रो लहरको सम्भावना अधिक भएकोले नेपालमा पनि सरकारले त्यत्तातिर पनि पूर्वतयारी थाल्नुपर्ने देखिन्छ । भारतको राजनीतिक नेतृत्वले वैज्ञानिकहरूले भाइरसको दोस्रो लहर भारतमा आउन सक्ने सम्भावनालाई न्युनाङ्कन गर्दा अहिले भयावह अवस्थामा निम्तिएकोमा नेतृत्वको चर्को आलोचना भइरहेको छ । तेस्रो लहर आउन सक्नेबारे अहिले नै वैज्ञानिकहरूले चेतावनी दिएको सन्दर्भमा नेपालले पनि आवश्यक सावधानी अपनाउन जरुरी छ । महामारीले विकराल रूप लिएपछि मात्र हतारमा आत्तिएर काम गर्ने पुरानो बानी त्याग्न जरुरी छ ।
Leave a Reply