किम इल सङको जन्म दिवसमा प्योङयाङमा भव्य समारोह (तस्वीर सहित)

प्रजग कोरियाका संस्थापक नेता एवं राष्ट्रपिता किम इल सङको १०५ औं जन्म दिवसको अवसरमा राजधानी प्योङयाङको ग्रान्ड प्लाजामा भव्य समारोहको आयोजना गरिएको छ । समाजवादी देश कोरियाली हरेक अप्रिल १५लाई सूर्य दिवसको रुपमा भव्य रुपमा मनाउने गर्दै आएको छ । प्योङयाङमा आयोजित भव्य समारोहमा त्यहाँका सर्वोच्च नेता किम जङ उनलगायत सबै विशिष्ट राजनीतिक तथा सैनिक नेताहरुको सहभागिता भएको स्रोतले बताएको छ । समारोहमा विभिन्न देशका प्रतिनिधिमण्डलहरुको पनि सहभागिता रहेको छ ।
प्रजग कोरियामाथि हमलाको लक्ष्य सहित संरा अमेरिकाले हालै एउटा आणविक हतियारसम्पन्न युद्धकजहाज तैनाथ गरेसँगै यो पटकको सूर्य दिवसलाई प्रजग कोरियाली सरकारले संसारसामू आफ्नो सैनिक विशिष्टता र आर्थिक समृद्धि देखाउने अवसरको रुपमा उपयोग गरेको पर्यवेक्षकहरुको भनाई छ । यो वर्षको परेडमा कोरियाली जनसेनाले पण्डुबीबाट चल्ने बालास्टिक मिसाइल पनि प्रदर्शन गरेको थियो ।
यसैबीच यो वर्ष प्रजग कोरियाले संसारका विभिन्न प्रमुख सञ्चारमाध्यमका प्रतिनिधिहरुलाई बोलाएर आफ्नो देशबारे नजिकबाट हेर्ने कार्यक्रम बनाएको छ । प्योङयाङको माङयोङदाए बालबालिका दरबारमा आयोजित एक भव्य साँस्कृतिक कार्यक्रममा ६ वर्षदेखि १६ वर्ष उमेरका ५ हजार कोरियाली बालबालिकाहरुले गीत, नृत्य, सांगीतिक प्रस्तुति, जादु र अरु विभिन्न प्रस्तुति प्रदर्शन गरेका थिए । त्यहाँ सहभागी विभिन्न देशका ५ सय प्रतिनिधिहरु उनीहरुको प्रस्तुतिबाट मन्त्रमुग्ध बनेका थिए ।