संरा अमेरिकी हस्तक्षेप अस्वीकार गर्दै दक्षिण अमेरिकी शिखर सम्मेलन सम्पन्न

ब्राशिलिया, १७ जेठ (टेलेसुर) दक्षिण अमेरिकी शिखर सम्मेलनमा भाग लिने दक्षिण अमेरिकी देशका राष्ट्राध्यक्षहरूले सहयोगका पहलहरूको प्रगति समीक्षा गर्न र चाल्नुपर्ने अर्को कदमहरू निर्धारण गर्न निर्धारित मिति र स्थानमा फेरि भेट्न सहमत भएका छन् ।
दक्षिण अमेरिकी राष्ट्र प्रमुखहरूको शिखर सम्मेलन मङ्गलबार ब्राजिलको राजधानी ब्राशिलियामा सम्पन्न भयो । बैठकको अन्तिम घोषणा गरिएको ब्राशिलिया सहमतिमा क्षेत्रीय सङ्घको लागि सर्वसम्मत निर्णय भएको उल्लेख छ ।
सम्मेलनले दक्षिण अमेरिकी मामिलामा संरा अमेरिकी हस्तक्षेपलाई अस्वीकार गर्ने स्पष्ट सन्देश दिएको छ ।
ब्राजिलका राष्ट्रपति लुइज इनासियो लुला दा सिल्भाले यस क्षेत्रमा बृहत् सहयोग र एकीकरणको खोजीमा विचार र दृष्टिकोण आदानप्रदान गर्न दक्षिण अमेरिकी राष्ट्रका राष्ट्रपतिहरूलाई बोलाउनुभएको थियो ।
बैठकमा, “दक्षिण अमेरिकी एकीकरण संयन्त्रको अनुभवको मूल्याङ्कन गर्न र दक्षिण अमेरिकाको एकीकरणको लागि मार्गचित्रको विस्तारको लागि परराष्ट्र मन्त्रीहरूको नेतृत्वमा एउटा सम्पर्क समूह स्थापना गर्ने निर्णय गरियो । उक्त सम्पर्क समूहले राज्य प्रमुखहरूको विचार र आवश्यक सबै दस्तावेजको अध्ययन गर्नेछ ।
यसले दक्षिण अमेरिकालाई संवादमा आधारित ‘शान्ति र सहयोगको क्षेत्र’ र ‘लोकतन्त्र र मानवअधिकार, दिगो विकास र सामाजिक न्याय, कानुनको शासन र संस्थागत स्थायित्व, सार्वभौमसत्ता र आन्तरिक मामिलामा गैर–हस्तक्षेपप्रति प्रतिबद्ध रहेको’ पनि पुष्टि गरेको छ ।
दक्षिण अमेरिकी राष्ट्रपतिहरूले ब्राशिलिया सहमतिमा हस्ताक्षर गर्नुभएको छ, जुन सहमतिले छिमेकी देशहरूबिचको सहयोगलाई बलियो बनाउने लक्ष्य राखेको छ । मङ्गलबार इटामाराटी दरबारमा भएको दक्षिण अमेरिकी नेताहरूको शिखर सम्मेलनको अन्त्यमा उक्त घोषणा पत्रमा हस्ताक्षर भएको हो । उक्त बैठकमा ब्राजिलका राष्ट्रपति लुइज इनासियो लुला दा सिल्भाले यस क्षेत्रको शान्ति, एकता र प्रगतिलाई प्रवद्र्धन गर्नका लागि देशहरूबिचको सम्बन्धलाई सुदृढ पार्ने आह्वान गर्नुभएको थियो ।
नेताहरूले ‘जलवायु सङ्कट, अन्तर्राष्ट्रिय शान्ति र सुरक्षाका लागि खतराहरू, खाद्य र ऊर्जा श्रृङ्खलाहरूमा दबाब, नयाँ महामारीको जोखिम, बढ्दो सामाजिक असमानता र संस्थागत र लोकतान्त्रिक स्थायित्वका लागि खतराहरू’ जस्ता धेरै साझा चुनौतीहरू छन् भनी स्वीकार गर्नुभएको थियो ।
यस सम्बन्धमा उहाँहरूले लोकतन्त्रलाई सुदृढ गर्ने, आर्थिक तथा सामाजिक विकासको प्रवद्र्धन, गरिबी, भोकमरी र असमानताविरुद्ध लड्ने, लैङ्गिक समानताको प्रवद्र्धन र बसाइँसराइको व्यवस्थित र सुरक्षित व्यवस्थापनको आवश्यकतामा सहमति जनाउनुभएको छ ।
ती राष्ट्र तथा सरकार प्रमुखहरूले जलवायु परिवर्तनलाई अभिनव वित्तीय संयन्त्रमार्फत सम्बोधन गर्ने वाचा गर्नुभयो । यस क्षेत्रका देशहरूबिचको व्यापार बढाउन, पूर्वाधार र रसद सुधार गर्न, क्षेत्रीय मूल्य शृङ्खलाहरू बलियो बनाउन र वित्तीय एकीकरणलाई सहज बनाउन काम गर्न सहमत हुनुभयो ।
उहाँहरूले “असमानताहरू हटाउने, एकपक्षीय प्रतिबन्धहरू हटाउने र प्रभावकारी दक्षिण अमेरिकी मुक्त व्यापार क्षेत्रको लक्ष्यका साथ ब्ीब्म्क्ष् (ल्याटिन अमेरिकी एकीकरण सङ्घ) को रूपरेखासहित आर्थिक पूरक सम्झौताहरूको सञ्जालमार्फत बजारहरूमा पहुँच विस्तार गर्ने सहमति पनि गर्नुभयो ।