विद्यालयस्तरीय खेलकुद प्रतियोगितालाई अझै व्यवस्थित गर्नु आवश्यक

भक्तपुर नगरपालिकाले विगत केही वर्षदेखि आयोजना गर्दै आएको नगरव्यापी विद्यालयस्तरीय खेलकुद महोत्सव नगरपालिकाले गर्दै आएको राम्रो काममध्येको एउटा हो । थोरै प्रयासले पनि यो खेल महोत्सव अझै धेरै व्यवस्थित हुनसक्ने ठाउँ देखेको छु । मेरो तर्फबाट केही सुझावहरू प्रस्तुत गर्दछु ।
१. खेल अवधिभर आयोजक, सम्पूर्ण खेलका जिल्ला सङ्घहरू, विद्यालय प्रशासन, खेलाडी एवं प्रशिक्षकहरूलाई सहयोग र समन्वय गर्न एउटा सचिवालयको तड्कारो आवश्यकता महसुस भयो । सचिवालयले खेलकुद महोत्सव सुरु हुनुअघि नै विभिन्न खेलका फारामहरू, खेल हुने विधा, खेलका नियम, खेल हुने मिति, स्थान, समय आदिको बारेमा सबैलाई सुसूचित गर्ने कार्य समयमै भयो भने अन्योल हुँदैन । समयमै सूचना प्रवाह नहुने समस्या देखियो । उदाहरणको रूपमा एथलेटिक्सअन्तर्गत कुन कुन विधामा खेलहरू हुने भन्ने कुरा प्रस्ट थिएन । जिम्मा परेको सम्बन्धित वडामा फोन गरेर बुझ्न खोज्दा स्पष्ट उत्तर मिलेन । खेल सुरु हुनु एक दिनअघि बेलुकातिर मात्र कुन खेल कति गते कति बजे हुने भन्ने सूचना प्रकाशित भयो । त्यतिञ्जेलसम्म विद्यार्थीहरू स्कूलबाट घर गइसकेको अवस्था थियो । उद्घाटनकै दिन बिहानैदेखि एथलेटिक्सका त्ेन्टहरूका खेलहरू सञ्चालन भए । समयमै सूचना नपाएको कारण खेलाडीहरू खेलस्थलमा समयमै पु¥याउन सकस भयो ।
२. खेलका फारामहरू भक्तपुर नगरपालिकाको वेबसाइटमा राखेर आवश्यकताअनुसार विद्यालयले नै प्रिन्ट गरेर लिन मिल्ने बनाउँदा उत्तम हुन्छ ।
३. आयोजना हुने सम्पूर्ण खेलका सामान्य नियमहरू पनि वेबसाइटमा राख्यो भने नियम नबुझेर हुने समस्याहरू न्यूनीकरण हुन्छ ।
४. केही खेलस्थलमा पर्याप्त पानीको व्यवस्था भएको पाइएन ।
५. सचिवालयले भाग लिने सम्पूर्ण खेलाडीहरूको रेकर्ड राख्दा राम्रो हुन्छ । पदक जित्नेको रेकर्ड त अनिवार्य भयो । सहभागी अन्य खेलाडीहरूको पनि रेकर्ड राख्नुपर्ने हुन्छ । यसको लागि एउटा डिजिटल सिस्टम बनाउँदा उपयुक्त होला ।
६. हरेक दिन सचिवालयले सम्पूर्ण खेलस्थलबाट रेकर्ड सङ्कलन गरी त्यस दिनसम्ममा कुन स्कूलले कतिवटा पदक जित्यो भनी तालिका सार्वजनिक गर्दा राम्रो हुन्छ । जुन यो वर्ष सुरु भएको छ । यसलाई निरन्तरता दिनुपर्दछ । यसले प्रतिस्पर्धात्मक भावना विकास गराउँछ ।
७. विद्यालयहरूमध्ये समग्रमा सबैभन्दा बढी पदक जित्ने विद्यालयलाई एक वर्षको लागि दिने गरी ठुलो कप (रनिङ कप) को व्यवस्था गर्दा राम्रो हुन्छ ।
८. प्रतियोगिता अवधिभर खेलाडीहरू घाइते भएको अवस्थामा स्वास्थ्य उपचारबीमाको बन्दोबस्त भए राम्रो ।