भक्तपुर नपाको निर्माणमा कम गुणस्तरको सामग्री

भक्तपुर नगरपालिकाले गर्ने हरेक विकास निर्माण, पुनःनिर्माण तथा मर्मत सम्भारका कार्यहरू जनसहभागितामा उपभोक्ता समितिमार्फत जनताको अपनत्व भावना विकास गराई अघि बढिरहेको सबैमा थाहा भएको विषय हो । नगरपालिकाले विरलैमात्र निर्माण कार्यहरू ठेक्कामा दिने गर्छ । यस्तै विरलै दिइएको ठेक्कामा भनपा वडा नं. १० स्थित निर्माणाधीन स्वास्थ्य चौकी पनि एक हो ।
नेपालमा आर्थिक मसान्तमा विकासले गति लिनुलाई कुनै अस्वाभाविक मानिँदैन । यस स्वास्थ्य चौकी नपाको अनुमानित लागतभन्दा धेरै कममा ठेक्का लिएको स्थानीयहरूबिच चर्चा छ । यद्यपि, यस स्वास्थ्य चौकी निर्माण प्रक्रियामा असारे विकास निर्माणको रोग देखापरेकोमा स्थानीयवासी चिन्तित छन् ।
निर्माणका लागि ल्याइएका निर्माण सामग्रीहरू (बालुवा र रोडा) कम गुणस्तरको छ । यस्ता निर्माण सामग्री प्रयोग हुँदा पनि निरीक्षणमा आउने प्राविधिकहरूले यस विषयमा अनभिज्ञता देखाएका छन् । वर्षात्ले तल्लो ताइबिन बाँधिएको भत्किएर पुरिएको तर राम्रोसँग माटो सफा नगरी त्यत्तिकै ढलान हुँदा पनि प्राविधिक अगाडि देखिँदैन । प्रत्येक दिन प्राविधिकहरू आउँछन्, जान्छन् तर झाराटार्ने कार्यमात्र भएको स्थानीयहरूबिच चर्चा छ । गुणस्तरहीन संरचना निर्माण हुँदा भविष्यमा के हुने हो, हेर्न र भोग्न बाँकी छ । भविष्यमा हुने दुर्घटनाबाट बच्न सम्बन्धित निकायले समयमै ध्यान दिनु आवश्यक छ ।