केटीहरू बुलेटिनको अन्तरक्रिया सम्पन्न

भक्तपुर, ५ असोज । नेपाल क्रान्तिकारी महिला सङ्घ भक्तपुर नगर समितिको आयोजनामा ‘केटीहरू’ बुलेटिनको अन्तरक्रिया कार्यक्रम शुक्रबार सम्पन्न भयो ।
कार्यक्रममा नेक्रामसङ्घका केन्द्रीय अध्यक्ष अनुराधा थापामगरले विगतको सङ्घर्षबाट सिकेर योजनाबद्धरूपमा अगाडि बढ्दै जानुपर्ने बताउनुभयो ।
नयाँ पुस्ताले पुराना पुस्तासँग सहकार्य गर्दै अघि बढ्नुपर्ने आवश्यकता औँल्याउँदै उहाँले समाजलाई बुझी अगाडि बढ्न सके पछुताउन नपर्ने धारणा राख्नुभयो ।
प्रदेश सभाका सभासद् सृजना सैजुले निरन्तर अध्ययन गर्ने बानी बसाल्दै इतिहासदेखि वर्तमानसम्मका साहित्य, सृजनाहरू अध्ययन गर्नुपर्नेमा जोड दिनुभयो ।
नेमकिपा भक्तपुर नगर समितिका अध्यक्ष नारायणबहादुर दुवालले विगतको राजनीतिक अवस्था र महिलाहरूले निर्वाह गरेको भूमिकाबारे चर्चा गर्नुभयो ।
कार्यक्रमका सभापति रामेश्वरी कोजुले महिला सङ्घले नयाँ पुस्ताका महिलालाई सैद्धान्तिक रूपमा सवल बनाउने प्रयास गरिरहेको बताउनुभयो ।
कार्यक्रममा शुशिला कर्माचार्य, सुनिता गाइसी, छोरीमैया सुजखु, कमला सिजख्व, रन्जना सुवाल, बिकुलक्ष्मी कोजु, रमिला दिस्ती, स्मुति कासुलालगायतले बुलेटिनमा रहेका लेखहरूबारे आ–आफ्नो विचार व्यक्त गर्नुभएको थियो ।
कार्यक्रममा मन्जुमैया लाखाजुले पनि बोल्नुभएको थियो ।