चुँडिने हरेक बन्धन, स्वतन्त्रताको भूमिका बन्छ

(१)
भर्खर काम सिक्न लागेका कालिगड
आफ्नै ज्यावलदेखि रिसाए जस्तै
कति हाकिम बनेका अयोग्य मपाईँहरू
आफ्नै मित्रहरूबाट रिसाउँछन्,
आफ्नै छायाँलाई आफ्नै शत्रु सम्झेर अनाहक तर्सन्छन्
भित्री अपराध र पाप पोलेर बरबराउन थाल्छन्
मतिभ्रम र बुद्धिहीन भएर तिनीहरू
दूधे ढुङ्गालाई हिलो छ्यापेर मैलाउन र गलाउन खोज्छन्
एक ढुङ्गा फालेर महा–सागरलाई धमिल्याउन खोज्छन्,
दनदन बलेको सूर्यलाई तिनीहरू
थुकेर निभाउने दुस्साहस र मूर्खता गर्छन्
जाज्वल्यमान भएर बलिरहेको चिरागलाई
खान खोज्ने कीरा–फट्याँग्राहरू जस्तै तिनीहरू
क्रान्तिको बल्दो ज्वालालाई ‘सस्पेण्ड’, ‘मुल्तवी’ र
‘कारबाही’ को मूर्खताले निभाउन खोज्छन् ।
(२)
‘तर्कहीन मानिस रिसाउँछन्’ लेनिनले हामीलाई सिकाउनु भएको छ
क्रान्तिको बोली बोल्ने तर भाव र भाषा नबुझ्ने
नक्कली क्रान्तिकारीहरू तर्कले हारेर
रिस पोख्न चाहन्छन्, लाज छोप्न चाहन्छन् बहुलाएर
हिमालयमाथि ‘कारबाही’ को मुक्का हानेर आफै मार खान्छन् ।
(३)
उज्यालो देख्न नसक्ने अन्धाहरू
घाम देख्न नसक्ने चमेरा र लाटाकोसेराहरू
सच्चाइको निम्ति लड्न नसक्ने हुतिहारा क्रान्तिकारीहरू
निर्लज्ज भएर बाँचिरहेका पशुहरू
धिक्कार छ, तिमीहरूलाई बारम्बार धिक्कार !
न्यायको निम्ति लड्न नसक्ने कातर ‘बहादुरहरू’
‘ज्यू’ ‘हजुर’ ले मक्किएका दरबारियाहरू
सबै अर्थमा कासीबास पाएका जिउँदा मूर्दाहरू
आफ्नो मुकुण्डोलाई उघार
नत्र तिमीहरूलाई जनता आफै नङ्ग्याउने छन् ।
‘कारबाही’ को नामबाट आफ्नो पाप पखाल्न खोज्ने
हार स्वीकार्न नचाहने लाजमर्दा ए, जिउँदा लासहरू
मर, मर आफ्नै थुकमा डुबेर मर ¤
लाज पचिसकेका जाली–फटाहा, बेसर्मी ठग र भँडुवाहरू
‘एकताको नाममा फूटका बीउ छर्ने’ स्वार्थी कीराहरू
खोर्सानीको बोटहरूमा झुण्डिएर मर, आफै सेरिएर मर !
पटुचामा डुबेर मर्न नसक्ने
‘नाँगा नाचे हजार दाऊ’ का हकदारहरू
‘कार्बाई’ को बञ्चरोले आफ्नै खुट्टामा हिर्काउने मूर्खहरू
तिमीहरू आफ्नो चिहान आफै खन्दै छौ ।
(४)
तर याद गर !
उठ्दो क्रान्तिकारी ज्वार र जवानीमाथि
सडे–गलेको संशोधनवादको कसिंदै जाने हरेक बन्धन
टुक्रा–टुक्रा भएर चुँडिनेछन्, र
त्यस्ता चुँडिने हरेक बन्धन
स्वतन्त्रता र मुक्तिको निम्ति एक भूमिका बन्ने गर्छ ।
(फेबु्रअरी र मार्च १९७६)
स्रोतः आकाश बाँधिएको छैन