संरा अमेरिकामा प्रजातन्त्रको अवस्था
- बैशाख ७, २०८१
(सन् १९६२ को चीन–भारत युद्धबारे चिनियाँ कैदमा परेका ब्रिगेडियर जेपी डाल्भीको प्रसिद्ध पुस्तक ‘हिमाली महाभूल’ (Himalayan Blunder) को सङ्क्षिप्त अध्ययन)
अत्याउँदाको दण्ड
कुनै मुलुकले बिनातयारी युद्ध लड्नु हुँदैन । राजनेताहरूले राजनीतिक मुद्दाहरूलाई शत्रुता हदसम्म पुग्नबाट रोक्नुपर्छ । चतुर राजनेताहरू लामो समय लिने धेरै उपायहरू सोच्छन् । १९६२ को सेप्टेम्बर युद्धमा जानका लागि सबैभन्दा अनुपयुक्त समय थियो । भारतले अधकल्चा सीमा चौकीहरू बनाएको थियो र चिनियाँहरूले त्यसलाई बिथोलेका थिएनन् । अघिल्ला तीन वर्षभरि सेनालाई युद्धको तालिम दिइएको थिएन ।
सेप्टेम्बर ८ मा चिनियाँहरू थागलामा पसेपछि सरकार जिल्ल प¥यो । सरकारले फाइँफूर्तिको नीति लियो । भारतीय जनता र चिनियाँहरूलाई फुर्ति लगाउन सजिलो थिएन । सरकारले अगुवाइ गर्नसकेन । उच्च पदको कमान्डरलाई नाम्का चूमा पठाएर चिनियाँ खतराबारे आकलन गर्नुपर्ने ठाउँमा सरकारले सिधै चिनियाँहरूलाई खेद्ने ‘निर्णय’ लियो । रक्षा मन्त्रालयले सेनाप्रमुखलाई दबाब दिए, सेनाप्रमुखले कमान्ड प्रमुखलाई दियो, कमान्ड प्रमुखले खोलानजिकै खटिएको कमान्डरलाई दबाब दिए । सरकार अब आफ्नै शब्दहरूको जालोमा फसेको थियो । त्यसैले ऊ सकेसम्म राम्रो देखिन बाध्य थियो । सरकारले विपक्षी र जानकारीबाट वञ्चित जनताको अज्ञानी हुँकारसामु एक स्पष्ट राजनीतिक अवसरवादको नीति लियो । निरद चौधरीले लेखे, “राजनीतिक नेतृत्वले आक्रमणको लागि सेनालाई अ¥हाएको थियो जसमा उनीहरूले जित्ने मौका थिएन । गढिएको आक्रमण सैन्य कदम हुने कुरा सोचिएको थिएन ।”
सुरूमै सरकारले अर्को गम्भीर गल्ती ग¥यो । उसले आँखामा पट्टी बाँधेर थागला घटनाले लद्दाखमा समेत खतरा उत्पन्न हुनसक्ने कुरा ख्याल गरेन । चिनियाँहरूले लद्दाखमा पनि बलियो उपस्थिति जनाएका छन् भन्ने लुकेको थिएन । पश्चिम कमान्डका जनरल दौलत सिंह र पूर्वी कमान्डका जनरल सेन दुवैले चीन–भारत आमनेसामनेको स्थिति चर्केमा सामना गर्न नसकिने बताएका थिए । विज्ञहरूको सल्लाह यस्तो हुँदाहुँदै पनि सरकारले ‘सक्दो गर्ने’ जिद्दी ग¥यो नत्र सरकारले जनताको विश्वास गुमाउनुपर्ने देख्यो । चौधरीले सरकारको चर्को आलोचना गर्दै लेखे, “सरकारले चिनियाँहरू आफ्नो ढोकामा आएका एकाध भिकारीहरू हुन् भन्ने ठान्यो र दर्बानलाई यी हल्लाखोरहरूलाई भगाउन भन्यो । अझ उनीहरूले समस्यालाई बगैँचामा आएका चराचुरुङ्गीलाई गोली ठोक्ने समस्याका रूपमा लिए र त्यसको लागि एउटा हट्टाकट्टा केटो खटाए हुने ठाने । तर, चिनियाँहरू भँगेरा थिएनन् ।”
यस्तो राजनीतिक गलहत्याइ र बहादुरीबीच जनरल स्टाफ र स्थानीय कमान्डरहरू आत्तिए । सैन्य हेडक्वाटर बेलाबेला बस्ने शक्तिशाली नेता र कर्मचारीहरूको बैठकबाट जन्मिने सरकारी आदेश अघि पठाउने निकाय बन्यो । समग्र सीमाको लागि एकदम नयाँ रणनीतिक योजना बनाउने अवसर थिएन । गम्भीरतापूर्वक सङ्गठित हुने, सुरक्षित आधार क्षेत्र बनाउने वा आपूर्ति रेखा बनाउने कामका लागि समय थिएन । युद्धका सबै सिद्धान्त मिचिएको थियो ।
