क्यासीका प्रतिनिधिलाई बीसीसीआईमा स्वागत

भक्तपुर, २२ कार्तिक । एसिया–प्रशान्त चेम्बर अफ कमर्स एन्ड इन्डस्ट्री परिसङ्घ (क्यासी) को टोलीलाई बुधबार भक्तपुर उद्योग वाणिज्य सङ्घ (बीसीसीआई) मा स्वागत गरेको छ ।
परिसङ्घका अध्यक्ष पिटर म्याकमुलिनको नेतृत्वमा आएको टोलीलाई एक कार्यक्रमबिच सङ्घका अध्यक्ष शिवप्रसाद मानन्धरले स्वागत गर्नुभएको हो ।
कार्यक्रममा अध्यक्ष मानन्धरले सङ्घका पदाधिकारी र क्यासी टोलीका प्रतिनिधिहरूबिचको भेट तथा छलफल एकदमै महत्वपूर्ण साबित हुने धारणा राख्दै भविष्यमा एकआपसमा सहयोग तथा सहकार्य गरी अगाडि बढ्न सङ्घ सदैव तयार रहेको बताउनुभयो ।
क्यासीका अध्यक्ष म्याकमुलिनले कला र संस्कृतिको हिसाबले धनी जिल्ला भक्तपुरस्थित भक्तपुर उद्योग वाणिज्य सङ्घलाई क्यासीको सदस्यको रूपमा पाउँदा अत्यन्त खुसी लागेको चर्चा गर्दै उद्योग, व्यवसायको विकासलगायतका विषयमा क्यासी र सङ्घबिच सहयोग आदानप्रदान गर्न तत्पर रहेको बताउनुभयो ।
यसैबिच, सङ्घले क्यासी टोलीलाई भक्तपुरका विभिन्न सम्पदाहरूको अवलोकन गराउनुभएको थियो ।