डिन विश्वविद्यालय होइन डिम विश्वविद्यालय नै हो

पुस २२ गतेको ‘मजदुर’ दैनिकको पाठकको कलम स्तम्भमा वागीश्वरी कलेजका पूर्वविद्यार्थी रमेश कर्माचार्यले ‘डिन विश्वविद्यालय हो कि डिम विश्वविद्यालय ? भन्ने प्रश्न गर्दै वागीश्वरी कलेजले विश्वविद्यालय अनुदान आयोगबाट गुणस्तर सुनिश्चितता तथा प्रत्यायन प्रमाणपत्र प्राप्त गरेकोमा खुसी व्यक्त गर्नुभएको छ । म उहाँको जिज्ञासाप्रति हार्दिक आभार व्यक्त गर्दै उक्त प्रमाणपत्र वितरण समारोहमा सहभागीहरूमध्येको एक व्यक्ति भएको नाताले उहाँको जिज्ञासा मेटाउने उद्देश्यले यो पत्र लेख्दै छु ।
वास्तवमा आयोगका अध्यक्ष देवराज अधिकारीले डिम विश्वविद्यालय नै भन्नुभएको हो । पत्रिकाका रिपोर्टर मित्रले डिमलाई डिन सुन्नुभएको हो या उहाँले डिम लेख्दा पनि पत्रिकामा प्रुफ गल्ती भएर ‘डिम’ भएको हो थाहा भएन । भन्नलाई देवराज सरले डिम विश्वविद्यालय नै भन्नुभएको हो ।
डिम विश्वविद्यालय भन्ने पदावली मैले ख्वप कलेजको सुरुआती वर्षमै सुनेको थिएँ । तत्कालीन प्राचार्यले ख्वप कलेजलाई त्यही बेला नै डिम विश्वविद्यालयको रूपमा विकास गर्ने सोच बनाउनुभएको थियो । त्यसबेला मैले बुझेअनुसार डिम विश्वविद्यालयले अरू कलेजलाई सम्बन्धन दिन नपाइने तर विश्वविद्यालयको मूल्य र मान्यताभित्र रहेर पाठ्यक्रम निर्माण, परीक्षा सञ्चालन र नतिजा प्रकाशनसमेतको स्वायत्त अधिकार भएको शैक्षिक संस्थाको रूपमा रहने रहेछ ।
पूर्व विद्यार्थीको नाताले वागीश्वरी कलेजले क्यूएए पाएकोमा खुसी मात्र हैन जिज्ञासासहित थप प्रगतिको कामना गर्ने शुभेच्छुक रमेश कर्माचार्यलाई म हार्दिक धन्यवाद दिन चाहन्छु ।