सरकारी ‘आदेश’ सैन्य हेडक्वाटरले तल पठाउनुभन्दा अगाडि जाँचबुझ गरेको थिएन । हेडक्वाटरका मुख्य निर्देशकहरूलाई के हुँदै छ भन्ने थाहा नभएको देखिन्छ । सैन्य अपरेसनका निर्देशकले गोर्खालीहरूको बटालियनले दसैँ मनाउने आशा लिएका थिए । स्टाफ ड्युटीका निर्देशकलाई चिनियाँहरूलाई खेद्नका लागि आसाम नजिकै तैनाथ सैनिकहरूबाट एउटा ब्रिगेड बनाउन बाध्य पारिएको थियो । जम्मा गरेपछि उनीहरूलाई त्यहीँ लडाइँमा होमिँदै थियो ।
कसैले पनि कसैलाई औपचारिक आदेश दिएको थिएन । जनरल सेनलाई कुनै लिखित आदेश दिइएको थिएन र उनले पनि कौललाई लिखित आदेश दिएका थिएनन् । कौलले एउटा मौखिक आदेश दिएका थिए जसलाई छोटो सन्देशबाट पुष्टि गरिएको थियो । सेनाप्रमुखको मानसिक दुविधा अस्पष्ट सन्देशमा प्रकट भएको थियो । राजनीतिक आदेशलाई दोहो¥याइएको थियो । बेलाबेला क्रमशः यस्ता आदेश दिइएका थिए । एक, ढोलामा सम्पर्क बनाउनू । दुई, चिनियाँहरूलाई नाम्का चूबाट खेद्नू (मानौँ चिनियाँहरूको आफ्नो कुनै विचार हुँदैन !) । तीन, थागलाभन्दा दक्षिणमा चिनियाँ घुसपैठ नहोस् भनी हेर्नू । चार, थागलाको दक्षिणका सबैलाई हटाउनू । पाँच, नाम्का चूका पुलहरूको सुरक्षा गर्नू ।
सरकारले उपयुक्त मार्गबाट औपचारिक आदेश जारी गर्नुपर्ने नदेखेकोले कोही पनि आफूलाई दाउमा राखेर कतै हस्ताक्षर गर्न तयार भएन । डाल्भीलाई पूरै अपरेसन अवधिभरि एउटा पनि लिखित आदेश दिइएको थिएन । एउटा पनि गुप्तचरीको जानकारी पठाइएको थिएन । उनलाई एउटा पनि प्रशासनिक निर्देशन दिइएको थिएन । डिभिजन प्रमुखले उनलाई आफ्नै अगुवाइ वा परिस्थितिको आफ्नै मूल्याङ्कनका आधारमा एउटा पनि आदेश दिएका थिएनन् । ब्रिगेड ७ को हकमा अपरेसन सेप्टेम्बर ८ देखि अक्टोबर २० सम्म पूरै ४२ दिन चल्यो । लिखित आदेशको लागि यति समय पर्याप्त थियो ।
चेन अफ कमान्ड
आदेश दिँदा र सेनालाई परिचालन गर्दा चेन अफ कमान्ड र नियन्त्रणको बेवास्ता गरियो । रक्षामन्त्री चाभनले लोकसभामा भने, “तेस्रो कुरा सेनाको कमान्ड प्रणालीको हो । प्रणाली र चेन अफ कमान्डमा मूलतः केही गडबडी छैन । उसले विभिन्न तहमा अपेक्षाअनुसार व्यवहार ग¥यो । तर, विभिन्न तहमा आपसी विश्वासका आधारमा जिम्मेवारी महसुस गरेर काम गर्नुपर्ने देखिन्छ । अपरेसनको बेला मान्य चेन अफ कमान्डबाट बाहिरिँदा समस्या बल्झियो । हतारो र पूर्वयोजनाको अभावमा पनि बाहिरिने सम्भावना उत्पन्न भयो । जाँचबुझबाट सेनाको माथिल्लो निकायले तल्लो तहमा हुने रणनीतिक कार्यहरूमा हस्तक्षेप गरेको देखिन्छ । आवश्यक परेको बेलामा निर्णय लिनु मैदानमा खटिएको कमान्डरको कर्तव्य हो । त्यस्तै अपरेसनका मसिना कार्यहरू उनीहरूलाई नै छोड्नुपर्छ ।”
