ख्वप भक्तपुर मिनिबस यातायात कर्मचारी एकाइ समितिको तेस्रो वार्षिक साधारणसभा तथा प्रथम अधिवेशन सम्पन्न

भक्तपुर, २१ फागुन । नेपाल क्रान्तिकारी मजदुर सङ्घ अन्तर्गतगठित ख्वप भक्तपुर मिनिबस यातायात कर्मचारी एकाइ समितिको तेस्रो वार्षिक साधारणसभा तथा प्रथम अधिवेशन शनिबार सूर्यविनायकमा सम्पन्न भयो ।
सभामा नेपाल मजदुर किसान पार्टीका सचिव एवं सङ्घीय सांसद प्रेम सुवालले चालक र परिचालकहरूको बोली र व्यवहार सुसंस्कृत हुनु आवश्यक भएको चर्चा गर्दै सूचना प्रविधिसँग सम्बन्धित जीपीएस प्रणालीबारे पनि जानकारी यातायात मजदुरहरूसँग हुनुपर्ने आवश्यकता औँल्याउनुभयो ।
उहाँले भन्नुभयो, “सार्वजनिक यातायातका गाडीहरू २० वर्षपछि चलाउन नपाउने कानुनी व्यवस्था भारतीय पुँजीको सेवा गर्न बनाइएको हो । यस्तो कानुनी व्यवस्था बनाउने शासकहरूलाई भारतीय एकाधिकार पुँजीले कमिसन दिएको हुन्छ । यसकारण, बीस वर्षको सीमा सार्वजनिक यातायातमा खारेज गर्नुपर्दछ ।”
मजदुर वर्गका गुरू माक्र्स र एङ्गेल्सले विश्वका मजदुर एक हुन आह्वान गर्नुभएको हो । यसकारण, सम्पूर्ण मजदुरहरूको सांस्कृतिक स्तर विकास गरी एक हुनु आवश्यक छ, सचिव सुवालले भन्नुभयो ।
“देशमा सङ्कट ल्याएका शासक दलहरू नै हुन् । पुँजीवादी पार्टीहरूले सार्वजनिक संस्थान सस्तोमा बिक्री गरेर युवालाई वैेदेशिक रोजगारीको नाममा बहुराष्ट्रिय कम्पनीको सस्तो ज्यामी बन्न पठाए । यसरी देशको हित हुँदैन”, उहाँले स्पष्ट पार्नुभयो ।
समितिका अध्यक्ष शिवराम त्वानाबासुको सभापतित्वमा भएको उक्त कार्यक्रममा नेक्रामजदुर सङ्घ भक्तपुर जिल्ला समितिका अध्यक्ष उपेन्द्र सुवाल, भनपा वडा नं. ३ का वडा अध्यक्ष राजकृष्ण गोरा, ख्वप भक्तपुर मिनिबस सेवा यातायात प्रालिका अध्यक्ष ज्ञानेन्द्र महर्जन, प्रबन्धक उमेश प्रधान, रामकाजी भुजू, दिनेश प्रधान र विष्णुप्रसाद न्यौपानेले पनि बोल्नुभएको थियो ।
सभामा राजेश बुयो, राजन कार्की र बद्री कोजुले पनि बोल्नुभएको थियो । सभाले शिवराम त्वानाबासुको अध्यक्षतामा नयाँ कार्य समिति चयन गरेको छ ।