क्षेप्यास्त्र उत्पादन बढाउन किम जङ उनको निर्देशन

सियोल, २८ साउन (एएफपी) । प्रजातान्त्रिक जन गणतन्त्र (प्रजग) कोरियाली नेता किम जोङ उनले आगामी हप्ता दक्षिण कोरिया र संयुक्त राज्य अमेरिकाले संयुक्त अभ्यासको तयारी गरिरहेको बेला प्रमुख हतियार कारखानाको भ्रमणको क्रममा क्षेप्यास्त्र उत्पादनमा ‘व्यापक वृद्धि’ गर्न निर्देशन दिनुभएको छ ।
किमले गत हप्ता एक महत्वपूर्ण सैन्य बैठकमा युद्धको तयारीलाई तिव्रता दिन आह्वान गरेपछि शुक्रबारदेखि शनिबारसम्म यी हतियार कारखाना (प्लान्ट) हरूको भ्रमण भएको हो ।
कोरियाली केन्द्रीय समाचार संस्था (केसीएनए) का अनुसार किमले दुई दिनसम्म निरीक्षणमा सामरिक क्षेप्यास्त्र उत्पादन गर्ने कारखाना, ठूलो क्यालिबर कन्ट्रोल मल्टिपल रकेट लञ्चर शेलका साथै बख्तरबन्द लडाकु गाडी निर्माण गर्ने प्लान्टको निरीक्षण भ्रमण गर्नुभएको छ ।
रणनीतिक क्षेप्यास्त्र प्लान्ट फ्याक्ट्री भ्रमणको क्रममा किमले प्लान्टले उत्पादनमा उत्पन्न हुने वैज्ञानिक र प्राविधिक समस्यालाई परिपूर्ण बनाएको र हतियारको आधुनिकीकरणलाई अघि बढाएकोमा सन्तुष्टि व्यक्त गर्नुभएको थियो ।
केसीएनएका अनुसार उहाँले विद्यमान क्षेप्यास्त्र उत्पादन क्षमतामा व्यापक वृद्धि गर्ने महत्वपूर्ण लक्ष्य राख्दै युद्धको तयारीलाई तीव्रता दिन कारखानाको भूमिकामाथि जोड दिनुभएको छ ।
किमले ‘गोलाबारूदको उत्पादनमा वृद्धि सुनिश्चित गर्नुपर्नेमा जोड दिनुभएको छ भने उहाँ आफैँले बख्तरबन्द लडाकु वाहन चलाएको तस्बीरसमेत सार्वजनिक गरिएको छ ।
किमले ट्रान्सपोर्टर इरेक्टर लञ्चर उत्पादन गर्ने कारखानाको पनि निरीक्षण गर्दै मोबाइल प्लेटोर्मको विकास र उत्पादनको महत्वमा उहाँले जोड दिनुभएको थियो ।
“प्रजग कोरियाली सेनासँग ‘ठूलो सैन्य शक्ति’ हुनुपर्छ र शत्रुविरुद्ध कुनै पनि समयमा कुनै पनि युद्धको सामना गर्न पूर्णरूपमा तयार हुनुपर्छ,” किमलाई उद्धृत गर्दै केसीएनएले उल्लेख गरेको छ । यदि उनीहरूले आक्रमण गरे भने प्रजग कोरियाले उनीहरूमाथि धावा बोल्ने हैसियत रहनुपर्ने किमले बताएको सिनमुनले समाचारमा उल्लेख गरेको छ ।
दक्षिण कोरिया र संयुक्त राज्य अमेरिकाले अगस्ट २१ देखि अगष्ट ३१ सम्म हुने वार्षिक उल्ची फ्रिडम शिल्ड (यूएफएस) अभ्यासको तयारी गरिरहेको बेला यो निरीक्षण गरिएको हो ।