चाभन महोदयले यहाँ पनि आफ्ना राजनीतिक मित्रहरूलाई लुकाएका छन् । उनले सैन्य नेतृत्वले स्थानीय कमान्डरको काममा भाँजो हालेका थिए भन्ने छाप पार्न खोजेका छन् । आलोचना राजनीतिक नेतृत्वको पनि हुनुपर्छ । सरकारले नै हरेकलाई आँखाअगाडि आएको युनिटको कमान्ड गर्नुपर्ने गरी अत्याउने बटन थिचेको थियो । माथिको हस्तक्षेपले सीमामा तैनाथ सैनिकहरूको मिसनमा कुनै आस्था थिएन र नेतृत्वमा भर थिएन भन्ने देखाउँछ । यहाँ दिल्लीमा बसेर तल्ला अफिसरहरूमाथि उफ्रिने, अत्याउने र धकेल्ने सबैलाई दोष दिनुपर्छ । योजना सही बनाइएको हुन्थ्यो र सबै तहमा स्वीकार गरिएको हुन्थ्यो भने वास्तविक मसिना कार्यहरू मैदानका कमान्डरहरूलाई चेन अफ कमान्डअनुसार सुम्पिनुपथ्र्यो । सैन्य हेडक्वाटर र सरकारले हेर्ने, सघाउने र नैतिक र बन्दोबस्तीका सामग्री दिनेमै आफूलाई सीमित गर्नुपथ्र्यो । तल्लो तहका नाक खुम्च्याइरहेका अफिसरलाई कज्याउने मान्छे पठाउन आवश्यक हुन्नथ्यो ।
राजनेता र कमान्डरहरूलाई लडाइँको मैदानबारे अत्तोपत्तो थिएन र उनीहरूले टड्कारा पक्षहरू नहेरी युनिटहरूलाई अघि बढ्न आदेश दिन थाले । सैन्य आदेशलाई सैनिक तर्कहरूकै आधारमा स्पष्ट पार्न सकिँदैन भने त्यसको विरोध हुन्छ । यस्तो कारबाहीमा जोड गर्न युनिटहरूलाई ठाडो आदेश दिनुपर्ने हुन्छ, तल्ला अफिसरहरूलाई धम्क्याउनुपर्छ र सामान्य लडाइँका प्रक्रियाहरू बिर्सनुपर्छ ।
हस्तक्षेप रक्षामन्त्री मेननकै तहबाट सुरू भयो । उनी र उनका सहयोगीहरू दिनानुदिन बैठक बसे र फौजसँग हुनुपर्ने सैन्य अधिकारीहरूलाई बोलाए । पूर्वयोजना थिएन र चिनियाँहरूलाई खेद्ने चमत्कार कसरी होला भन्ने थाहा थिएन । त्यसैले दैनिक गफगाफ चलिरह्यो । जनरल सेनलाई प्रत्येक दिन दिल्ली डाकिन्थ्यो । उनी चिनियाँहरूलाई खेद्न पठाइएका फौजीहरूसँग हुनुपर्ने ठाउँमा उनी दिल्लीमा हुनुलाई महत्व दिइयो । डाल्भी हेलिप्याडनिर थिए तर सेन उनलाई भेट्न गएनन् ।
कमान्ड संरचना चुँडिनुमा अर्को महत्वपूर्ण तत्व कमान्डरहरूको स्थानमा हस्तक्षेप थियो । डाल्भीलाई सेप्टेम्बर १३ र अक्टोबर ४ मा उनको हेडक्वाटरबाट निकालियो । अक्टोबर १६ सम्म उनले आफ्नो हेडक्वाटर बनाउन सकेनन् । जनरल प्रसादसँग सेप्टेम्बर २३ र २८ मा उनले भेट्न सके । जनरल प्रसादलाई समेत उनको हेडक्वाटरबाट निकालियो । जनरल कौलको निश्चित हेडक्वाटर र स्टाफ टोली थिएन । जनरल सेन दिल्ली, लखनउ र तेजपुरबाट काम गर्थे । कहाँ थियो त परम्परागत कमान्ड ? राष्ट्रिय महत्वको विषयमा मौखिक आदेश दिने हानिकारक बानीले समस्या चर्कायो । यस्तो आदेश लिखित दिनुप¥यो भन्दा दिने मान्छे नै हच्किन्थ्यो । यसै कुराले किन आवेग, आक्रोश वा गलत मान्यताका आधारमा अति अत्याउने जथाभावी आदेशहरू दिइएको थियो भन्ने स्पष्ट पार्छ ।
चेन अफ कमान्डलाई पन्छाउने काम जनरल कौलले गरेका थिए । उनले जिम्मेवारी लिएपछि यस्तो भएको थियो । उनले सीमामा तैनाथ सैनिकहरूले आनाकानी गरेको पाए र ‘अपरेसनलाई दौडाउन’ आफैँ कमान्ड लिए । त्यसैले उनले ब्रिगेड ७ लाई अघि बढ्न आदेश दिए र आफैँले राजपुत कमान्डरलाई पुलहरूको सुरक्षा गर्ने आदेश दिए । पछि उनी र राजनेताहरू मिलेर सबै पुलहरू थामिराख्नुपर्ने र स्थानीय कमान्डरहरूको सुझावभन्दा विपरीत गएर साङलेमा निर्माण कार्य गर्नुपर्ने निर्णय गरे । यसको लागि पनि उनले व्यक्तिगत आदेशहरू दिनुप¥यो ।
दोषी को ?
