प्रमुख प्रशासकीय अधिकृत वसन्त भट्टराईलाई भक्तपुर नपामा स्वागत

भक्तपुर, १८ मङ्सिर । भक्तपुर नगरपालिकाका प्रमुख सुनिल प्रजापतिले सोलुखुम्बुबाट भक्तपुरमा सरुवा भई आउनुभएका प्रमुख प्रशासकीय अधिकृत वसन्त भट्टराईलाई सोमबार एक कार्यक्रमबिच स्वागत गर्नुभयो ।
नगर प्रमुख प्रजापतिले प्रमुख प्रशासकीय अधिकृत भट्टराईलाई सिङ्गो नपा र नगरवासीहरूको तर्फबाट स्वागत गर्दै भक्तपुर नपाले अरूको भन्दा फरक शैली अपनाएकै कारण भक्तपुर आज देशकै लागि नमुना नगर बन्न सम्भव भएको बताउनुभयो ।
भक्तपुरमा देश विदेशका विशिष्ट व्यक्तिहरूको अध्ययन भ्रमण र अनुभव आदानप्रदानको सिलसिला स्वागतयोग्य भएको बताउँदै उहाँले भक्तपुर नपाले देशलाई सकारात्मक सन्देश दिने महत्वपूर्ण नगरपालिकाको रूपमा आफ्नो परिचय स्थापित गरिरहेको बताउनुभयो ।
उहाँले भक्तपुरलाई अझ उचाइमा पु¥याउन नवआगन्तुक प्रमुख प्रशासकीय अधिकृतले महत्वपूर्ण भूमिका खेल्नेमा विश्वास व्यक्त गर्नुभयो ।
उपप्रमुख रजनी जोशीले जनतालाई सरल र सहज ढङ्गले सेवा प्रवाह गर्ने नगरपालिकाको उद्देश्य भएको बताउँदै नगरपालिकाको उद्देश्यअनुरूप कार्यसम्पादनमा साथ र सहयोग प्राप्त हुने आशा व्यक्त गर्नुभयो ।
कार्यक्रममा प्रमुख प्रशासकीय अधिकृत वसन्त भट्टराइले भक्तपुर गौरवपूर्ण इतिहास बोकेको ठाउँ भएकै कारण आफ्नो कार्यक्षेत्रको रूपमा पाउँदा ज्यादै हर्षित भएको बताउनुभयो ।
सुशासन, आर्थिक पारदर्शिता र नागरिक सेवामा भक्तपुर अगाडि बढेको नपा भएको बताउँदै उहाँले भक्तपुरको मान मर्यादालाई अझ उँचो रहने गरी काम गर्ने प्रतिबद्धता जनाउनुभयो ।
कार्यक्रममा भक्तपुर नपा वडा नं. ९ का वडाध्यक्ष रवीन्द्र ज्याख्व, नेपाल नगरपालिका कर्मचारी एसोसिएसन भक्तपुर नगरपालिका समितिका अध्यक्ष गौतमप्रसाद लासिवाले पनि बोल्नुभएको थियो ।