अन्तरनगर जिम्नास्टिक प्रतियोगिता मूल समिति बैठक सम्पन्न

भक्तपुर, ८ चैत । भक्तपुर नगरपालिकाका प्रमुख सुनिल प्रजापतिको अध्यक्षतामा भक्तपुर नगरपालिकाको आयोजनामा २०८१ चैत २३ देखि २६ गते सम्पन्न हुने अन्तरनगर जिम्नास्टिक प्रतियोगिता मूल समितिको बैठक शुक्रबार सम्पन्न भयो ।
बैठकमा प्रमुख प्रजापतिले भक्तपुर नपाले भक्तपुरको मात्र नभई देशकै खेलकुद क्षेत्रलाई अगाडि बढाउन खलकुदलाई प्राथमिकतामा राख्दै आएको बताउनुभयो ।
उहाँले भक्तपुर नगरपालिकाको आयोजनामा हुने अन्तरनगर जिम्नास्टिक खेलकुद प्रतियोगिता सभ्य र भव्यरूपमा सम्पन्न गर्न खेलकुद समिति, खेलाडी, निर्णायकलगायत सबैको भूमिका महत्वपूर्ण रहेको बताउँदै सबैको सामूहिक निर्णयमा यस वर्ष भक्तपुर नपाले जिम्नास्टिक प्रतियोगिता गर्न लागेको बताउनुभयो ।
भौतिक पूर्वाधारको विकास पनि खेलकुद विकासको महत्वपूर्ण आधार भएको बताउँदै प्रमुख प्रजापतिले केही प्राविधिक कारणले भक्तपुर नपाले चाहेर पनि कभर्ड हल र खेलमैदानहरू निर्माण गर्न नसकेको बताउनुभयो ।
नेपाल जिम्नास्टिक सङ्घका अध्यक्ष एवम् सांसद धु्रवबहादुर प्रधानले भक्तपुर नपाले खेलकुद क्षेत्रमा गरिरहेको गतिविधिबाट अन्य स्थानीय तहलाई पनि प्रेरणा मिलेको बताउँदै जिम्नास्टिक खेल सबै खेलहरूको प्रारम्भिक खेलको रूपमा रहेको र यो खेल सिकेपछि अन्य खेल खेल्न पनि सहज हुने बताउनुभयो ।
भक्तपुर नगरपालिकाका उपप्रमुख रजनी जोशीले खेलकुद मानव जीवनको अभिन्न अङ्ग भएको बताउँदै विद्यालय तहदेखि खेलकुदमा विद्यार्थीहरूलाई सहभागी गराउन सके विद्यार्थीको व्यक्तित्व विकासमा टेवा पुग्ने बताउनुभयो ।
भक्तपुर नपा वडा नं. १ का वडाध्यक्ष एवम् युवा तथा खेलकुद समितिका संयोजक श्यामकृष्ण खत्रीले अन्तरनगर जिम्नास्टिक प्रतियोगिता भव्यताका साथ सम्पन्न गर्न १५१ सदस्यीय मूल समारोह समिति गठन भई १३ वटा उपसमितिहरू गठन गरिएको जानकारी गराउँदै प्रतियोगिता भव्यरूपमा सम्पन्न गर्न सबैको साथ र सहयोग आवश्यक भएको बताउनुभयो ।
कार्यक्रममा भक्तपुर नगरपालिकाका प्रमुख प्रशासकीय अधिकृत वसन्त भट्टराई, प्रशिक्षक राजेश्वरमान स्थापित र भक्तपुर जिल्ला जिम्नास्टिक सङ्घका अध्यक्ष दीपककृष्ण प्रजापतिले पनि बोल्नुभयो ।
कार्यक्रममा युवा तथा खेलकुद समितिका सदस्य रामसुन्दर बासीले पनि बोल्नुभएको थियो ।