ब्रिगेड ७ लाई नाम्का चूमा पठाउने आदेश सोचविचार नगरी, चेतावनी नदिई र तयारी नगरी दिइएको बाध्यकारी प्रतिक्रिया थियो । यसरी चिनियाँहरूको शक्ति, तयारी र मनसाय नबुझी सरकारले फुर्ती गर्ने नीति लियो । पहिलो प्रहार विफल भएपछि राजनीतिक चटकमा भुल्यो । रातारात कोर बनाउने मिथ्या निर्णय भयो । यसले भारतीयहरूबीच फजुल आशाको सञ्चार ग¥यो । कोर बनाउने सोच पहिले थिएन । त्यसैले रणमैदानमा खटिएका दुई ब्रिगेड मिलाएर जनरल कौलको नेतृत्वमा कोर बनाइयो । त्यसमा जगेडा सैनिक र हेडक्वाटर थिएन । सामान्यतया एउटा कोरमा तीन डिभिजन हुन्छन् र प्रत्येक डिभिजनमा ती ब्रिगेड हुन्छन् । साथमा जगेडा सैनिकहरू पनि हुन्छन् ।
हतियार नभएको, सानो सङ्ख्या र प्रशासनिक आड नभएको कामचलाउ युनिटले अत्यन्त शक्तिशाली चिनियाँ सेनालाई के नै गर्नसक्थ्यो ? एकदम प्रतिकूल अवस्थामा भएको युद्धमा चिनियाँहरूले नै रोजेको समय र स्थानको अक्करमा सेना कसरी पर्नसक्थ्यो ? किन चिनियाँ जालोमा पर्नसक्थ्यो ? एक दुर्लभ आत्मसमीक्षामा बोल्दै प्रम जवाहरलाल नेहरूले यी प्रश्नको सही जवाफ दिएका थिए । राज्यसभामा १९६३ को सेप्टेम्बर ३ मा बोल्दै उनले भने, “नेफाको विपद् नितान्त बाध्यात्मक घटनाहरूका कारण आइलागेको थियो । अरू सरकारले समेत–यस्तो परिस्थितिमा) एकदम फरक काम गर्नसक्दैनथे ।” यो नेहरूको पहिलेको प्रवृत्तिको रवैयाको तुलनामा इमानदार वक्तव्य थियो । थागलाको आमनेसामनेको स्थितिलाई राजनीतिक हत्कन्डाको रूपमा स्वीकार गरेपछि र त्यो विनाशमा टुङ्गिन्छ भन्ने थाहा भएपछि नेहरूले चकित परेको स्वाङ पारे । उनले राजनेता र जनरलहरूलाई गलहत्याए । उनले चीनलाई पिठ्यूँमा छुरा रोपेको आरोप बताए । उनका विश्वासपात्रले सङ्ख्या र हतियारको कमी रहेको बताए ।
भावी पिँढीले नेहरूलाई सेप्टेम्बर ८ भन्दा अगाडिको सोझो विश्वास र लापरबाहीको लागि माफ गर्नेछैन । त्यसपछि उनले राजनीतिक सैन्य स्थिति गिजोलेकोमा उनलाई माफ गर्नेछैन । राजनेताहरू, जनरल थापर र कौलमाथि दोष थोपरेर मनलाई कठोर पारे पनि आउने पिँढीले
(डाल्भीलगायत) वरिष्ठ सैन्य अफिसरहरूलाई अपमानपूर्ण भूमिकाको लागि माफ गर्नेछैन ।
जनरल कौलको दोष ठूलो थियो । उनी १९५९–६१ मा क्वाटर मास्टर जनरल थिए र १९६१ अप्रिलदेखि १९६२ अक्टोबरसम्म जनरल स्टाफका चीफ थिए । उनी सीमा सडक सङ्गठनका स्थायी सदस्य थिए । उनी त्यस्ता एकमात्र जनरल थिए जसलाई अपरेसनका लागि सेना तयार छैन भन्ने थाहा थियो । चिनियाँको तुलनामा भारतीय सेनाको स्थिति दयनीय छ भन्नेमा उनलाई कुनै भ्रम थिएन । तैपनि, उनले कसरी गरम नीति स्वीकार गर्न सकेका थिए ? उनीभन्दा अघिका अफिसरले चिनियाँहरूलाई खेद्न कम्तीमा ६ महिनाको तयारी चाहिने बताउँदा पनि उनी कसरी चिनियाँहरूलाई खेद्न तयार भए ? के राजनेताहरूमाथि उनले दोष थोपर्नु जायज
थियो ?
