वैदेशिक हस्तक्षेपविरुद्ध सङ्घर्ष गरिरहनु आवश्यक

भक्तपुर, २४ कार्तिक । वागीश्वरी कलेज, वागीश्वरी कलेज अफ म्यानेजमेन्ट र वागीश्वरी माध्यमिक विद्यालयको संयुक्त आयोजनामा कलेज भवन उद्घाटन, दीपावली, नेपाल संवत् ११४४ र छठको अवसरमा शुभकामना आदानप्रदान तथा नवागन्तुक विद्यार्थीहरूलाई स्वागत एवम् सांस्कृतिक कार्यक्रम शुक्रबार सम्पन्न भयो ।
कार्यक्रममा नेपाल मजदुर किसान पार्टीका अध्यक्ष नारायणमान बिजुक्छेँले देश विदेशको राजनीतिक परिस्थितिबारे विद्यार्थीलाई सचेत पारिराख्नुपर्नेमा जोड दिँदै देश र जनताको सेवा गर्ने देशभक्तिको भावना जगाउनुपर्ने बताउनुभयो । उहाँले वैदेशिक हस्तक्षेपविरुद्ध सङ्घर्ष गरिरहनुपर्ने आवश्यकता औँल्याउँदै अठार वर्ष पूरा गरेका हरेक युवालाई सैनिक तालिम अनिवार्य गर्नुपर्छ भन्नुभयो ।
अमेरिकाको सहयोगमा इजरायलले विगत ३० दिनमा १० हजारभन्दा बढी प्यालेस्टिनी जनताको नरसंहार गरेको चर्चा गर्दै उहाँले इजरायलका प्रधानमन्त्री न्येतन्याहुले प्यालेस्टिनी अस्तित्व मेट्ने दुष्प्रयास गरेकै कारण युद्ध भएको हुँदा यसको जिम्मेवार इजरायल हो भन्नुभयो ।
कलेज व्यवस्थापन समितिका अध्यक्ष एवं भक्तपुर नगरपालिकाका प्रमुख सुनिल प्रजापतिले वागीश्वरी कलेजले सस्तोमा स्तरीय शिक्षा प्रदान गरिरहेकोमा सन्तोष व्यक्त गर्दै कलेजमा नयाँ–नयाँ विषय थप्ने प्रयास भइरहेको जानकारी दिनुभयो ।
त्रिभुवन विश्वविद्यालयले निजी कलेजहरूको दबाबमा सामुदायिक कलेजलाई नयाँ नयाँ विषयको सम्बन्धन नदिएको प्रति असन्तोष व्यक्त गर्दै उहाँले बढ्दो सङ्ख्यामा नेपाली विद्यार्थीहरू विदेसिनुमा विश्वविद्यालयका जिम्मेवार व्यक्तिहरू नै दोषी छन् भन्नुभयो । हालै कार्यकाल पूरा गरेका त्रिविका उपकुलपतिले आफ्नो कार्यकालको एकतिहाइ समय तालाबन्दी भोग्नुपरेको बताएबाट त्रिविको स्थिति छर्लङ्ग हुन्छ भन्दै उहाँले देशका १४४० कलेजमध्ये ५०० कलेज बन्दको स्थितिमा पुगेको बताउनुभयो । सरकारको एउटा गलत नीतिको कारण देशका २२८ नर्सिङ कलेज बन्द हुँदा नेपालको सीमावर्ती भारतीय क्षेत्रमा सयौँ नर्सिङ कलेज पोषिएको बताउँदै उहाँले कृषिप्रधान देशमा कृषिमा विद्यार्थी अभाव हुनु विडम्बनापूर्ण छ भन्नुभयो ।
नेमकिपाका केन्द्रीय सदस्य एवं वाग्मती प्रदेशसभा सदस्य सुरेन्द्रराज गोसाईले एमसीसीका कारण देश अप्ठ्यारोमा पर्दै जाने निश्चित छ भन्ने कुरा हरेक क्षेत्रमा बढ्दो अमेरिकी हस्तक्षेपले पुष्टि गर्छ भन्दै नेपाली जनता यसमा सचेत नभए भोलि देशको अस्तित्व नै खतरामा पर्न सक्छ भनी सचेत पार्नुभयो ।
