हेलिकोप्टरमार्फत पुगे त्रिदेशीय नाकामा सुरक्षाकर्मी

काठमाडौँ, १७ जेठ । नेपाल, भारत र चीनको त्रिदेशीय नाका ब्यास गाउँपालिका–१ छाङ्गरू टिङ्करमा सुरक्षाकर्मीको उपस्थिति भएको छ । नेपाली सेनाको हेलिकोप्टरमार्फत नेपाल प्रहरीलाई शुक्रबार सो नाकामा पु¥याइएको हो ।
नेपाली सेनाको एम आई १७ हेलिकप्टरमार्फत सीतापुल प्रहरीचौकीमा प्रहरी पु¥याइएको हो । जिल्ला प्रहरी कार्यालयबाट प्रहरी नायब निरीक्षक लोकेन्द्र पुजाराको नेतृत्वमा १४ सुरक्षाकर्मी सीतापुल पु¥याइएको प्रहरी नायब उपरीक्षक दीपेन्द्र शाहीले जानकारी दिनुभयो ।
त्रिदेशीय नाका छाङ्गरू र टिङ्करका स्थानीयवासीको बसाइँ सराइ भए पनि सुरक्षाकर्मी नसरेको भन्दै गत साता राससमा समाचार प्रकाशित भएको थियो । नेपालतिर सडक नहुँदा माथि उक्लिन नसकेको प्रहरीलाई हेलिकोप्टरमार्फत छाङ्गरूको सीतापुल पु¥याइएको छ । सीतापुलमा केही दिन बसेपछि आधा प्रहरी टिङ्कर चौकीमा सर्ने नायब उपरीक्षक शाहीले बताउनुभयो । नेपालतिर हतियारसहित चौकी सार्न बाटोघाटो थिएन । स्थानीयवासीले भारतीय बाटो भएर बसाइँ सरे पनि प्रहरीका लागि हतियार लिन समस्या थियो । सर्वसाधारणले छाङ्गरू टिङ्कर जान नेपाल र भारत दुवैतर्फबाट बहुयात्रा अनुमति बनाउनुपर्छ । सोही माध्यमबाट उनीहरू भारतीय बाटोको प्रयोग गरी गाउँ फर्किएका थिए ।
“स्थानीय भारतीय मार्ग भएर गाउँ गइसकेको अवस्थामा सुरक्षाकर्मीमाथि लैजान हेलिकोप्टरबाहेकको विकल्प थिएन ।” प्रहरी नायब उपरीक्षक शाहीले भन्नुभयो । प्रहरीले हातहतियारसहित माथि जाने अवस्था नभएपछि जेठ १ गते बसेको जिल्ला सुरक्षा समितिको बैठकले हेलिकोप्टर माग गर्ने निर्णय गरेको थियो । सोही निर्णयअनुसार सरकारले पहिलो पटक ब्यासको त्रिदेशीय क्षेत्र छाङ्गरू टिङ्करका लागि हेलिकोप्टर पठाएको हो । नेपालतिरको बाटो गत वर्ष गाउँपालिकाले आफ्नै लगानीमा बनाए पनि महाकाली नदीको डुबानमा परेपछि बाटो अवरूद्ध छ । भारतले सीमा क्षेत्रमा बनाइरहेको सडकका कारण नेपालतिरको बाटो पूर्णरूपमा अवरूद्ध भएको हो ।
भारतले कालापानी जाने सडक महाकाली किनारै किनार निर्माण गरिरहेको छ । भारतले बनाइरहेको सडकमा प्रयोग गरिएको विस्फोटक पदार्थका कारण नदी थुनिन गई नेपालतिरको बाटो पूरै बगाएको स्थानीयवासीको भनाइ छ । ब्यास–२ तम्बाकुदेखि बुदिसम्मको क्षेत्रमा नेपालतिरको बाटो पूर्णरूपमा अवरूद्ध छ । बाटो नहुँदा प्रहरीले आफ्नो रासन भारतीय बाटो भएर सीतापुल पु¥याएको हो । प्रहरीले हेलिकोप्टरमार्फत हतियार, सञ्चार सेटलगायत प्रहरी जवान पु¥याएको हो । राज्यको उपस्थितिका नाममा प्रहरीमात्रै यो क्षेत्रमा हुने गरेको छ ।
यस्तै हेलिकोप्टरमार्फत छाङ्गरू टिङ्करको क्षेत्रमा प्रमुख जिल्ला अधिकारी शङ्करबहादुर विष्ट, प्रहरी नायब उपरीक्षक शाही, सशस्त्र प्रहरी नायब उपरीक्षक भीमचन्द, राष्ट्रिय अनुसन्धान अधिकृत हिरण्य कुँवर, दुर्गादल गुल्मका निमित्त गुल्मपति खड्कध्वज कार्कीलगायतले यस क्षेत्रको अनुगमन गरेका छन् ।
हेलिकोप्टरमार्फत त्यस क्षेत्रको भूगोल प्रहरी बस्ने ठाउँलगायतको बारेमा सामान्य जानकारी लिइएको प्रमुख जिल्ला अधिकारी बहादुर विष्टले बताउनुभयो । हेलिकोप्टरमार्फत पहिलो पटक सुरक्षाकर्मी पुगेपछि स्थानीयमा समेत राज्यको उपस्थित भयो भन्ने आभास पाइएको उहाँले जानकारी दिनुभयो ।
ब्यास क्षेत्र उच्च भू–भागमा अवस्थित भएका कारण ६ महिनामात्रै स्थानीयवासीको बसोबास हुन्छ । यहाँका स्थानीय खलङ्गाझरेसँगै सीतापुल प्रहरीचौकी ब्यासको दुम्लीङ झर्ने गर्छन् । यहाँ चार/पाँच फिट हिउँ जम्ने गर्छ । प्रहरीले केही दिनअघि हतियार बिनाका प्रहरी दुम्लीङबाट सीतापुल पठाएको थियो । विगतमा यस क्षेत्रमा राज्यको उपस्थित नहुँदा चोरी शिकारी, आखेटोपहार ओसारपसार तथा नेपालतिरको जङ्गल भारतीय पक्षले फँडानी गर्ने गरेका घट्ना बेला बेलामा आउने गरेका थिए ।