सेनाको मूल नेतृत्वको रूपमा सैन्य हेडक्वाटर काम नलाग्नु नेहरू–मेनन–कौलको शासनले गरेको सबैभन्दा ठूलो ध्वंस थियो । १९६२ मा सैन्य हेडक्वाटर आफैँलाई विश्वास नभएका राजनीतिक आदेशहरू आदानप्रदान गर्ने सन्देशवाहकमात्र बन्न पुगेको थियो । यो प्रभावशाली रक्षामन्त्रीको शक्तिशाली राजनीतिक नेतृत्वको उपज थियो भने त्यसबेला पुनः विचार गर्नुपर्ने थियो ।
केही सैन्य अफिसरहरूले नेफाको पराजयतिर धकेल्ने गतिविधिमा आफू सामेल भएको महसुस गरे । ती त्रासद घटनाहरूको लागि सरकार र जनरल कौल जिम्मेवार भएको अनुभव गरे । चिनियाँ कैदबाट फर्केपछि डाल्भीले १९६२ सेप्टेम्बर–अक्टोबरको कष्टकर घडीमा प्रमुख पदहरूमा कार्यरत धेरै वरिष्ठ अफिसरहरूलाई भेटे । खासमा उनीहरू डाल्भीलाई भेट्न आतुर थिए । उनीहरूले डाल्भीमा आफूहरू ती घटनासँग नजोडिएको छाप पार्न चाहन्थे । उनीहरू यथार्थमा के भएको थियो भनी जान्न चाहन्थे । डाल्भीले ती कुरा सरकारलाई रिपोर्ट लेखेर बुझाउने बताए । उनीहरूले ती दुष्कर महिनामा लिइएका कुनै पनि निर्णयहरूमा आफू जिम्मेवार नभएको बताए । लम्बेतान व्याख्या गर्दै उनीहरूले माथिल्ला अफिसरले आफ्ना सुझाव नसुनेको गुनासो गरे । उनीहरू डाल्भीको फौजलाई रगतमा डुबाउने निर्णयहरूमा आफू र आफ्नो विभागको कसुर नभएको लेखेर डाल्भीले आफूहरूलाई छुटकारा दिलाए हुन्थ्यो भन्ने चाहन्थे । उनीहरूमध्ये धेरैले कौलको दोहोलो काढे । यो अनौठो कुरा थियो किनभने तीमध्ये धेरै कौलकै कृपाले सो पदमा पुगेका थिए र उनको विचारसामु नुहेका थिए । बाघ लडेको थियो ¤ मुसाहरू हुँकार गरिरहेका थिए !
सैन्य हेडक्वाटर र सेनाको परम्पराले काम गरेको थिएन । त्यसले किन काम गरेन ? के त्यो मेनन र कौलको भव्य व्यक्तित्वले दब्बु बनेको थियो ? के सेनाप्रमुखले आफूले सहयोग लिनुपर्ने सैन्य हेडक्वाटरलाई बेवास्ता गरेका थिए ? के उनले गर्नुपर्ने कामको स्टाफबाट अध्ययन गराएका थिए ? थिए भने उच्चपदस्थहरूले आफूलाई केही थाहा थिएन कसरी भन्थे ? के सेनाप्रमुखले सामान्य माध्यमबाट आदेश जारी गरेका थिए ? कुनै पनि सेनाले आफ्नो सेनाप्रमुखले राजनीतिक अगुवाहरूको अव्यवहारिक आदेश सारेको हेर्न चाहन्न । के नीति निर्माण केही चुनिएका राजनेता, कर्मचारी र एक्कादुक्का सैन्य अफिसरबीच खुम्च्याइएको थियो ? के चिनियाँहरूलाई खेद्ने आदेश दिनुअघि सेनाप्रमुखले आफ्ना चारजना प्रधान स्टाफ अफिसरको बैठक बसेका थिए वा के उनले नयाँ कोर बनाउनमा सहमति जनाएका थिए ? उनले त्यसो गरेको भए होहल्ला हुने निश्चित थियो ।
१९६२ सेप्टेम्बरमा सरकारले चिनियाँहरूलाई खेद्ने ‘निर्णय’ लिएपछि प्रधान स्टाफ चीफहरूको सुझाव मागिएन । निर्णय लागू गराउन सेनासँग स्रोतसाधन हुन्थ्यो नै भने पनि (जुन थिएन) आवश्यक प्रक्रियाका लागि समय थिएन ।
