एक महिनासम्म अनलाइन कक्षा सञ्चालन गर्ने सरकारको तयारी

काठमाडौँ, ३१ चैत । स्वास्थ्य तथा जनसङ्ख्यामन्त्री हृदयेश त्रिपाठीले कोभिड–१९ को सङ्क्रमण बढ्न थालेपछि काठमाडौँलगायत देशका ठुला सहरी क्षेत्रका विद्यालय एक महिना बन्द गर्ने तयारीमा सरकार रहेको बताउनुभएको छ ।
स्वास्थ्य पत्रकार मञ्च, नेपालले आज आयोजना गरेको साक्षात्कार कार्यक्रममा उहाँले नयाँ खालको भाइरस बढ्दै गएपछि एक महिनासम्म अनलाइन कक्षा सञ्चालन गर्नेबारे मन्त्रिपरिषद् बैठक र कोभिड–१९ सङ्गट व्यवस्थापन केन्द्र (सीसीएमसी) मा समेत छलफल गरिएको जानकारी दिनुभयो ।
“सहरी क्षेत्रमा कम्तीमा एक महिनासम्म अनलाइन कक्षा सञ्चालन गर्ने कि भन्ने तयारी छ, अनलाइनबाट कक्षा सञ्चालन गर्दा सात–आठ लाख विद्यार्थी घरमै रहेर पढ्ने र त्यसले २० प्रतिशत आवतजावतमा कमी आउने देखिएको छ ।” उहाँले भन्नुभयो ।
मन्त्री त्रिपाठीले अहिलेको नयाँ भाइरस (भेरियन्ट) युवा र बालबालिकामा पनि देखिएकाले डरलाग्दो रहेको बताउनुभयो । “१८ वर्षभन्दा मुनिका बालबालिकाका लागि खोप विकास भएको छैन, अहिले देखिने भाइरस बालबालिकामा पनि सर्ने भएको र उनीहरूलाई खोपसमेत लगाउन नमिल्ने भएकाले सङ्क्रमण दर फैलिन सक्ने सम्भावनालाई ध्यानमा राखेर अनलाइन कक्षा सञ्चालन गर्नुपरेको छ ।” उहाँले भन्नुभयो ।
छ लाख पुग्ने प्रक्षेपण
मन्त्री त्रिपाठीले अहिलेको अवस्थामा सङ्क्रमण बढद्ै गए असारको अन्तिमसम्म छ लाख सङ्क्रमित पुग्ने प्रक्षेपण गरिएको जानकारी दिनुभयो । “अहिले सङ्क्रमण बढिरहेको अवस्थामा दैनिक ११ हजार र असारसम्म छ लाख सङ्क्रमित पुग्ने प्रक्षेपण गरिएको छ” उहाँले भन्नुभयो ।
उहाँले सङ्क्रमण बढ्न नदिनका लागि सीमा नाकाबाट आउनेको परीक्षण गर्ने र सङ्क्रमण देखिएपछि आइसोलेसन सेन्टरमा राखिने बताउनुभयो । उहाँले नेपाल भारतको मुख्य सीमा नाकामा एक हजार अट्ने खालको होल्डिङ सेन्टर राख्ने निर्माण गर्ने कार्य भइरहेको जानकारी दिनुभयो । उहाँले बन्दाबन्दी अवस्था आउनुभन्दा अगाडि नै रोकथाम र नियन्त्रण गरिने गरी तयारी गरिएको बताउनुभयो । “गत वर्षदेखिको अनुभव र भौतिक पूर्वाधारको तयारीले हामी बन्दाबन्दीमा नगइकन रोकथाम र नियन्त्रण गर्न सक्षम छौँ मुलुकलाई बन्दाबन्दीसम्म पुग्न दिदैनौँ ।” उहाँले भन्नुभयो ।
मन्त्री त्रिपाठीले सङ्क्रमणको दर बढ्दै गएकोले काठमाडौँ उपत्यकामा रहेका अस्पताललाई तयारी अवस्थामा राख्न निर्देशन दिइएको जानकारी दिँदै पहिलेको भाइरसले एक जनाबाट ६ जनामा सङ्क्रमण सारे पनि अहिलेको नयाँ भाइरसले एक जनाबाट ४० जनामा सङ्क्रमण सार्नसक्ने बताउनुभयो । उहाँले अर्थतन्त्रभन्दा जनताको जीवन ठुलो भएकोले सरकारले जनताको जीवनलाई महत्वपूर्ण मानेर रोकथाम र नियन्त्रण गरिने बताउनुभयो ।
भारतमा सङ्क्रमण बढेकोले खोप आउन ढिलाइ
मन्त्री त्रिपाठीले भारतमा सङ्क्रमण ह्वात्तै बढेकोले कोभिड–१९ को खोप आउन ढिलाइ भएको जानकारी दिनुभयो । उहाँले भन्नुभयो, “खोप उत्पादक कम्पनीको स्थानीय एजेन्टले बिनालगानी १० प्रतिशत कमिसन मागेपछि २५ दिन ढिला भयो, तर सम्झौता हुने बेला भारतमा सङ्क्रमण बढेपछि त्यहाँका सरकारले आयात रोकिएका कारण नेपालमा खोप आउन सकेन ।” उहाँले चाँडै नै १० लाख मात्रा खोप ल्याउने जानकारी पनि दिनुभयो ।
रासस