ख्वप विश्वविद्यालय विधेयक संसद्बाट पारित गर्ने प्रक्रिया अगाडि बढाउन शिक्षामन्त्रीको ध्यानाकर्षण

भक्तपुर, २१ माघ । भक्तपुर नगरपालिकाको संरक्षकत्वमा सार्वजनिक विश्वविद्यालयको रूपमा सञ्चालन हुने गरी ‘ख्वप विश्वविद्यालय विधेयक २०८०’ संसद्बाट पारित गर्ने प्रक्रिया अगाडि बढाउन शिक्षा विज्ञान तथा प्रविधिमन्त्री अशोककुमार राईसमक्ष भक्तपुर नगरपालिकाका प्रमुख सुनिल प्रजापतिले आइतबार अनुरोध पत्र हस्तान्तरण गर्नुभयो ।
भनपा वडा नं. ९ का वडाध्यक्ष रवीन्द्र ज्याख्व, भक्तपुर नगरपालिकाद्वारा सञ्चालित ख्वप इन्जिनियरिङ कलेजका प्राचार्य सुजन माक र ख्वप कलेज अफ इन्जिनियरिङका प्राचार्य सुनिल दुवालसमेतको टोलीले मन्त्री राईको ध्यानाकर्षण गरेको हो ।
सोही क्रममा मन्त्री राईले लामो समयदेखि विचाराधीन रहेको ख्वप विश्वविद्यालय विधेयक २०८० छिट्टै संसद्मा पेश गर्ने तयारी भइरहेको जानकारी दिँदै हिउँदे अधिवेशनको पहिलो प्राथमिकतामा ख्वप विश्वविद्यालयसम्बन्धी विधेयक प्रस्तुत गर्ने तयारीमा मन्त्रालय अग्रसर रहेको बताउनुभयो ।
विभिन्न विज्ञहरूसँग छलफल गरी मन्त्रालयले ख्वप विश्वविद्यालयको विधेयकको तयारी गरिरहेको उहाँले बताउनुभयो ।
मन्त्री राईले देशमा भ्रष्टाचार रोक्न सके र उपलब्ध स्रोत साधनको उपयोग गरी इमानदारीपूर्वक काम भए देशको विकास छिटो हुने बताउनुभयो ।
सोही क्रममा भक्तपुर नगरपालिकाका प्रमुख सुनिल प्रजापतिले भक्तपुर नगरपालिकाले वि.सं. २०५६ सालमा ख्वप उच्च मा.वि., २०५८ सालमा ख्वप इन्जिनियरिङ कलेज र ख्वप कलेज, २०६० सालमा ख्वप बहुप्राविधिक अध्ययन संस्थान, २०६५ सालमा ख्वप कलेज अफ इन्जिनियरिङ र २०७९ सालमा ख्वप कलेज अफ लको स्थापना गरी ती कलेजहरूमा देशभरका सात हजारभन्दा बढी विद्यार्थीहरू अध्ययन गरिरहेको अवगत गराउँदै ख्वप विश्वविद्यालय स्वीकृत भएमा जनतालाई फाइदा हुने बताउनुभयो ।
प्रमुख प्रजापतिले शिक्षा मन्त्रालयबाट ख्वप विश्वविद्यालयसम्बन्धी समितिसमेत गठन गरिसकेको हुँदा आवश्यक प्रक्रिया पु¥याइ भक्तपुर नगरपालिकाको संरक्षकत्वमा सार्वजनिक विश्वविद्यालयको रूपमा सञ्चालन हुने गरी ‘ख्वप विश्वविद्यालय विधेयक २०८०’ संसद्बाट पारित गर्ने प्रक्रिया अगाडि बढाइदिन अनुरोध गर्नुभयो ।
प्रमुख प्रजापतिले मन्त्री राईलाई नपाद्वारा प्रकाशित विभिन्न प्रकाशनहरू हस्तान्तरण गर्नुभयो ।