हरेक विनाशले विभिन्न बुझाइ र घोचपेचहरूको खेती गर्छ । डाल्भीले १९६३ मा यस्तै हाँसोलाग्दो किस्सा सुने । एकजना प्रधान स्टाफ चीफले आफ्नो आश्चर्य पोखेका रहेछन्, “नेफामा फटफटाउने काम भएछ ।” उनले त्यहाँको विषयमा दैनिक अखबारहरूबाट खबर सँगालेका रहेछन् ! चिनियाँहरूलाई खेद्ने निर्णय जसरी लिइएको थियो र सीमाका सैनिकहरूलाई सैन्य हेडक्वाटरको इतिहासका ती काला दिनमा जसरी अत्याइएको थियो त्यस कोणबाट हेर्दा यो कथा सत्य देखिन्छ ।
भारतका रक्षामन्त्रीहरू १९४७–६२
१९६२ मा गडबडी कहाँ थियो ? युद्धको अग्रदिशाको संरचनामाथि दोष लगाउने ठाउँ छैन । भारतसँग प्रतिभाहरू थिए । युद्धमा विजयी हुन चाहिने बहादुर सैनिकहरू थिए । दोषी प्रभावहीन उच्चपदस्थहरू थिए । उनीहरूले समग्र संरचनालाई कमजोर बनाउन दिए । १९६२ भन्दा अगाडि पनि प्रधानमन्त्री र रक्षामन्त्रीले महत्वपूर्ण निर्णय आफैँ गरेको देखिन्छ । विज्ञ समिति र तिनका सुझाव बेवास्ता गरिएको थियो वा मागिएको थिएन । कसैले यसमा चाइँचुइँ गरेको थिएन । माथिल्ला अधिकारीहरूले चुपचाप कामकाज हेरेर चित्त बुझाएका थिए ।
युद्ध कुँजाहरूमाथि भर परेका विलक्षणहरूको खेल होइन । यो त धेरैजना नम्र खेलाडीहरू आआफ्ना काममा खटिएर खेलिने सामूहिक खेल हो । जतिसुकै महान् भए पनि फेरिफेरि एकजना व्यक्तिलाई मात्र राष्ट्रिय नीति लेखाउन दिनुहुँदैन अथवा उनैले मात्र त्यसलाई लागू गर्ने भार बोक्न सक्लान् भनी अपेक्षा गर्नुहुँदैन ।
नेहरू र मेननको दबदबा कसरी कायम भयो ? बेलायती प्रणालीमा एकाध व्यक्तिले मात्र राष्ट्रिय स्वार्थमा दखल दिन सक्दैनथे । अधिकारको दुरूपयोग १९४७ लगत्तै सुरू भयो । कृष्ण मेननभन्दा अगाडि रक्षा मन्त्रालयले प्रधानमन्त्रीसँग स्वस्थ कामको तालमेल मिलाउनसक्ने खुबी भएको वा सेनाका आवश्यकताहरू अघि सार्न सक्ने मन्त्री पाएको थिएन । १९५० मा सरदार पटेलको निधनपछि नेहरूको उचाइ चुलियो र रक्षा मन्त्रालयले भाउ पाएन ।
अस्वस्थ अभ्यास भारतका प्रथम रक्षामन्त्री सरदार बलदेव सिंहको पालादेखि नै सुरू भयो । मूल्य चुकाउन धेरै समय लाग्यो । १९६२ को अक्टोबर २० मा त्यो मूल्य पनि चुकाइयो । “बुबालाई थाहा छ” भन्ने युग शरम र अपमानको वर्षासँगै टुङ्गियो ।
प्रथम रक्षामन्त्री बलदेव सिंह स्वतन्त्रताअघिका शिख नेता थिए । १९४६ को अन्तरिम मन्त्रिमण्डलमा उनले शिख प्रतिनिधित्वका हिसाबले स्थान पाएका थिए । काङ्ग्रेसका अन्य वरिष्ठ नेताहरूले थोरै शक्ति पाउने हुनाले रक्षामन्त्रालयमा ध्यान दिएनन् । मन्त्री पदका लागि नेहरूले काङ्ग्रेसबाहिर हेर्दैनथे । स्वतन्त्रताअघि सुरक्षाविद्को रूपमा चिनिने एचएन कुन्ज्रू रक्षा मन्त्रीको लागि योग्य हुनसक्थे । जेहोस्, सरदार बलदेवसँग रक्षामन्त्री हुने योग्यता थिएन । उनी धनी र सजिला व्यक्ति थिए । उनलाई समस्याहरूसँग जुध्न मनपर्दैनथ्यो । उनीसँग राष्ट्रिय रणनीति र प्रतिरक्षाको ज्ञान थिएन । उनी सबै काम आफ्ना रक्षा सचिवलाई छोड्थे । सचिव एचएम पटेल पुरानो विचारका आइसीएस अफिसर थिए । उनी अभिमानी र महत्वाकाङ्क्षी थिए र लगाम आफ्नो हातमा राख्न रूचाउने खालका थिए ।