नेपाल क्रान्तिकारी विद्यार्थी सङ्घ र नेपाल क्रान्तिकारी युवा सङ्घले अन्तर्राष्ट्रिय कर्तव्यबोध गरी राजधानीमा हालै प्यालेस्टिनी जनताको पक्षमा इजरायली फासीवादको विरुद्ध प्रदर्शन तथा सभा गरेको चर्चा गर्दै उहाँले अरूलाई परेको अन्यायको विरुद्ध आवाज नउठाए भोलि हामीलाई कसैबाट अन्याय भए कसले आवाज उठाउँछ भनी प्रश्न गर्नुभयो । उहाँले भन्नुभयो, “संसारका न्यायप्रेमी जनता युद्धको विरोधमा छन्† स्वतन्त्र प्यालेस्टाइनको पक्षमा छन् । यस विषयमा पनि शिक्षक विद्यार्थी जानकार हुन आवश्यक छ ।”
भनपा ९ का वडाध्यक्ष एवं वागीश्वरी मावि व्यवस्थापन समितिका अध्यक्ष रवीन्द्र ज्याख्वले शिक्षा राज्यको दायित्व हो तर यहाँ शिक्षा किन्ने वस्तु बनाइएको छ† पैसा हुने र पैसा नहुनेबिच शिक्षामा विभेद छ भन्दै उहाँले वागीश्वरी स्कूलले आफ्नो वरिपरिका स्कूललाई पनि सक्दो सहयोग गर्दै आएको बताउनुभयो ।
कलेजका प्राचार्य धनकुमार श्रेष्ठले धन्यवाद ज्ञापन गर्नुभएको उक्त कार्यक्रममा वागीश्वरी मािवका प्रअ कृष्णप्रसाद धन्छाले विद्यालयको सङ्क्षिप्त प्रतिवेदन सुनाउनुभयो ।
कलेज भवन निर्माण उपभोक्ता एवं अनुगमन समितिका संयोजक ज्ञानसागर प्रजापतिले २०७६ साल मङ्सिर २१ गते शिलान्यास भई २०८० साल असार मसान्तसम्ममा भवन निर्माणमा पाँच करोड चौध लाख सन्तानब्बे हजार पाँच सय त्रिपन्न रूपैयाँ खर्च भएको विवरण प्रस्तुत गर्नुभयो । उहाँका अनुसार उक्त रकममध्ये वाग्मती प्रदेश, भक्तपुर नगरपालिका र विश्वविद्यालय अनुदान आयोगबाट दुई करोड अठहत्तर लाख सत्तासी हजार अन्ठानब्बे रूपैयाँ र कलेजको आन्तरिक स्रोतबाट दुई करोड छत्तीस लाख दस हजार चार सय पचपन्न रूपैयाँ खर्च भएको छ ।
प्रमुख अतिथि बिजुक्छेँले नवनिर्मित भवनको मूलढोकामा रिवन काट्नुका साथै ताम्रपत्र अनावरणपछि समारोहको उद्घाटन गर्नुभएको थियो ।
भवन निर्माणमा योगदान दिने इन्जिनियरद्वय गङ्गासागर प्रजापति र अमोद उलकलाई मायाको चिनोसहित सम्मानपत्र प्रदान गरिएको थियो भने निर्माण व्यवसायीद्वय प्रदीप गौतम र नरेश त्वायनालाई पनि मायाको चिनोसहित प्रशंसापत्र प्रदान गरिएको थियो ।
कार्यक्रममा भनपा शिक्षा शाखा प्रमुख कृष्णप्रसाद कर्माचार्य, विद्यार्थी पूर्णिमा प्रजापति र कार्यक्रमका संयोजक काजल थापाले शुभकामना मन्तव्य दिनुभएको थियो ।
सोही दिन वागीश्वरी मावि च्याम्हासिंहमा पनि नवागन्तुक विद्यार्थीहरूलाई स्वागत, दीपावली, नेपाल संवत् ११४४ र छठको अवसरमा शुभकामना तथा सांस्कृतिक कार्यक्रम भएको थियो ।
विव्यस अध्यक्ष रवीन्द्र ज्याख्वको प्रमुख आतिथ्य र प्रा.डा. सिद्धिवीर कर्माचार्यको विशेष आतिथ्यमा सम्पन्न उक्त कार्यक्रममा उत्कृष्ट विद्यार्थीहरूलाई पुरस्कार विवरण गरिएको थियो ।
विद्यार्थी श्रीशा दिदियाको सभापतित्वमा भएको उक्त कार्यक्रममा विव्यस छोरीमैयाँ सुजखु, स.प्र.अ. उकेश सुवाल, कार्यक्रम संयोजक शिक्षक भानुभक्त हुमागाईका साथै विद्यार्थी दुर्गा बस्नेतले पनि बोल्नुभएको थियो ।
कमलविनायक र च्याम्हासिंह दुवैतिर औपचारिक कार्यक्रमपछि विद्यार्थीहरूको सक्रियता र सहभागितामा सांस्कृतिक कार्यक्रम भएको थियो ।