भारतका प्रथम कमान्डर इन चीफ जनरल करिप्पा उत्तिकै अभिमानी थिए । मिजासका कारण सचिव र चीफबीच ठाकठुक भइरहन्थ्यो । सरदार बलदेवलाई यसबारे थाहा थियो । तैपनि उनीहरूलाई रोक्न उनले केही गरेनन् । उनले मन्त्रालयको काम सहज बनाउन स्पष्ट नीतिनियम बनाएनन् । उनले निजामती र सैन्य अधिकारीहरूबीच शक्ति र जिम्मेवारीलाई लिएर स्पष्ट रेखा कोरेनन् । उनले नयाँ संविधानअनुरूप परिवर्तनहरू गर्नुपथ्र्यो । धेरै अन्योल, अविश्वास, बाझिने जिम्मेवारी र थोत्रो प्रक्रियाको स्रोत सरदार पटेलकै कार्यकाल थियो । १९६२ सम्ममा यो अवस्था मिलाउनै नसकिने बनेको थियो । १९४७ पुरानो र औपनिवेशिक कार्यशैली पन्छाउने समय थियो । बेलायतीहरूले छोडेर गएको अधिकार कर्मचारी र सेनालाई बाँड्नका लागि दिनुहुँदैनथ्यो किनभने दुवैले आफ्नो हात माथि पार्न कोसिस गरिहाल्थे । यो तानातान रोक्न सक्ने कडा चरित्र र दृढ राजनीतिक नेतृत्वको खुबी सरदार बलदेवसँग थिएन । उनी नेहरूलाई प्रभावित गर्नसक्दैनथे । त्यसैले उनी र उनको मन्त्रालय छायाँमा परिरह्यो । प्रम नेहरूको अगुवाइमा मन्त्रिमण्डलको दबदबा सरदार बलदेवकै पालामा सुरू भएको थियो । उनमा दूरदृष्टि थिएन । त्यसैले उनकै पालामा १९५० मा चीन तिब्बतमा पसेपछि उनले चिनियाँ खतरा ठम्याउन सकेनन् । उनी भारतको रक्षा इतिहासमा गलत समय र स्थानमा परेका असल र साधारण व्यक्ति थिए ।
सरदार बलदेवपछि पूर्वआइसीएस कर्मचारी गोपालस्वामी अयङ्गर रक्षामन्त्री बने । उनी शान्त, आलोचक, बुद्धिमान र प्रशासनिक अनुभव भएका व्यक्ति थिए । मन्त्री बनेको केही महिनामै उनको निधन भयो । उनले कर्मचारी र सेनाबीच कामको व्यवस्थित वातावरण बनाउन सक्थे । उनले कर्मचारीहरूलाई हावी हुन दिने थिएनन् ।
अयङ्गरपछि पुराना काङ्ग्रेस नेता डा. कैलाश काट्जु रक्षामन्त्री बने । १९३७ मा संयुक्त प्रान्तका कानुनमन्त्री बन्नुभन्दा अघि उनी विख्यात वकिल थिए । त्यसपछि उनी जेल गइरहे । १९४६ पछि उनी पुनः मन्त्री बने । उनी संविधानसभा सदस्यसमेत थिए । उडिसा र पश्चिम बङ्गालको गभर्नर हुँदै उनी १९५१ मा केन्द्रीय मन्त्री बने । गृह र कानुन मन्त्रालय हेरिरहेका उनलाई अयङ्गरको मृत्युपछि रक्षा मन्त्रालय दिइयो । १९५७ मा उनी काङ्ग्रेसभित्रको किचलो मिलाउन मध्य प्रदेशको मुख्यमन्त्री बनेर गए ।
काट्जु प्रतिभाशाली, योग्य र मानवीय व्यक्ति थिए । तर, रक्षा उनको मैदान थिएन । १९५२ मा रक्षामन्त्री बन्दा उनी ६५ वर्ष लागेका थिए । उनी बुढा, थकित र बहिरा बनेका थिए । उनले युद्धको अग्रदिशाका जटिलताहरू ठम्याउन सक्दैनथे । स्वतन्त्र भारतमा उनको ठूलो योगदान थियो । तर, वरिष्ठता र मुख्य मन्त्री पद काङ्ग्रेसीहरूले नै भर्ने नेहरूको झुकावका कारण काट्जुलाई रक्षा मन्त्रालय दिइनु सही थिएन । नेहरूले उपयुक्त व्यक्ति नपाउँदासम्म बीचबीचमा रक्षा मन्त्रालयको काम आफैँ हेर्थे । काट्जुलाई सो पद अन्याय थियो र सेनाको लागि त्यो घातक बन्न पुग्यो । त्यसबेला पाकिस्तानसँग बराबर हुनुपर्ने र चीनभन्दा पहिले सीमामा बलियो हुनुपर्ने मागहरू उठिरहेका थिए । डा. काट्जुले केही हानि गरेनन् । तर, उनले केही असल पनि गरेनन् । उनको कार्यकालमा उल्लेख्य केही भएन । धेरै समय घरेलु राजनीतिमा बिताएको हुनाले उनलाई रक्षा मामिलाबारे थोरै ज्ञान थियो ।
अन्त्यतिर उनी अब्बल राजनेता बने । १९६२ मा ७५ वर्षको उमेरमा उनी मध्य प्रदेशको मुख्यमन्त्री बन्न चाहन्थे । तर, उनी १९६२ को आम निर्वाचनमा हारे । उनी उपनिर्वाचनमा फर्के तर मुख्यमन्त्रीमा आएनन् । यस हिसाबले उनी काङ्ग्रेसी नमुना थिए । स्वतन्त्रता आन्दोलनको आफ्नो ‘बलिदान’ बाट प्रशस्त फसल काटेर पनि उनी अन्तिम साससम्म ‘जनताको सेवा’ गर्नमा ढिपी कसिरहेका थिए ।
काट्जुको कार्यकालमा सेना चिप्लेर सबैभन्दा तल प¥यो । उनले कुनै नयाँ काम थालेनन् । सबैथोक आइसीएस र सेनालाई मिलाउन भनियो । पाकिस्तानको सशस्त्रीकरणमा प्रतिक्रिया जनाइएन । उनकै कार्यकालमा अमेरिकाको मद्दतले पाकिस्तान बलशाली बन्यो । यसको विरोधमा उनले उचित प्रतिरक्षात्मक उपाय अवलम्बन गर्नुपर्ने थियो । भारतको रक्षा इतिहासमा उनी दोस्रा अनुपयुक्त व्यक्ति थिए ।
महावीर त्यागीले रक्षा मन्त्रालयमा उनकै लागि बनाइएका पदहरूमा रहेर काम गरेका थिए । उनी काङ्ग्रेसका कचकचे थिए । उनले मन्त्रीहरूलाई प्रश्न सोधेर हैरान बनाउँथे । उनलाई शान्त पार्न र अन्य मन्त्रीहरूलाई बचाउन उनैलाई मन्त्री बनाउने सोचियो । रक्षा मन्त्रालयजस्तो महत्वहीन अर्को थिएन । त्यसैले उनी काट्जुपछिका रक्षामन्त्री बने । प्रथम विश्वयुद्धमा सेनामा सेवा गरेको फुर्तीफार्तीबाहेक उनीसँग रक्षासम्बन्धी धेरै ज्ञान थिएन । सेनामा घरेलु उद्योगमा बनेको खादीको सिरक आदि भित्र्याउने श्रेय उनैलाई जान्छ । उनी आफ्ना ‘जनरल’ हरूले घरिन, सैन्य सामानको खरिदमा विदेश जान र वरिष्ठ अफिसरहरूको उपस्थितिमा भाषण दिन रूचाउँथे । उनी आफ्ना उपलब्धिहरूको धङधङीले नछोडेको रोब देखाउँथे । केही महिनापछि उनलाई निकालियो र उनको ठाउँमा कृष्ण मेनन रक्षामन्त्री बने । त्यागी केही समयपछि मन्त्रीहरूलाई पुनः घोचपेच गर्न थाले । त्यसपछि उनलाई पुनर्वास मन्त्रालयमा लागियो ।
त्यागी तेस्रा अयोग्य रक्षामन्त्री थिए । सेनालाई दोस्रो विश्वयुद्धका हतियारबाट मुक्त गरेर नयाँ हतियारले सुसज्जित गर्नुपर्ने समयमा उनी रक्षामन्त्री बनेका थिए । रक्षा उत्पादन मन्त्रीको रूपमा यो काम उनको थियो । उनले घरेलु उत्पादन बढाउन वा विदेशबाट सामग्री मगाउनका लागि मन्त्रिमण्डललाई प्रभावित गर्नसकेनन् । उनले मन्त्रालय छोड्दा सैन्य सामग्रीको स्थिति सबैभन्दा नाजुक थियो ।
Leave a Reply